Angerlarsimaffik Isikkivimmi misissuineq

Inatsisartut ombudsmandianit misissuiartortut OPCAT atorlugu misissuineq Angerlarsimaffik Isikkiviup immikkoortortaani matoqqasumi Sisimiuniittumi september 2024-mi ingerlanneqarpoq. Immikkoortortami matoqqasumi sullitat tassaapput meeqqat 12-iniit 17-iniliisimasut ilanngullugit, isumaginninnermi inatsit imaluunniit eqqartuussisarneq pillugu inatsit pinerluttulerinermiluunniit inatsit malillugu inissinneqarsimasut.

OPCAT malillugu immikkoortortamut matoqqasumut misissuinermut atatillugu, immikkoortortami ammasumi misissuineq ingerlanneqarpoq.

Misissuinerit ombudsmandip nalinginnaasumik sulineranut ilaasutut, taamaalilluni naammagittaalliut aalajangersimasoq tunngaviginagu ingerlanneqarput.

Ombudsmandip pingaarnertut Angerlarsimaffik Isikkivik pillugu maluginiagaa tassaavoq, Isikkivimmi pisortaqatigiit sulisullu sapinngisartik tamaat atorlugu najugaqartunut toqqissisimanartumik siunertarisamullu naleqquttumik sinaakkutaqartitsiniarsarisut, aammalu sulisut najugaqartut atugarissaarnissaannik qulakkeerinnikkumallutik, naatsorsuuteqarfigineqarnertik sinnerlugu iliuuseqarusussuseqartartut.

Ombudsmandimittaaq maluginiarneqarpoq immikkoortortaqarfiit najoruminartunngorlugit angerlarsimaffippalaartunngortinniarneqarsimaneri.

Misissuinermut atatillugu meeqqat inuusuttullu paaqqinniffimmut inissinneqarsimasut atuartinneqartarnissaat ombudsmandimit immikkut ukkatarineqarpoq. Misissuiartornissaq sioqqullugu Angerlarsimaffik Isikkivimmit oqaatigineqarpoq, ilinniartitsisunik paaqqinniffimmi ilinniartitsisinnaasunik pissarsiniarneq ajornakusoortinneqartarsimasoq.

Tassunga atatillugu ombudsmandimit oqaatigineqarpoq, meeqqat inuusuttullu pisortat inissiisarfiinut inissinneqarsimasut inatsisitigut atuartussaatitaaneq tunngavigalugu atuartinneqannginnerat assut ilungersunartuusoq. Tassunga atatillugu ombudsmandimit oqaatigineqarpoq, pisortanit meeqqat nakkutigineqartut aturtinneqanngikkunik imminut ikiornissamut sapiissuseqartinneqarsinnaanngitsut.

Tamatumunnga atatillugu ombudsmandimit inassutigineqarpoq, Angerlarsimaffik Isikkivup qulakkiissagaa meeqqat inuusuttullu inissinneqarsimasut atuartinneqartarnissaat.

Atuartuartitaannginneq pillugu ombudsmandimit ernumaatigineqartoq tunngavigalugu ombudsmandi aalajangerpoq meeqqanut inuusuttunullu ulloq unnuarlu angerlarsimaffinnut inissinneqarsimasunut nalinginnaasumik atuartitaanissaannut neqeroorutit misissuiffigineqassasut.

Nalunaarusiami immikkoortortami matoqqasumi pissutsit allat ombudsmandimit oqaaseqaateqarfigisassatut oqaatigineqarput, tamatumani ilaatinneqarluni pissaanermik atuineq pillugu inatsisip malittarisassaata malinneqarnissaa, ilaatigut pissaanermik atuinermi nalunaarsuisarnermut aamma nalunaarutiginnittarnermut tunngasut.

Tamatuma saniatigut Angerlarsimaffik Isikkiviup ilaatigut malittarisassai pillugit ombudsmandi oqaaseqaateqarpoq, ilaatigut mobiltelefoninik tabletsinillu atueqqusisannginneq pillugu.

Nalunaarusiami immikkoortortami matoqqasumi pissutsit allat oqaaseqarfigineqartariaqartut ombudsmandimit eqqaaneqarput, taakkua ilagalugu inuusuttut sulisullu akornanni atassuteqaqatigiinnerup suliniutigineqarnera, pissaanermik atuisarneq pillugu malittarisassat, suliffimmik nalilersuineq aamma Angerlarsimaffik Isikkivimmi illup iluani malitassat, siusinnerusukkut najugaqartut qanoq sivisutigisumik oqarasuaatikkut oqaluussisinnaanerannik killissani aalajangersagaq. Tamatuma saniatigut illup iluani malitassani immikkoortoq, pulaartoqarnissamik killiliussat ombudsmandimit aamma oqaaseqarfigineqarput.

Isumaginninnermi Aqutsisoqarfimmit misissuinermi nalunaarusiaagallartut marluusut oqaaseqaateqarfigineqarput. Tamatumunnga atatillugu ombudsmandimit Angerlarsimaffik Isikkivik aamma Isumaginninnermi Aqutsisoqarfik qinnuigineqarpoq atuartitaanissap qulakkeerinniffigineqarnissaa pillugu qanoq iliuuseqartoqarnissaanik pissutissaqalersitsinersoq nalunaarutigeqqullugu.

Immikkoortortami matoqqasumi misissuinermi nalunaarusiaq atuarsinnaavat uani.

Immikkoortortami ammasumi misissuinermi nalunaarusiaq atuarsinnaavat uani.

Annertunerusumik paasisaqarasukkuit: Oqarasuaat 32 78 10

TUNULIAQUTAA
Ombudsmandip misissuisarneri
Ombudsmandi innuttaasut pisortat ingerlatsinerat pillugu naammagittaalliutaannik suliarinnittarnermi saniatigut paaqqinnittarfinni assigiinngitsuni innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombudsmandip ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili siumut kalerreeqqaarnani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Tassani ajornartorsiutit suut ombudsmandip misissuinermi maluginiarsimanerai aamma suut allatut iliorluni suliarineqarsinnaanerat ombudsmandip kaammattuutigisimaneraa atuarneqarsinnaavoq.