Inatsisartut Ombudsmandiannit misissuiartortut Utoqqaat Illuanni Nuummiittumi september 2025-mi misissuipput. Misissuineq ombudsmandip sulineranut ilaasutut, imaanngitsoq utoqqaat illuat pillugu naammagittaalliuut aalajangersimasoq tunngavigalugu, ingerlanneqarpoq.

Utoqqaat Illuat pillugu ombudsmandip pingaarnertut maluginiagaa unaavoq, Utoqqaat Illuanni najugaqartunut toqqissisimanissamik atugassaqartitsinissamik neqerooruteqarnerat. Tamatuma saniatigut ombudsmandimit maluginiarneqarpoq Utoqqaat Illuanni pisortaqatigiit sulisullu, suliaminnut pikkorillutik najugaqartunut ataqqinnillutik suliassatik suliarisaraat.

Tamatuma saniatigut ombudsmandip maluginiarpaa, paaqqinnittutut sulisut, qaqutigorujussuaq pissaanermik atuisartut, perorsaanikkut sungiusimasanillu assigiinngitsunik arlalinnik aaqqiagiinngissuteqartoqassagaluarpat aaqqiissutissanik sakkussaminnik atuisarnermikkut.

Pissutsit oqaaseqaateqarnissamut pissutissaqalersitsisut ombudsmandip nalunaarusiami aammattaaq eqqartorpai. Utoqqaat Illuata initaanik misissui-nermi misissuisunit malugineqarpoq inini ataatsimoorfiusartuni tupap pujuanik tipeqarnera. Nalunaarusiami ombudsmandimit inassutigineqarpoq Utoqqaat Illuanni tupap pujuanik najuussuisarneq pitsaaliuiffigineqassasoq.

Tamakkua saniatigut ilaatigut sulisut napparsimallutik sulinnginneranni sulisoqarniartarneq,  paaqqinniffiup ajutoortoqalernerani kalerrisaarutaa aamma, avatangiisitigut sinaakkutit, kiisalu pissaanermik atuisarneq pillugu inatsimmi pissutsinut tunngasut ombudsmandimit oqaaseqarfigineqarput.

Kommuneqarfik Sermersuumi ingerlatsivik misissuineq pillugu nalunaarusiaagallartumut missingiut pillugu oqaaseqaateqarpoq. Ombudsmandip Utoqqaat Illuanni misissuineq pillugu suliaq tamatuma kingorna naammassivaa.

Misissuinermi nalunaarusiaq atuarsinnaavat uani.

Annertunerusumik paasisaqarasukkuit: Oqarasuaat 32 78 10

TUNULIAQUTAA

Ombudsmandip misissuisarneri

Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinnittarfinni assigiinngitsuni innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombudsmandip ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili siumut kalerreeqqaarnani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Tassani ajornartorsiutit suut ombudsmandip misissuinermi maluginiarsimanerai aamma suut allatut iliorluni suliarineqarsinnaanerat ombudsmandip kaammattuutigisimaneraa atuarneqarsinnaavoq.