Ombudsmandip oqartussaasunut ilitsersuusiaa
“Oqartussaasut, pingaartumillu kommunit ingerlatsivii, ataatsimut isigalugit ajornartorsiuteqarput”, taama oqarpoq Ombudsmand Vera Leth nangillunilu: “Uanga Ombudsmanditut sulininni ukiut ingerlaneranni ajornartorsiutit annersaasa ilaat tassaasimavoq oqartussaasut ingerlatsinermik inatsiseqartitsinermi malittarisassanik pingaarnernik malinnitsinniarnerat”.
“Malittarisassat malinneqarsinnaassappata malittarisassanik ingerlatitseqqinneq tunngaviuvoq. Oqartussaasunut ilitsersuut oqartussaasut sulinerannik patajaallisaanermi peqataarusullunga suliaraara. Ilitsersuut taanna nittartakkanni massakkut iserfigineqarsinnaalerpoq”, Vera Leth oqarpoq.
“Oqartussaasunut ilitsersuutip ingerlatsinermik inatsiseqartitsinermi qitiusumik sammisassat arlallit saqqummiuppai. Oqartussaasunut ilitsersuutip malittarisassat, inatsisilerinikkut atuakkiat oqaaseqaatikkalu suliamut attuumassuteqartut imminnut ataneqartilerpai, taamaalillunilu oqartussaasunut ilitsersuut piffissap ingerlanerani piorsarneqartuartussaalluni”, Vera Leth nangilluni oqarpoq.
“Inatsisilerineq inuit ilarpassuinut paasiuminaatsuuvoq, oqarnianngilangalu oqartussaasunut ilitsersuut kikkunnulluunniit paasiuminartuusoq. Oqartussaasunulli ilitsersuut Namminersorlutik Oqartussat kommunillu qitiusumi qitiunngitsumilu ingerlatsiviini pisortaasunit sulisunillu – ilinniartitsinermi ulluinnarnilu sulinermi sakkutut – atorneqarsinnaanera eqqarsaatigineqarpoq. Oqartussaasunut ilitsersuutip tamanit pissarsiarineqarsinnaasunngortinneqarneratigut pisinnaatitaaffiit pillugit paasissutissarsiorfittut ilitsersuutitullu innuttaasunit atorneqarsinnaanera aammattaaq eqqarsaatigaara” Vera Leth naggasiilluni oqarpoq.