Inatsisartut Ombudsmandianit misissuiartortut utoqqaat illuanni Ajarsivasimmi marts 2023-mi misissuipput. Misissuineq taanna ombudsmandip nalinginnaasumik suliaqartarneranut atatillugu misissuineruvoq, taamaalillunilu paaqqutarinnittarfik pillugu naammagittaalliuummik tunngaveqarani.

Ombudsmandip pingaarnertut paasisaa unaavoq, najugaqartut aamma sulisut misissuiartortunit oqaloqatigineqartut oqaatigimmassuk Ajarsivasimmiinnertik nuannaralugu. Tamatuma saniatigut ombudsmandi isumaqarpoq utoqqaat illuata ingerlanneqarnerani pisortaqatigiit suliaminnut pimoorussisuusut aamma tunniusimasuusut, kiisalu aamma najugaqartut sulisullu unammillernartutut misigisartagaat pillugit ilisimaarinnillutik.

Pulaarnermi nalunaarusiami ombudsmandip pissutsit oqaaseqaateqarnissamut pissutissaqalersitsisut oqaatigivai.

Nalunaarusiami ombudsmandip ilaatigut nalilerpaa Ajarsimavasimmi pisortaqatigiit aamma sulisut pissaanermik atuineq pillugu instsimmi malittarisassat malillugit nalunaarutiginnittarsimannginnerat aamma nalunaarsuisarsimannginnerat. Tamanna ombudsmandimit isornartutut isumaqarfigineqarpoq, inassutigineqarporlu siunissami Ajarsivimmit qulakkeerneqassasoq pisimasut pissaanermik atuiffiusut nalunaarsorneqartalissasut aammalu nalunaarutigineqarlutik pissaanermik atuineq pillugu inatsimmi malittarisassat naapertorlugit.

Tamatuma saniatigut ombudsmandi naliliivoq pisortaqatigiit aamma sulisut pissaanermik atuineq pillugu malittarisassat naammattumik ilisimasaqarfiginngikkaat.

Ilaatigut ombudsmandimit isornartorsiorneqarpoq Ajarsivasimmi eqqiluisaarnikkut pissaanermik atuisoqartarneranik, puiguttortut immikkoortoqarfianni kalerrisaarutip atorneqartarnera aamma sumiissusersiutip ataavartumik najugaqartumut aalajangersimasumut nakkutiginninnermi atorneqarnera, tamatumani qulakkeerneqaqqaarsimanani akuersissummik pereersimanissaq. Ombudsmandimit inassutigineqarpoq Ajarsivasimmi pissaanermik atuinermi inatsimmi malittarisassat malillugit pissutsit aaqqiivigineqassasut.

Misissuinermi nalunaarusiaq ugguuna atuarsinnaavat.

Annertunerusumik paasisaqarusukkuit attavissaq: Oqarasuaat 32 78 10


TUNULIAQUTAA
Ombudsmandip misissuisarneri
Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinniffinni assigiinngitsuni innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombudsmandip Ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqarajuttarput. Ombudsmandili siumut kalerreeqqaarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Tassani ajornartorsiutit suut Ombudsmandip misissuinermi maluginiarsimanerai aamma suut allatut iliorluni suliarineqarsinnaanerat Ombudsmandip paaqqinniffimmut kaammattuutigisimaneraa atuarneqarsinnaavoq.

Pissaanermik atuisarneq
Pissaanermik atuisarneq pillugu inatsit (isumaginninnermik suliaqarfimmi pissaanermik atuineq pillugu Inatsisartut inatsisaat nr. 8, 20. juni 2022-meersoq) ilaatigut utoqqaat illuini sulisut najugaqartunut aalajangersimasunut timikkut pinngitsaaliinermik atuisinnaanerannut periarfissaliivoq.

Inatsit malittarisassanik arlalinnik najugaqartunut ataqqinnissusiaanngitsumik inatsiseqartitsinermilu innarlitsaaliinikkut illersorneqarsinnaasumik pineqartarnissaannik qulakkeerinneqataasumik aamma imaqarpoq. Inatsimmi soorlu makkua piumasaqaataapput:

•    Pissaanermik atuineq qaqutiguinnaq atorneqartassaaq aamma isumassuinermut inunnillu perorsaanermik ikiuunnermut taarsiullugu atorneqanngisaannassalluni.
•    Pissaanermik atuineq pisariaqarnerpaanuinnaq killilerneqassaaq sapinngisamillu qajassuarnerpaamik sivikinnerpaamillu atorneqassalluni.
•    Nangernik taarsiinermi, uffarnermi assigisaanilluunniit aalajangiilluni tigumminninneq kommunip aalajangiinera tunngavigalugu pisassaaq.
•    Kommunip aalajangiinera Isumaginninnermi Naammagittaalliuuteqartarfimmut naammagittaalliuutigineqarsinnaavoq.
•    Pissaanermik atuineq sunaluunniit kommunimut Naalakkersuisunullu nalunaarutigineqartassaaq.

Pissaanermik atuisarneq pillugu inatsit www.nalunaarutit.gl-imi atuarneqarsinnaavoq.