Inatsisartut ombudsmandiannit misissuiartortut Utoqqaat Illuanni Upernavimmiittumi juni 2024-mi misissuipput. Misissuineq ombudsmandip sulineranut ilaasutut, imaanngitsoq utoqqaat illuat pillugu naammagittaalliuut aalajangersimasoq tunngavigalugu, ingerlanneqarpoq.

Utoqqaat illuat pillugu ombudsmandip pingaarnertut maluginiagaa unaavoq, najugaqartut naammagisimaarinnittut aamma utoqqaat illuanni najugaqarsinnaanertik qujamasuutigigaat. Aamma ombudsmandimit maluginiarneqarpoq akisussaassuseqarlutik, sungiussisimallutik aammalu najugaqartut tungaannut pissaanermik atuinnginnissaq ukkataralugu, kiisalu aqutsisoqatigiit suliaminnut tunniussimallutik unammillernarsinnaasullu ilisimaaralugit najugaqartut, sulisut ilaqutaasullu misigisartagaat eqqarsaatigalugit sulisut suliaqarnerat.

Pissutsit oqaaseqaateqarnissamut pissutissaqalersitsisut ombudsmandip nalunaarusiami aammattaaq eqqartorpai. Taamaalilluni ombudsmandimit ilaatigut oqaaseqaateqarfigineqarput, utoqqaat illuata qularnaarsimanngimmagu, pissaanermik atuinermi inatsisip sulisunut tunniunneqarnissaa, kiisalu pissaanermik atuinermi inatsisip imarisaanik atornissaanillu ilitsersorneqarnissaat kiisalu taamaaliorsimanermut uppernarsaallutik atsiornissaat.

Taamatullu aamma ombudsmandimit oqaaseqaateqarfigineqarput utoqqaat illuata pulaartoqarsinnaanermut killilersuinera, matut silarliit parnaarsaataannik atuineq, illup naleqqunnassusia, tupap pujuanik najuussuisarneq sulisussaaleqisarnerlu.

Upernavimmi Utoqqaat Illuat aamma Avannaata Kommuniani ingerlatsivik misissuineq pillugu nalunaarusiaagallartumut missingiut pillugu oqaaseqaatiminnik nassiussipput. Ombudsmandip Upernavimmi Utoqqaat Illuanni misissuineq pillugu suliaq tamatuma kingorna naammassivaa.

Misissuinermi nalunaarusiaq atuarsinnaavat uani.

Annertunerusumik paasisaqarasukkuit: Oqarasuaat 32 78 10

TUNULIAQUTAA

Ombudsmandip misissuisarneri

Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinnittarfinni assigiinngitsuni innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombudsmandip ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili siumut kalerreeqqaarnani aamma misissuisinnaavoq.