Misissuiartortut Inatsisartut Ombudsmandeqarfianeersut paaqqinniffimmi Puilasunnguani Paamiuniittumi maj 2023-mi misissuipput. Misissuineq Ombudsmandip ataatsimut sulineranut ilaatillugu ingerlanneqarpoq, taamaalillunilu paaqqinniffik pillugu naammagittaalliuummik aalajangersimasumik tunngaveqarani misissuinerulluni.

Ombudsmandi ataatsimut isigalugu isumaqarpoq pisortaqatigiit Puilasunnguit ingerlanneqarneranni ilisimaarinnillutik pimoorussiffivigaat najugaqartut, sulisut ilaqutaasullu unammillernartutut misigisartagaat.

Taamaattorli ombudsmandi aamma pissutsinik oqaaseqaateqarfiginninnissaminut pissutissaqarpoq. Taamaalilluni ombudsmandimit ilaatigut oqaaseqarfigineqarput Puilasunnguit pisussaaffigigaat sulisunut pissaanermik atuisarneq pillugu inatsisip assilinera tunniutissallugu, sulisullu inatsisip imaanik ilitsersorneqarsimanertik atsiornikkut uppernarsassagaat. Tamatuma saniatigut ombudsmandimit oqaaseqaateqarfigineqarput ilaatigut pulaartunik killilersuisarneq, sulisoqarniarnermi unammillernartut, pujortarneq aamma putsumik najuussuisarneq, eqqiluisaarneq, eqqiaasarneq kiisalu sammisassaqartitsineq qanilaarnerlu.

Puilasunnguit aamma Kommuneqarfik Sermersooq misissuinermi nalunaarusiaagallartoq pillugu oqaaseqaateqarput. Tamannalu tunngavigalugu Puilasunnguani misissuineq ombudsmandimit naammassineqarpoq.

Misissuinermi nalunaarusiaq uani atuarsinnaavat.

Annertunerusumik paasisaqarusukkuit: Oqarasuaat 32 78 10

TUNULIAQUTIT

Ombudsmandip misissuiartortarneri

Pisortat ingerlatsiviini naammagittaalliuutinik suliaqarnerup saniatigut ombudsmandi ukiut tamaasa suliffeqarfinni assigiinngitsuni arlalinnik misissuisarpoq, angerlarsimaffinnik innuttaasunik sivikinnerusumi sivisunerusumilluunniit najugaqartitsisunik.

Misissuiartornermi siunertaavoq suliffeqarfiit najugaqartunik paaqqinnilluarnerat aamma malittarisassat malinneqarnersut misissussallugit. Ombudmandip pulaarnermini suliffeqarfiup sulisui peqatigalugit init takusarpaat aammalu pisortaqatigiit, sulisut, najugaqartut ilaqutaasullu oqaloqatigisarlugit.

Suliffeqarfiit nalinginnaasumik siumut kalerrinneqareertarput. Aammali ombudsmandi nalunaaqqaarani pulaarsinnaasarluni.

Pulaartoqareerneratigut ombudsmandi nalunaarusiortarpoq. Tassani atuarneqarsinnaasarput ombudsmandip pulaarnermini ajornartorsiutaasinnaasut suut eqqumaffigisimanerai, aammalu qanoq suliffeqarfik allaanerusumik iliorsinnaaneranik ombudsmandi innersuussuteqartarluni.