Inatsisartut Ombudsmandiata oqaaseqaammi erseqqisarlugu oqaatigaa oqartussaasut suliani aalajangiiffiusuni allagaat atsiorneqarsimasussaasut, taamatuttaarlu suliamik suliarinnittup atia allakkani allanneqarsimassasoq.

Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutinik qinnuteqaatinut itigartitsissutiminik atsiuisarsimannginnera Ombudsmandip naammagittaalliuutitut suliamik suliarinninnerminut atatillugu malugaa. Atsiornermut taarsiullugu e-mailadresse Naalakkersuisoqarfiulluunniit pisortatigoortumk atia allanneqartarsimavoq.

Taamaattumik Ombudsmandi Naalakkersuisoqarfiup suliani aalajangiiffiusuni allakkaminik atsiuisarnermini suliamillu suliarinnittup atianik allakkani ilanngussisarnermini periaasianik misissuilluni aallartippoq.

Naalakkersuisoqarfiup periaasia Ombudsmandip ajuusaarnartutut isigaa. Naalak-kersuisoqarfiup Ombudsmandi nalunaarfigaa Omudsmandip oqaatigisai tusaatissatut tigugini.

Ombudsmandi oqarpoq allakkat assammik atsiorneqarsimanissaat piumasaqaataanngitsoq. Atsiorsimanissamik piumasaqaat ass. aalajangiinerup qarasaasiakkut atsiornertalerneratigut aaqqinneqarsinnaavoq. Taamaattumik atsiorsimanissamik suliamillu suliarinnittup atiata allakkani allanneqarsimanissaanik piumasaqaat inuiaqatigiinni digitaliseeriiartuinnarnermut akornutaanngilaq.

Oqartussaasut allagaasa atsiorneqartarnissaat inatsiseqartitsinikkut innarlitsaaliinermut tunngasunik arlalinnik pissuteqarpoq. Oqartussaasoq ilaatigut sulinermi akisussaaffimmik inissiisinnaasussaassaaq, taamatuttaarlu atsiorneq missingiutip aalajangiinerullu assigiinngissutaannik takutitseriaasiulluni. Suliaq sulisumit suliamik suliarinninnermi peqataasinnaassuseqanngitsumit suliarineqarsimanersoq takusinnaanissaanut innuttaasoq aamma periarfissaqassaaq. Sulisoq suliamik suliarinninnermi peqataasinnaassuseqanngikkuni suliap suliarineqarnerani peqataaqqusaanngilluinnarpoq.

Ombudsmandip Naalakkersuisoqarfiit kommunillu tamaasa suliamik ilisimatippai, atsiorsimanissamimmi suliamillu suliarinnittup atiata allakkani taaneqarsimanis-saanik piumasaqaatit pisortat aqutsiveqarfiini oqartussaasunut tamanut atuummata.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.