Ombudsmandsmandi eqikkaalluni inerniliivoq Kommuneqarfik Sermersooq kommunimi sulisut feriami akiliunneqarlutik angalanerinut aningaasartuutinik akiliinissaminut inatsisikkut tunngavissaqanngitsoq.

Taamattumik taamatut akiliisoqarsimanera Ombudsmandip isornartorsiorpaa.

Kommuni pisortani sulisitsisutut feriami akiliunneqarluni angalanernut aningaasartuutinik akiliisinnaanngilaq. Ombudsmandip paasinninnera unaavoq aalajangiisuusoq tassaasoq kommunip qullersaqarfiani sulisut pisortanut ataatsimut isumaqatigiissut feriami akiliunneqarluni angalasarnerit pillugit apeqqummik aalajangersaaviginnereersoq tunngavigalugu atorfinitsinneqarsimanersut.

Ombudsmandi isumaqarpoq kommunip qullersaqarfimmini sulisumi feriami akiliunneqarlutik ukiumoortumik angalanerinut aningaasartuutinik akiliisarnera inatsisikkut tunngavissaqarani aningaasaartuuteqarnerusoq, taamaalillunilu kommunip aningaasat inatsisikkut taamaaliornissaminut tunngasvissaqarani kommunip qullersaqarfiani sulisunik iluaqutissarsitsinermut atorsimagai.

Ombudsmandip suliamik suliarinninnerani kommunip oqaatigaa kommunip qullersaqarfiani sulisut inoqutaasalu, meeqqat angerlarsimaffimmi najugaqartut suli 18-iliisimanngitsut ilanngullugit, feriami akiliunneqarlutik ukiumoortumik angalatinneqartarnerinut inatsisikkut tunngavissaqanngitsoq takuneqarsinnaasoq. Taamaattumik sulisut feriami akiliunneqarlutik isumaqatigiissutit atuuttut tunngavi-galugit taamatut angalasinnaatitaanngitsut feriami akiliunneqarlutik angalatinneqartarnerinik atorunnaarsitsiortorneq kommunip 2022-mi oktoberip naanerani aallartisarsimavaa.

Paasinninneq taanna Ombudsmandip isumaqatigaa. Ombudsmandip oqaatigaa periaaseq inatsisikkut tunngavissaqanngitsoq taamaattoq atorunnaarsinneqassappat kommunip sulisoqatigiikkuutaanut pineqartunut siumoortumik ilimasaaruteqarnissaa pisariaqanngitsoq.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.