Ombudsmandi oqaaseqaammi nutaami naliliivoq, angajoqqaatut oqartussaasup meeqqat angerlartinneqarnissaat pillugu noqqaassutaanik Kommune Qeqertalimmit piffissaq suliap suliarineqarneranut  atorneqartoq ajorluinnartoq illersorneqarsinnaanngitsorlu.

Meeqqat 2012-imi angerlarsimaffiup avataanut inissinneqarput, tamatuma kingorna angajoqqaajusoq arlaleriarluni ukiut qulit sinnerlugit meeqqami angerlartinneqarnissaat pillugu noqqaassuteqartarsimasoq. Naak noqaassuteqartuartaraluartoq meeqqani 18-iniliitinnagit angerlartinneqassasut, kommune aalajangiissuteqarswimanngilaq.

Kommunimittaaq angajoqqaatut oqartussaassuseqartumut allakkatigut piumasaqarsinnaaneq inatsisitigut tunngavissaqanngitsutut ombudsmandimit isumaqarfigineqarpoq, soorlu aamma kommunip suliamik uninngatitsiinnarsimanera inatsisitigut tunngavissaqanngitsutut isigineqartoq.

Pissutsit taakku marluk isorisassarujussuartut ombudsmandimit isumaqarfigineqarput.

Naggataatigullu ombudsmandip inerniliilluni oqaatigaa,  suliami annertuumik kukkussuteqartoqarsimasoq sumiginnaasoqarsimasorlu, taamaattumillu Ombudsmandi pillugu inatsimmi § 23 malillugu oqaaseqaat pillugu Inatsisartut Inatsisinut Ataatsimiititaliaat kommunalbestyrelsilu tamatuminnga nalunaar-figisimallugit.

Ombudsmandip oqaaseqaata  atuarsinnaavat uani.

Paasissutissat annertunerusut pissarsiarineqarsinnaapput oqarasuaatip  normuanut: 32 78 10

Piffissaq suliap suliarineqarneranut atorneqartoq qaqugu sivisuallaalertarpa?

Piffissaq suliap suliarineqarneranut atorneqartoq qanoq sivisutigisoq pisortani oqartussaasup atussaneraa nalinginnaasumik malittarisassaqanngilaq. Ingerlatsinermili ileqqorissaarnissap malitsigivaa, suliat sapinngisamik pilertornerpaamik illersorneqarsinnaasumillu suliarineqartassasut. 

Suliaq pisariaqarneratut pilertortigisumik suliarineqarsimanersoq ilaatigut suliap isikkua apeqqutaavoq, oqartussaasup suliani tassunga assingusuni piffissaq suliarinninnermut atugaa nalinginnaasoq, suliap pisariussusia, suliami ingerlaavartumik iliuuserineqartut kiisalu suliamik suliarinninnermi piffissartornartut iliuuserineqassanersut apeqqutaavoq.