Naammagittaalliuutit Ombudsmandip suliarisinnaassappagu piumasaqaatit arlallit eqqortinneqarsimasussaapput:

1. Naammagittaalliornissamut periarfissat allat atorneqareersimassapput

Ombudsmandimut naammagittaalliunnginninni ingerlatsinermi oqartussaasumut qulliunerusumut naammagittaalliornissamut periarfissaqarsimappat taanna atoreersimassavat, oqartussaasullu taassuma suliamik ilinnut tunngasumik suliarinninnini naammassisimassallugu (Ombudsmandi pillugu inatsimmi § 13).

Ingerlatsiviup innuttaasullu aaqqiagiinngissutaasa Ombudsmandip, nakkutilliisutut arlaannaannulluunniit attuumassuteqanngitsutut, suliamut akuliutsinneqannginnerani ingerlatsiviup iluani sapinngisamik aaqqinniarneqartariaqarnerat tamatumunnga pissutaavoq.

Oqartussaasup aalajangiinera allakkatigut tigugukku, aalajangiinerlu ingerlatsinermi oqartussaasumut allamut naammagittaalliuutigisinnaagukku oqartussaasuo siulliup naammagittaalliornissamut periarfissaq pillugu ilitsersuutissavaatit, naammagittaalliuutillu tunniunneqarnerani periaaseq pillugu paasissutissallutit, matumani piffissaliisoqartussaappat piffissaliussaq ilanngullugu eqqarsaatigalugu. Naammagittaalliornissamut periarfissaqarnersoq nalornissutigigukku oqartussaasoq suliami ilinnut tunngasumi aalajangiisimasoq attaveqarfigisinnaavat Ombudsmandiluunniit saaffigisinnaallugu.

Pisortani atorfeqartitaasoq Ombudsmandimut naammagittaalliuutiginiarukku pineqartup pisortarisaanut aallaavittut naammagittaallioreersimassaatit. Soorlu kommunimi sulisoq Ombudsmandimut naammagittaalliuutiginiarukku kommunip borgmesterianut naammagittaallioreersimassaatit.

2. Naammagittaalliornissamut piffissaliussaq

Suliap ilinnut tunngasup pisoqalisoorsimasinnaanera eqqumaffigissavat. Ombudsmandimut naammagittaalliornissamut ukioq ataaseq piffissaliunneqarpoq.

Taamaalilluni Ombudsmandimut naammagittaalliuutit naammagittaalliuutigisap pisimaneranit ukioq ataaseq qaangiutsinnagu tunniunneqarsimassaaq (Ombudsmandi pillugu inatsimmi § 12, imm. 3).

Inatsimmi "naammagittaalliuutigisaq"-mik oqarnermi Ombudsmandimut naammagittaalliuutigisinnaasatit tamarmik ilaatinneqarput, soorlu suliamik suliarinninneq, suliap aalajangiivigineqarnera atorfeqartitaasullu pissusilersorneri.

Assersuutigalugu aalajangiineq naammagittaalliuutiginiarukku taanna ukioq ataaseq qaangernagu siusinnerusukkut pisimassaaq. Aalajangiineq Ombudsmandimut naammagittaalliunnginnermi oqartussaasumut qulliunerusumut naammagittaalliuutigisinnaagukku Ombudsmandimut naammagittaalliornissamut piffissaliussaq oqartussaasup naammagittaalliorfigineqartup kingulliup aalajangiinerata kingornatigut ingerlalersarpoq.

Kinaassutsit isertuussimagukku naammagittaalliuutivit Ombudsmandimit suliarneqarsinnaannginnera eqqumaffigissavat.