Ombudsmandi paaqqinniffinnik assigiinngitsunik innuttaasut piffissami sivikinnerusumi sivisunerusumiluunniit najugaqarfigisartagaannik arlalinnik ukiut tamaasa misissuisarpoq. Ombudsmandip soorlu pisortat utoqqarnik, inunnik innarluutilinnik kiisalu meeqqanik inuusuttunillu paaqqinniffiutaat misissortarpai. Ombudsmandip paaqqinniffiit namminersortut meeqqat inuusuttullu eqqarsaatigalugit suliassanik isumagisaqartut aamma misissorsinnaavai.

Misissuinerit taamaattut Ombudsmandip ataatsimut sulineranut ilaasutut, imaanngitsoq paaqqinniffik pillugu naammagittaalliuut aalajangersimasoq tunngavigalugu, ingerlanneqartarput.

Misissuinerit taamaattut siunertaat tassaavoq paaqqinniffiit najugaqartunik ajunngitsumik pinninnersut malittarisassanillu malinninnersut paasiniassallugu. Misissuinermi paaqqinniffiup initai Ombudsmandip Ombudsmandeqarfimmilu sulisut alakkartertarpaat, tamatumalu saniatigut pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit misissuineq sioqqullugu kalerrinneqareerajuttarput. Ombudsmandili siumut kalerreeqqarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Ajornartorsiutit suut Ombudsmandip misissuinermi maluginiarsimanerai paaqqinniffiullu allatut iliuuseqarnissaanik kaammattuutigisimasinnaasai nalunaarusiani taakkunani atuarneqarsinnaapput.

Misissuinerit pillugit nalunaarusiat Ombudsmandip ukiut tamaasa tamanut saqqummiuttarpai, taakkulu maani atuarsinnaavatit. Quppernermi matumani tamanut saqqummiussat piffissamit 1. januar 2018-ip kingornaneersuupput. Suliat siusinnerusukkut tamanut saqqummiunneqarsimasut Ombudsmandip ukiumoortumik nalunaarutaani ataasiakkaani atuarneqarsinnaapput.