Utoqqaat illuanni Nanortalimmiittumi misissuineq Inatsisartut Ombudsmandeqarfiannit misissuiartortunit 2021-mi majimi ingerlanneqarpoq. Misissuineq taanna Ombudsmandip ataatsimut sulineranut ilaatillugu ingerlanneqarpoq, taamaalillunilu naammagittaalliuummik aalajangersimasumik tunngaveqarani misissuinerulluni.

Ombudsmandip pingaarnertut paasisaa unaavoq utoqqaat illuat najugaqartunut avatangiisinik toqqissisimanartunik neqerooruteqarfiusoq, utoqqaallu illuanni pisortaqatigiit sulisullu najugaqartunut timikkut pissaanermik annertunerpaatigut atuinaveersaarnissaq eqqumaffigigaat, pissaanermillu qaqutiguinnaq atuisoqartartoq.

Sulisut suliassaminnik aallussilluartuusorinarlutillu isumassuilluartuusorinarput. Najugaqartut misissuiartortunit oqaloqatigineqartut utoqqaat illuani najugaqarnertik pingaarunerusutigut nuannaralugu sulisunillu pitsaasumik pineqarlutik oqaatigaat.

Ombudsmandilli pissutsit oqaaseqaateqarnissamut pissutissaqalersitsisut misissuineq pillugu nalunaarusiami aamma eqqartorpai, taamatuttaarlu pisoq ataaseq najugaqartup piumanngikkaluartup najugaqartussatut tiguneqarsimaneranut tunngasoq suliami allami suliariniarlugu Ombudsmandi aalajangerluni.

Utoqqaat illuata pissaanermik atuinermik ataatsimik Ombudsmandeqarfiup misissuinera qaammatip ataatsip missaanik sioqqullugu pisimasumik nalunaarsuisimannginnera nalunaarutiginnissimannginneralu Ombudsmandip nalunaarusiami isornartorsiorpaa.

Pissaanermik atuinerit nalunaarsorneqartarnerat pillugu malittarisassat atuartitsissutigineqarsimanerat kiisalu sulisut pisortaqatigiillu najugaqartumut pissaanermik atuineq pisariaqartikkunikku sumut saaffiginninnissartik massakkut nalunngikkaat Ombudsmandip tamatumunnga peqatigitillugu maluginiarpaa.

Pisoq utoqqaat illuata najugaqartup savianik ukusartumik arsaarinniffigisimasaa Ombudsmandip nalunaarusiami aamma eqqartorpaa. Ombudsmandip oqaaseqaatai utoqqaat illuata qanoq iliuuseqarnissaanut pissutissaqalersitsinerat malitseqartitsiveqqullugu Ombudsmandip utoqqaat illuat qinnuigaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

TUNULIAQUTAA

Ombudsmandip misissuisarneri

Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinniffinnik assigiinngitsunik innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombudsmandip Ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili siumut kalerreeqqarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Ajornartorsiutit suut Ombudsmandip misissuinermi maluginiarsimanerai aamma suut allatut iliorluni suliarineqarsinnaanerat Ombudsmandip kaammattuutigisimaneraa tassani atuarneqarsinnaapput.