Inatsisartut Ombudsmandiannit misissuiartortut Pakkutami Nuummiittumi september 2025-mi misissuipput. Misissuineq ombudsmandip sulineranut ilaasutut, imaanngitsoq utoqqaat illuat pillugu naammagittaalliuut aalajangersimasoq tunngavigalugu, ingerlanneqarpoq.

Utoqqaat illuat pillugu ombudsmandip pingaarnertut maluginiagaa unaavoq, Pakkutami pisortaqatigiit suliaminnut tunniusimasorujussuullutik najugaqartut toqqissisimasumik atugaqartinneqarnissaannik ukkatarinnittuusut.

Tamatuma saniatigut ombudsmandip maluginiarpaa, sulisut suliassatik peqqissaarullugit suliarisaraat, aammalu sulisut pisortaqatigiillu najugaqartut tungaannut pissaanermik atuinnginnissaq eqqummaariffigisorujussuugaat.

Ombudsmandi naliliivoq, Pakkutaq najugaqarfiusoq ingerlalluartoq, najugaqarfik pitsaasumik atugassaqartitsiviulluni. Misissuisunit najugaqartut oqaloqatigineqartut angerlarsimaffimmi iluarisimaarinnippasipput.

Pissutsit oqaaseqaateqarnissamut pissutissaqalersitsisut ombudsmandip nalunaarusiami aammattaaq eqqartorpai. Pakkutap initaanik misissuinermi misissuinit qularnaatsumik malugineqarpoq inini ataatsimoorfiusartuni tupap pujuanik tipeqarnera. Nalunaarusiami ombudsmandimit inassutigineqarpoq Pakkutami tupap pujuanik najuussuisarneq pitsaaliuiffigineqassasoq.

Tamakkua saniatigut ombudsmandimit ilaatigut oqaaseqarfigineqarpoq siunissami sulinermi ajoqusernerit nalunaarutigineqartarnissaat. 

Kommuneqarfik Sermersuumi ingerlatsivik misissuineq pillugu nalunaarusiaagallartumut missingiut pillugu oqaaseqaateqarpoq. Ombudsmandip Pakkutami misissuineq pillugu suliaq tamatuma kingorna naammassivaa.

Misissuinermi nalunaarusiaq atuarsinnaavat uani.

Annertunerusumik paasisaqarasukkuit: Oqarasuaat 32 78 10

TUNULIAQUTAA

Ombudsmandip misissuisarneri

Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinnittarfinni assigiinngitsuni innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombudsmandip ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili siumut kalerreeqqaarnani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Tassani ajornartorsiutit suut ombudsmandip misissuinermi maluginiarsimanerai aamma suut allatut iliorluni suliarineqarsinnaanerat ombudsmandip kaammattuutigisimaneraa atuarneqarsinnaavoq.