Ombudsmandi Inatsisartunit qinerneqartarpoq

Inatsisartut Kalaallit Nunaat Inatsisartut inatsisaannik nr. 7-imik, 13. juni 1994-imeersumik akuerinninnerisigut Ombudsmandeqalerpoq. Inatsisartut Ombudsmandiat pillugu Inatsisartut inatsisaat taanna Inatsisartut Ombudsmandiat pillugu Inatsisartut inatsisaannit nr. 8-mit, 3. december 2009-meersumit kingusinnerusukkut taarserneqarpoq.

Atorfik cand. jur. Emil Abelsenimit 1995-imit 1996-imut ingerlanneqarpoq. Atorfik 1. februar 1997-imit cand. jur. Vera Lethimit ingerlanneqarpoq.

Ombudsmandi Inatsisartunit qinerneqartarpoq, Namminersorlutillu Oqartussat kommunillu inatsiseqartitsineq atuuttoq ingerlatsinermilu ileqqorissaarneq tunngavigalugit ingerlatsinerat Inatsisartut sinnerlugit nakkutigisaralugu.

Ombudsmandi sulinermini Inatsisartunut Naalakkersuisunullu attuumassuteqarnani sulivoq.

Naammagittaalliuutinik suliarinnittarneq

Ingerlatsinermi oqartussaasut aalajangiineri kiisalu innuttaasunik sulianillu suliarinninneri pillugit naammagittaalliuutit Ombudsmandip suliarisinnaavai. Tamatuma saniatigut suliat Ombudsmandip nammineerluni misissuiffiginninnermik aallartitsivigisinnaavai, matumani oqartussaasut sulianik suliarinninnerinik ataatsimut misissuiffiginninnerit ilanngullugit eqqarsaatigalugit.

A/S Inissiaatileqatigiiffik INI pillugu naammagittaalliuutit

Ombudsmandi A/S Inissiaatileqatigiiffik INI pillugu sulianik 1. januar 1997-imili suliarinnissinnaalersimavoq, tassa suliani Inissiaatileqatigiiffiup Namminersorlutik Oqartussat kommuniluunniit sinnerlugit aalajangiinissamut piginnaatinneqarfigisaani.

Misissuisarnerit, kommunimut misissuiartorluni tikeraarnerit il.il.

Ombudsmandi naalliutitsisarneq allatullu peqqarniingaartumik, inuppalaanngitsumik imaluunniit nikanarsaataasumik pinnittarneq imaluunniit pillaasarneq akiorniarlugit Naalagaaffiit Peqatigiit isumaqatigiissutaannut ilassut 18. december 2002-meersoq nammineq piumassuseq malillugu ilannguffigineqarsinnaasoq tunngavigalugu nuna tamakkerlugu pinaveersaartitsisutut suliassamik 1. januar 2010 aallarnerfigalugu isumagisaqalerpoq.

Ombudsmandi tamanna tunngavigalugu sumiiffinnik inuit kiffaanngissusiiagaaffigisaannik kiffaanngissusiiagaaffigisinnaasaannilluunniit akuttunngitsumik misissuisarpoq. Ombudsmandip taamatut misissuinissamut pisinnaatitaanera Namminersorlutik Oqartussat kommunillu ataanni suliffeqarfinnut/paaqqinniffinnut atuuppoq. Tamakkua saniatigut inatsisit atuuttut aamma inatsisissatut siunnersuutit pillugit siunnersuutinik oqaaseqaatinillu saqqummiussisarneq Ombudsmandip nuna tamakkerlugu pinaveersaartitsisutut aamma suliassaraa.

Ombudsmandi nammineq suliniuteqarnermigut kommuninut misissuiartorluni tikeraarsinnaavoq, kiisalu pisortat paaqqinniffiutaanni/suliffeqarfiutaanni pissutsit misissorsinnaallugit. Misissuinermi paaqqinniffiup/suliffeqarfiup oqartussaasulluunniit aaqqissuunneqarnera ingerlanneqarneralu ilaatigut pineqarsinnaapput. Misissuineq ilaatigut suliffeqarfiup/paaqqinniffiup aaqqissugaaneranut ingerlanneqarneranullu kiisalu suliffeqarfiup/paaqqinniffiup oqartussaasulluunniit ingerlataanik atuisuinilluunniit inuppalaartumik isummat aallaavigalugit pinninneq pillugu pissutsinut tunngasuusinnaavoq. Kommuninut misissuiartorluni tikeraarnermi suliat arlallit tigulaarinikkut misissugassanngorlugit aammattaaq tiguneqarsinnaapput. Misissuiartorluni tikeraarnerni innuttaasut Ombudsmandimut ornigullutik saaffiginninnissaminnut periarfissaqarsinnaapput.

Ombudsmandip ukiumoortumik nalunaarutaa

Ombudsmandip ukiumoortumik nalunaarutaa Ombudsmandip nittartagaatigut ukiumut ataasiarluni tamanut saqqummiunneqartarpoq. Ukiumoortumik nalunaarut ilaatigut sulianik nalinginnaasumik soqutiginaateqartunik allaaserisanillu imaqartarpoq. Ombudsmandip oqaaseqaatai immikkut toqqakkat Ombudsmandip nittartagaatigut ingerlaavartumik tamanut saqqummiunneqartarput.