Nutserisutut/oqalutsitut atorfik 1. maj 2026 aallarnerfigalugu erseqqinnerusumilluunniit isumaqatigiissuteqarnikkut sulilertussamik inuttassarsiuunneqarpoq.

Ombudsmandi pillugu

Ombudsmandi Namminersorlutik Oqartussat Kalaallillu Nunaanni kommunini oqartussaasut inatsiseqartitsinernik atuuttunik malinninnersut nakkutigissallugit qinerneqarsimavoq. 

Innuttaasut naammagittaalliutaat annertunerusutigut suliarisarpavut. Taakkua saniatigut nammineerluta sulianik misissugassanngortitsisarpugut, soorlu tusagassiorfitsigut eqqartuisoqarsimatillugu, taamatullu aamma kommuninut angalasarluta paaqqinniffinnilu misissuisarluta. Tamanna isornartorsiuinermik inernilerneqarsinnaavoq, oqartussaasulluunniit aalajangiinerminnik periaatsiminnilluunniit allanngortitseqqullugit kaammaattorneqarsinnaallutik.

Sulianik suliaqartarneq inatsisilerinermi pisortaq, sullissisut allat oqalutsillu suleqatigalugit kalaallisut qallunaatullu ingerlanneqartarpoq. Suliassat tassaassapput ombudsmandeqarfimmut saaffiginnissutinik taakkununngalu akissutinik nutserineq saaffiginnittoqarneranilu oqaluttaaneq, taamatuttaarlu aalajangersimanerusumik ingerlatatut suliassat allaffissornikkut suliassat naammassiniarneqarnerini annikinnerusutigut peqataasarnissat naatsorsuutigisinnaavat. Aamma ataatsimiittoqartillugu ombudsmandillu misissuinerini toqqaannartumik oqaluttaasarnissami suliassaqartarsinnaavoq.

Suliassatit

Uatsinni oqalutsitut/nutserisutut ombudsmandeqarfiup nutsigassaatai suliassarissavatit, ombudsmandeqarfimmi nutserisut/oqalutsit pisortaat aqutsisoralugu suleqatigalugulu.

Qinnuteqartoq pillugu

Illit

- marluinnik tamakkiisumik oqaaseqartuuvutit,

- allattarissanik nutserinermik oqaluttaanermilu misilittagaqartuuvutit,

- suliassatit namminersorlutit, peqqissaarlutit akisussaassuteqartumillu suliarisinnaavatit.

Oqaatsinik oqariartaatsinillu ombudsmandeqarfimmi aalajangersimasumik atorneqartunik atuinerup naleqqussarfiginissaa naatsorsuutigisariaqarpat. Pisortat ingerlatsinerat pillugu allaaserisanillu inatsisilerinermut tunngasunik nutserinermik siusinnerusukkut sulinermit misilittagaqarneq iluaqutaassaaq.

Kikkuuvugut

Suliffipput mikisunnguuvoq ukuullutalu, ombudsmandi, inatsisilerinermi pisortaq, inatsisilerituut sulianik suliarinnittut arfinillit, oqalutsit/nutserisut pisortaat aammalu oqalutsi allatsilu. 

Suliffik ingerlalluartoq sulinermi avatangiiserissaarfiusoq, suliassat tamarmiusut naammassineqarneranni ikioqatigiiffiusartoq neqeroorutigaarput.

Akissarsiat atorfinitsitsinermilu atugassarititaasut

Isumaqatigiissuteqarnikkut, atorfinitsinneqassaatit, tassanilu akissarsiat atorfeqartitaanermilu atugassarititaasut misilittagaqassuseq pisinnaasaqassuserlu tunngavigalugit aalajangersarneqassallutik. 

Pissutsit aallaavigalugit atorfiup piffissap ilaannaanni suliffigisassatut imaluunniit immikkut isumaqatigiissuteqarnikkut inuttalerneqarsinnaanissaa periarfissaasinnaavoq.

Qaqugukkulluuniit malittarisassat atuuttut malillugit sulisunut inissiamik atugassaqartitsivugut. Sulisunut inissiamik atugaqareersunut allatulluunniit kommunimit Nammisorlutilluunniit Oqartussanit inimik pigineqartumik atugaqartunut, sulisunut inissiamik atugassaqartitsisinnaanngilagut. Inip attartorneranut akigassaq sillimmasiinerlu inissiamut atugassarititamut qaqugukkulluunniit atuuttoq malillugu akilerneqassapput.

Inissiamut attartukkamut akiligassaq aamma inissiap pitsaassusia assigiinngiiaarsinnaavoq, apeqqutaalluni inissiap pisoqaassusia, pissutsit piginnittumut tunngasut il.il.  Sulisunut inissiamik atugassaqartitaanissaq utaqqinarsinnaavoq, taamaattumillu inissiamik utaqqiisaarumik tunisigallartoqarsinnaalluni.

Sulinermut atatillugu inissiami atugassaritinneqartumi- utaqqiisaaluunniit inigitinneqarallartumi anginerumaanik uumasuuteqartoqaqqusaanngilaq, soorlu qimmimik qitsummilluunniit. Qinnuteqartoq Namminersorlutik Oqartussani sulinermut atatillugu inissiamik atugassaqartinneqareersimappat, sulinermut atatillugu inissiamik atugassaqarsinnaatitaaneq atuutiinnassaaq.

Sulinermut atatillugu inissiaq atugassaritinneqartoq atorfinitsinneqarnermut atatinneqarpoq, atorfeqarunnaarnermilu qimanneqassalluni.

Aallaavittut sulineq Nuummi allaffimmi pisarpoq, Nuulli avataani angalanerit pisinnaapput, matumani ilaatinneqarput misissuiartornernut peqataanerit.

Qinnuteqaat

Qinnuteqaat kalaallisut qallunaatullu allanneqassaaq, e-mailikkullu job@ombudsmand.gl, nassiunneqassalluni. 

Qinnuteqaatit soraarummeernermi allagartanik suliffigisimasallu allattorsimaffiannik CV-mik ilaqartillugu uatsinnut kingusinnerpaamik ataasinngornermi 16. marts 2026 nal. 12.00, tiguneqareersimassaaq. Atorfinitsitsiniarluni oqaloqatiginninnerit sapaatit akunnerani 12-mi ingerlanneqarnissaat naatsorsuutigineqarpoq.

Qinnuteqartut atorfinitsitsiniarluni oqaloqatiginninnermut atatillugu allattariarsorluni misilitsinnissaq naatsorsuutigisariaqarpaat.

Atorfik pillugu paasissutissat oqalutsit pisortaannut Karoline Lyberth oqarasuaatip normuanut 32 78 10-mut sianerfigalugu pissarsiarineqarsinnaapput.