Paaqqutarinniffimmi- Sammisassaqartitsivimmilu Ippiarsummi misissuineq
Ombudsmandip pingaarnertut paasisaa unaavoq, Ippiarsuk atorfeqarfittut akuersaarnartuuvoq pisortaqatigiillu pimoorussilluarnerat takuneqarsinnaalluni. Aamma ombudsmandip paasisaa unaavoq, pisortaqatigiit aamma sulisut kissaatigigaat ajunnginnerpaamik najugaqartunut paaqqinninnissaq isumassuinissarlu, kiisalu aamma ukkatarineqarluni sapinngisamik annertunerpaaffianiitinniarneqartoq najugaqartunut pissaanermik atuinnginnissaq.
Pissutsilli oqaseqaateqarnissamut pissutissaqalersitsisut Ombudsmandip misissuinermi nalunaarusiami aamma eqqartorpai.
Nalunaarusiami ombudsmandi ilaatigut naliliivoq, Ippiarsummi sulisut naammattumik ilisimasaqannginneri pissaanermik atuineq pillugu inatsisip malittarisassaanik allattuisussaatitaaneq aamma nalunaarutiginnittussaatitaaneq assigiin-ngitsutigut pisaanermik atuinermut atatillugu.
Ombudsmandilli paasisaa unaavoq, Ippiarsummi annertuumik pissaanermik atuineq atorneqanngitsoq. Peqatigitillugulu ombudsmandip misissuinermi paasisat aallaavigalugit tunngavigisariaqarlugu, siusinnerusukkut, aamma suli maannamut pisuni aalajangersuni pissaanermik atuiffiusarsimasoq, pissaanermik atuineq pillugu inatsimmi malittarisassat naapertorlugit kingornatigut nalunaarutigineqanngitsunik.
Tamanna ombudsmandimit isornartutut isumaqarfigineqarpoq, taamaattumillu inassuteqarpoq Ippiarsummit qulakkeerneqassasut pisut pissaanermik atuiffiusut siunissami allattorneqartalissasut nalunaarutigineqartalerlutillu pissaanermik atuineq pillugu inatsimmi malittarisassat naapertorlugit.
Misissuinermi nalunaarusiaq uani atuarsinnaavat.
Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.
TUNULIAQUTAA
Ombudsmandip misissuisarneri
Innuttaasut naammagittaalliuutaannik pisortat ingerlatsivii pillugit suliaqartarnermi saniatigut ombudsmandi ukiut tamaasa suliffeqarfiit assigiinngitsut misissuiffigisarpai, piffissami sivikinnerusumi sivisunerusumiluunniit innuttaasunik ineqartitsisut.
Misissuiartortarnerup siunertarivaa misissussallugu suliffeqarfiit najugaqartunik paaqqinnilluarnersut malittarisassat malillugit. Misissuinermi ombudsmandimit ombudsmandeqarfiullu sulisuinit init takuneqartarput pisortaqatigiit, sulisut, najugaqartut, ilaqutaasullu aamma oqaloqatigineqartarlutik.
Suliffeqarfiit nalinginnaasumik siumut ilisimatinneqareertarput. Aammali ombudsmandi nalunaaruteqaqqaarani pulaarsinnaasarluni.
Pulaartoqareernerata kingornatigut ombudsmandi nalunaarusiortarpoq. Tassani atuarneqarsinnaapput suut ajornartorsiutaasinnaasut ombudsmandip pulaarnermini eqqumaffigisimanerai, aamma ombudsmandi suliffeqarfimmut qanoq allaanerusumik iliorsinnaanermik inassuteqarsimanera.
Pissaanermik atuisarneq
Pissaanermik atuisarneq pillugu inatsit (isumaginninnermik suliassaqarfimmi pissaanermik atuineq pillugu Inatsisartut inatsisaat nr. 8, 20. juni 2022-meersoq) ilaatigut utoqqaat illuini sulisut najugaqartunut aalajangersimasunut timikkut pinngitsaaliinermik atuisinnaanerannut periarfissiivoq.
Inatsit malittarisassanik arlalinnik najugaqartunut ataqqinassusiaanngitsumik inatsiseqartitsinermilu innarlitsaaliinikkut illersorneqarsinnaasumik pineqartarnissaannik qulakkeerinneqataasumik aamma imaqarpoq. Inatsimmi soorlu makku piumasaqaataapput:
• Pissaanermik atuineq tamaallaat qaqutiguuissumik atorneqarsinnaavoq aamma isumassuinermut inuttullu perorsaaniarnermut paarlaallugu atorneqanngisaannassaaq.
• Pissaanermik atuineq sapinngisamik qajassuussisumik sapinngisamillu sivikinnerpaamik pisassaaq.
• Nangermik taarsiinermi, uffaanermi assigisaanilu aalajangiilluni tigumminninneq kommunip aalajangiinera tunngavigalugu pisassaaq.
• Kommunip aalajangiinera Isumaginninnermi Naammagittaalliuuteqartarfimmut naammagittaalliuutigineqarsinnaavoq.
• Pissaanermik atuineq sunaluunniit kommunimut Naalakkersuisunullu nalunaarutigineqartassaaq.
Pissaanermik atuisarneq pillugu inatsit www.nalunaarutit.gl-imi atuarneqarsinnaavoq.