Ombudsmandi oqaaseqaammi nutaami eqikkaalluni inerniliivoq Kommuneqarfik Sermersooq sulisup isimigut suliaritinneranut aningaasartuutinik akiliinissaminut inatsisikkut tunngavissaqanngitsoq.

Taamattumik kommunip akiliisimanera Ombudsmandip isornartorsiorpaa.

Kommuni pisortani sulisitsisutut kommunillu piginnaatinneqarnerat tunngavigalugu sulisumi ajunngitsorsiaannut aningaasartuutinik aalajangersimasumik annertussusilimmik akiliisinnaavoq.

Ombudsmandili suliamili pineqartumi isumaqarpoq sulisup suliaritinneranut aningaasartuutinik akiliineq Kommuneqarfik Sermersuumi sulisunut nalinginnaasumik ajunngitsorsiassaanngitsoq, suliffeqarnermulluunniit tunngasut ataatsimut isigalugit sulisunut nalinginnaasumik ajunngitsorsiassaanngitsoq.

Taamaattumik Ombudsmandi naliliivoq kommuni aningaasartuutinik inatsisikkut tunngavissaqarani akiliinermigut inummut ataatsimut iluaqutissarsisitsisimasoq.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Kommunit piginnaatinneqarnerat

Kommunit piginnaatinneqarnerat tassaavoq malittarisassanut inatsisikkut aalajangersagaanngitsunut allassimanngitsunullu kommunit inatsisikkut tunngavissavimmik peqanngikkaluarlutik aningaasaqarnikkut aalajangersimasutigut iliuuseqarsinnaanerinut aalajangersaaviginnittunut taaguut.

Kommuni inunnut ataasiakkaanut inatsisikkut tunngavissaqarani tapiissutinik kommunit piginnaatinneqarnerat tunngavigalugu aallaavittut tunniussisinnaanngilaq.

Tassani atuutinngitsut arlaqarput, soorlu kommunimi sulisut ajunngitsorsiaat pi-neqartillugit. Sulisut ajunngitsorsiaat pineqartut suliffeqarnermut tunngasut ataatsimut isigalugit nalinginnaasuunersut ilaatigut pingaartillugu isiginiarneqartarpoq.

Tunniunneqartartut taamaattut sulisoqatigiinnut tamarmiusunut sulisoqatigiikkuutaanulluunniit erseqqissumik killilerneqarsimasunut atuuppata kommuni atorfeqartitaasut atugarissaarnerannik kommuninik piginnaatitsineq tunngavigalugu nalinginnaasumik isumaginnissinnaavoq. Taamaaliorneq tassaasinnaavoq aviisinik pisartagaqartitsineq, oqarasuaateqartitsineq imaluunniit timigissartarfimmi ilaasortaanermut akiliussineq.

Kommuni kommunip sulisitsisutut soqutigisai siuarsarniarlugit aningaasanik suli-sunut ajunngitsorsiassatut kommuninik piginnaatitsineq tunngavigalugu tapersiisinnaavoq. Saneqqutsinermut tassunga atatillugu tunniunneqartartut ataasiakkaat eqqarsaatigalugit missingiussinikkut naliliisoqartartussaavoq, tassanilu aningaasartuutaasut sulisitsisup soqutigisaata sakkortussusianut sanilliullugit naapertuuttuussapput. Tunniunneqartut tamatumunnga peqatigitillugu sulianut at-tuumassuteqartut tunngavigalugit tunniunneqartassapput. Taakku tassaasinnaapput angerlarsimaffimmi angallattakkamik qarasaasiaqartitsilluni aaqqissuussinerit.