Ombudsmandi oqaaseqammi nutaani eqikkaalluni inerniliivoq innuttaasup siusinaartumik pensionisiaqalerumalluni qinnuteqaataa Avannaata Kommuniata naammattumik pilertussuseqartumik suliarisimanngikkaa.

Innuttaasoq siusinaartumik pensionisiaqalerumalluni 2018-imi augustimi qinnuteqarpoq, kommunilli suliamik suliarinninneq aallartinnagu. Innuttaasup kommuni 2021-mi decemberimi nukingisaarpaa, kommunillu innuttaasoq tamatuma kingornatigut ataatsimeeqatigalugu. Kommunip suliamik suliarinninneq suli aallartinngilaa. Taamaattumik innuttaasup kommuni 2022-mi septemberimi nukingi-saaqqippaa. Kommunip innuttaasoq tamanna tunngavigalugu arlaleriarluni ataatsimeeqatigaa.

Qinnuteqaateqartup suliamik suliarinninniarneq ukiut sisamat sinnerlugit ingerlareersoq qinnuteqaatini 2023-mi martsimi tunuartippaa.

Ombudsmandi isumaqarpoq suliaq A-mut tunngasoq kommunip arlaleriarluni puigortarsimagaa, aatsaallu innuttaasoq nukingisaaruteqaraangat suliaq ingerlaleqqittarsimasoq.

Suliap suliarineqarani ukiut pingasut sinnerlugit uninngasimanera kiisalu suliap suliarineqannginneranik kommunip innuttaasumit nukingisaarutinik tigusaqarnermi kingornatigut aatsaat malugisarsimanera Ombudsmandip isorisariaqarluinnartutut isigaa.

Piffissaq suliamik suliarinninnermut atorneqartoq katillugit ukiut sisamat sinnerlugit sivisussuseqartoq Ombudsmandip isorisarialerujussuartut isigaa.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiariniarneqarsinnaapput.

Piffissaq suliamik suliarinninnermut atorneqartoq qaqugukkut sivisual-laalertarpa?
Piffissaq suliamik suliarinninnermut atorneqartoq qanoq sivisutigisoq pisortani oqartussaasup atussagaa ataatsimut malittarisassanik peqanngilaq. Naatsumilli oqaatigalugu ingerlatsinermi ileqqorissaarnerup manna nassataraa, tassalu suliat sapinngisamik pilertornerpaamik illersorneqarsinnaasumillu suliarineqartassasut.

Suliaq pisariaqarneratut pilertortigisumik suliarineqarsimanersoq apeqqummi suliap suussusia, oqartussaasup suliani tassunga assingusuni piffissaq suliarinninnermut atortagaa nalinginnaasoq, suliap pisariussusia, suliami ingerlaavartumik iliuuserineqartut kiisalu suliaq paasissutissartalersorniarlugu suliamik suliarinninnermi iliuutsit piffissartornartut iliuuserineqassanersut apeqqutaavoq.