Ombudsmandi oqaaseqaammi nutaami eqikkaalluni inerniliivoq Kommuni Qeqertallip suliassat suliarineqartarnerat pillugu inatsimmi suliami illua’tungiusup isumaanik tusarniaasarneq pillugu malittarisassat sulisup soraarsinneqarneranut atatillugu malissimanngikkai, sulisormi soraarsinneqarnini sioqqullugu suliami illua’tungiusutut isummaminik tusarniaavigineqarsimanngimmat.

Aalajangiinerup aalajangiinermi pineqartumut nanertuutaasup allakkatigut uppernarsartariaqarnera aalajangiinerillu annertuumik akuliuffiusut pisut qanoq issusiat apeqqutaatillugu allakkatigut nalunaarutigineqartariaqarnerat ingerlatsinermi ileqqorissaarnerusoq Ombudsmandip siusinnerusukkut oqaatigisarsimavaa.

Ombudsmandi suliami matumani eqikkaalluni inerniliivoq kommuni allakkatigut aalajangiisimanngitsoq tunngavilersuummillu sulisumut tunniussisimanngitsoq. Ombudsmandip paasinninnera unaavoq soraarsitsisoqarnissaanik aalajangiineq ima akuliunnerutigisoq aalajangiineq innuttaasumut allakkatigut nalunaarutigineqarpat tamanna ingerlatsinermi ileqqorissaarnermi tunngavinnut naapertuunnerpaassalluni.

Ombudsmandi ataatsimut isiginnilluni isumaqarpoq sulisup suliami illua’tungiusutut isumaanik kommunip tusarniaasimannginnera tunngavilersugaasumillu allakkatigut sulisumut aalajangiisimannginnera isorisariaqartuusoq.

Kommunip suliami amigaatinik isummerfiginnissimannginnera immini amigaatinillu paasisaqarami suliamik suliarinneqqissimannginnera Ombudsmandip isorisarialittut isigaa.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Suliassat suliarineqartarnerat pillugu inatsimmi suliami illua’tungiusup isumaanik tusarniaasarneq pillugu malittarissasat

Suliami illua’tungiusup isumaanik tusarniaasarneq pillugu malittarisassat ilaatigut pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi kingusinnerusukkut allannguuteqartin-neqarsimasumi (matuma kingornatigut suliassat suliarineqartarnerat pillugu inatsimmik taaneqartartussami) § 19-ikkut aalajangersarneqarput.

Tassani aalajangersarneqarpoq oqartussaasup suliami illua’tungiusoq suliami pissuviusut pillugit paasissutissanik suliami illua’tungiusup ilisimasaqarfiginngisaatut isigisaminik ilisimatissagaa. Oqartussaasup suliami illua’tungiusoq aalajangiisoqannginnerani oqaaseqaateqarnissaanut tamatumunnga atatillugu periarfississavaa.

Taamaalilluni suliami illua’tungiusup isumaanik tusarniaanerup siunertaa tassaavoq suliami illua’tungiusup suliami illua’tungiusutut isummaminik tusarniaavigineqartup iliuuserisimasami aalajangiissamaarnerullu imminnut ataqatigiinneqarnerannik paasisaqarnissaanik periarfissiiniarneq.

Suliassat suliarineqartarnerat pillugu inatsimmi § 19-imi suliami illua’tungiusup isumaanik tusarniaanissamut nalinginnaasumik pisussaaffik peersitsissamaarneq pillugu suliami illua’tungiusup isumaanik tusarniaanermut atatillugu suliami illua’-tungiusup isumaanik tusarniaanissamut annertusisamik pisussaaffimmit taperta-lerneqartarpoq.

Tassa imaappoq suliami illua’tungiusoq suliami pissusiviusut saniatigut suliap inatsiseqartitsinikkut uppernarsaasersuinikkullu tunngavii pillugit tusarniaavigineqartussaasoq. Taamaalilluni suliami illua’tungiusoq aalajangiinermut tunngaviusussaq tamaat pillugu tusarniaavigineqartussaavoq, paasissutissat pineqartut oqartussaasup pigigai paasissutissallu pineqartut oqartussaasup aalajangiiniarnermini tunngavissaani ilaasut suliami illua’tungiusup ilisimareeraluarpaguluunniit.


Tunngavilersugaasumik allakkatigut aalajangiinissamut pisussaaffeqarneq

Oqartussaasoq sulisumik soraarsitsinermut atatillugu allakkatigut aalajangiinissamut pisussaaffeqartoq suliassat suliarineqartarnerat pillugu inatsimmi aalajangersarneqanngilaq.

Ombudsmandilli paasinninnera unaavoq soraarsitsisoqarnissaanik aalajangiineq ima akuliuffiutigisoq aalajangiinerup innuttaasumut allakkatigut nalunaarutigineqarnera ingerlatsinermi ileqqorissaarnermut naapertuunnerpaalluni. Aalajangiineq tunngavilersuummik suliassat suliarineqartarnerat pillugu inatsimmi §§-ini 22-mi 24 -milu piumasaqaatinik eqqortitsisumik aamma imaqartariaqarpoq.


Ingerlatsinermi ileqqorissaarneq

Ingerlatsinermi ileqqorissaanermi pineqarput oqartussaasut innuttaasunik qanoq pinnittariaqarnerat pillugu malittarisassat tunngaviillu.

Ingerlatsinermi ileqqorissaarneq ilaatigut isumaqarpoq oqartussaasoq innuttaasunut inussiarnersumik mianerinnittumillu aamma oqartussaasumut tatiginninnermik sakkortusaasumik pissusilersortassassoq.

Oqartussaasoq kukkussuteqaruni innuttaasumut suliap ingerlasimanera pillugu ilisimatitsissuteqartariaqarnera utoqatsertariaqarneralu ingerlatsinermi ileqqorissaarnerup nassatarisinnaavai. Tamanna innuttaasut oqartussaasumik tatiginninnerannik sakkortusaaqataavoq.

Oqartussaasup ass. sulisoq suliami illua’tungiusutut isumaanik tusarniaavigisimanngippagu, aalajangiinnginnerminilu suliami illua’tungiusup isumaanik tusarniaasoqarsimasariaqaraluartoq kingusinnerusukkut paasiguniuk suliami illua’tungiusup isumaanik tusarniaanngitsoornerup kingunerisassaanik isummerfiginnippat tamanna ingerlatsinermi ileqqorissaanermut naapertuunnerpaassaaq. Tamatumunnga atatillugu oqartussaasoq suliap suliareqqinneqarneratigut kukkunerminik aaqqiinissaminut periarfissaqassaaq.