Kommunip utoqqarnik paaqqinniffiutaani Utoqqaat Illuanni Nuummiittumi misissuineq Inatsisartut Ombudsmandiannit misissuiartortut august 2020-mi ingerlappaat.

Ombudsmandip pingaarnerusutigut paasisaa unaavoq Utoqqaat Illuata sinaakkutassat najugaqartunut toqqissisimanartut neqeroorutigigai. Ombudsmandip tamatuma saniatigut paasinninnera unaavoq Utoqqaat Illuanni pisortaqatigiit sulisullu suliatik pikkoriffigigaat, suliarlu najugaqartut ataqqillugit ingerlakkaat.

Misissuiartortut misissuinermi paasitinneqarput sulisussaaleqisoqartoq, piffissallu ilaanni napparsimallutik sulinngitsoortartut amerlaqisut, tamannalu sulisut suliaminnik ingerlatsinissaminnut periarfissaannut sunniuteqartartoq. Pissutsit taakku paaqqinniffiup pisortaqatigiivinut ingerlatsiviullu sinniisaanut misissuinermi oqaloqatiginnissutigineqarput.

Ombudsmandi paaqqinniffiup aaqqissugaanera aamma paaqqinniffiup immikkoortortaqarfinni nakorsaatinik toqqortarinninnera pillugit oqaaseqaatiminik misissuinermi saqqummiussivoq.

Pissutsit misissuineq pillugu nalunaarusiami uparuarneqartut aaqqinniarlugit suliniutit misissuinerup kingornatigut aallartinneqareersimasut suliniutissatullu eqqarsaatigineqartut Kommuneqarfik Sermersuup nalunaarusiamut missingiut pillugu oqaaseqaatimini nassuiarpai.

Utoqqaat Illuanni misissuineq pillugu suliaq Kommuneqarfik Sermersuup oqaaseqaatai tunngavigalugit Ombudsmandip tamatuma kingornatigut inaarlugu suliarineqartutut isigaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.


TUNULIAQUTAA

Ombudsmandip misissuineri

Ombudsmandi innuttaasut pisortat ingerlatsinerat pillugu naammagittaalliuutaannik suliarinninnerup saniatigut paaqqinniffinni assigiinngitsuni innuttaasunut piffissami sivikinnerusumi sivisunerusumiluunniit angerlarsimaffiisut atorneqartuni misissuinernik arlalinnik ukiut tamaasa ingerlatsisarpoq.

Misissuinerit siunertaat tassaavoq paaqqinniffiit najugaqartunik ajunngitsumik pinninnersut malittarisassanillu malinninnersut misissussallugu. Init Ombudsmandip Ombudsmandeqarfimmilu sulisut misissuinermi misissuataartarpaat, peqatigitillugulu pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit misissuineq sioqqullugu kalerrinneqareerajuttarput. Ombudsmandili aamma kalerreeqqarani misissuisinnaavoq.

Ombudsmandi misissuinerup kingornatigut nalunaarusiortarpoq. Tassani ajornartorsiutit suut Ombudsmandip misissuinermi maluginiarsimanerai allatullu iliuuserineqarsinnaasut suut kaammattuutigisimanerai atuarneqarsinnaasarpoq.