Nanortalimmi Qaqortumilu innuttaasut Inatsisartut Ombudsmandiata sulisuinik oqaloqateqarnissaminnut maj 2021-mi periarfissaqassapput. Illit innuttaasutut sutigut pisinnaatitaaffeqarnerit kommunilu naapikkukku suut eqqumaffigissaneritit naatsumik aallaqqaasiisoqassaaq. Taamatuttaaq Nanortalimmi Qaqortumilu innuttaasut Ombudsmandip sulinera pillugu annertunerusumik paasisaqarsinnaapput Ombudsmandimullu naammagittaalliornissamut periarfissat pillugit ilitsersorneqarsinnaallutik.

Kikkulluunniit ornigullutik Ombudsmandip sulisuinik oqaloqatiginninnissaminnut tikilluaqqusaapput. Suliaq aalajangersimasoq Ombudsmandip sulisuinut oqaloqatiginnissutiginiaraanni oqartussaasut suliaq pillugu allagarisimasaannik nassataqarneq iluaqutaassaaq. Inuk alla sinnerlugu naammagittaallioruit taassuma piginnaatitsissutaanik pissarsinissat eqqaamassavat.

Ombudsmandip sulisui piffissani ukunani naapinneqarsinnaapput:

Qaqotumi: Sisamanngornermi 6. maj 2021-mi Katersortarfimmi nal. 09:00-mit 11:00-mut

Nanortalimmi: Sisamanngornermi 13. maj 2021-mi katersortarfimmi Qujanartip Illuani nal. nal 15:00-imit 17:00-imut

OMBUDSMANDI SUTIGUT IKIUUSSINNAAVA?

Kalaallit Nunaanni Namminersorlutik Oqartussat kommunillu ataanni pisortat ingerlatsiviat pillugu naammagittaalliuutit Ombudsmandip suliarisinnaavai. Greenland Business A/S aamma INI A/S pillugu naammagittaalliuutit Ombudsmandip pisuni aalajangersimasuni suliarisinnaavai. Ombudsmandilli soorlu eqqartuussiviit, politiit pinerluuteqarsimasunilluunniit isumaginnittoqarfik pillugu naammagittaalliuutit suliarisinnaanngilai.

Pisortat aalajangiineri, soorlu pisortanit ikiorsiissutinik, aalisarsinnaanermut akuersissutinik imaluunniit allagaatinik paasitinneqarumanermik itigartitsinerit aamma oqartussaasut pissusilersorneri, soorlu ataqqinninngitsumik nikaginnippalaartumilluunniit oqalunneri, naammagittaalliuutigineqarsinnaapput. O-qartussaasoq suliamik suliarinninnerminik sivitsuloorussivallaarpat innuttaasulluunniit saaffiginnissutaanut akissuteqarneq ajorpat Ombudsmandi aamma naammagittaalliorfigineqarsinnaavoq.

Suliami allamut naammagittaalliornissamut periarfissaqarpat tamanna Ombudsmandimut naammagittaalliunnginnermi atorneqareersimassaaq.

Naammagittaalliuut pisup naammagittaalliuutigineqartup pineranit ukioq ataaseq qaangiutsinnagu Ombudsmandimut tunniunneqassaaq.