Kommunip suliamik siusinaartumik pensionisiat aningaasartaannik naatsorsuinermut tunngasumik suliarinninnini sivitsuloorupallaarpaa. Ombudsmandi oqaaseqaammi nutaami taamatut eqikkaalluni inerniliivoq.

Siusinaartumik pensionisiat aningaasartaasa amerlassusissaat pillugu aalajangiineq innuttaasup Qaasuitsup Kommunianit 2015-imi novemberimi tiguaa. Qaasuitsup Kommuniata aalajangiinera innuttaasup Isumaginninnermi Naammagittaalliuuteqartarfimmut 2015-imi decemberimi naammagittaalliuutigaa.

Siusinaartumik pensionisiat aningaasartaasa amerlassusissaat kommunip kukkusumik tunngaveqarluni naatsorsorsimagai Isumaginninnermi Naammagittaalliuuteqartarfik 2017-imi julimi aalajangiivoq. Taamaattumik suliaq Naammagittaalliuuteqartarfiup suliareqqitassanngorlugu kommunimut utertippaa.

Isumaginninnermili Naammagittaalliuuteqartarfiup aalajangiinera Qaasuitsup Kommuniata nalunaarsunngitsoorpaa, taamaattumillu suliamik suliarinninneq aallartinngitsoorlugu – Isumaginninnermi Naammagittaalliuuteqartarfiup aalajangiinerata assilinera innuttaasup nammineq kommunimut qaammatit arlallit qaangiuttut tunniuppaa – aalajangiinerli aamma tassani kukkusumik nalunaarsorneqarpoq.

Kommuni Qeqertallip – Qaasuitsup Kommuniata 1. januar 2018-imi avinneqarnerata kingornatigut suliamik tigusisup – suliamik suliarinneq aatsaat 2019-imi januarimi aallartippaa.

Kommunip nalunaarsuinera piffissarlu suliamik suliarinninnermut atugaa iluarinanngitsut Kommuni Qeqertallip Ombudsmandimut oqaatigaa.

Ombudsmandip inerniliilluni aamma oqaatigaa piffissaq suliamik suliarinninnermut atorneqartoq sivisuallaarsimasoq. Taamaattumik Ombudsmandi isumaqarpoq tamanna isorisariaqartuusoq.

Ombudsmandip ilaatigut makku pingaartillugit isiginiarpai, tassalu suliaq innuttaasumut tunngasoq suliareqqitassanngorluni utertinneqarnermi kingornatigut katillugit ukioq ataaseq affarlu suliarineqarsimasoq, suliarlu pisariuvissuunngitsoq Kommuni Qeqertallip pilertornerujussuarmik suliarisinnaasariaqarsimasaa pineqartoq.

Ombudsmandip aammattaaq oqaatigaa oqartussaasut allagaatinik nalunaarsuinissamut pisussaaffeqarnerat inatsisikkut ataatsimut aalajangersagaanngitsoq. Suliamili matumani nalunaarsuinermi kukkussuteqarneq piffissap suliamik suliarinninnermut atorneqartup annertuumik sivitsorneranik nassataqarsimavoq.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.

Piffissaq suliamik suliarinninnermut atorneqartoq qaqugukkut sivisuallaalertarpa?

Piffissaq suliamik suliarinninnermut atorneqartoq qanoq sivisutigisoq pisortani oqartussaasup atussagaa ataatsimut malittarisassanik peqanngilaq. Naatsumilli oqaatigalugu ingerlatsinermi ileqqorissaarnerup manna nassataraa, tassalu suliat sapinngisamik pilertornerpaamik illersorneqarsinnaasumillu suliarineqartassasut.

Suliaq pisariaqarneratut pilertortigisumik suliarineqarsimanersoq apeqqummi suliap suussusia, oqartussaasup suliani tassunga assingusuni piffissaq suliarinninnermut atortagaa nalinginnaasoq, suliap pisariussusia, suliami ingerlaavartumik iliuuserineqartut kiisalu suliaq paasissutissartalersorniarlugu suliamik suliarinninnermi iliuutsit piffissartornartut iliuuserineqassanersut ilaatigut apeqqutaavoq.

Ingerlatsinermi oqartussaasut nalunaarsuisarnerat pillugu malittarisassaqarpa?

Ingerlatsinermi oqartussaasut allagaatinik nalunaarsuisarnissaq pillugu inatsisikkut ataatsimut aalajangersagaasumik pisussaaffiligaanngillat. Mannali ingerlatsinermi ileqqorissaarnerup nassataraa, tassalu allagaatit ingerlatsinermi oqartussaasup sulinerminut atatillugu aqutsinermi allaffissornikkut sulianik suliarinninnermut ilaatillugu tigusai nassiussaalu nalunaarsorneqartassasut, allagaatit taakku suliamut sulialluunniit allatigut suliarineqarneranut pingaaruteqarpata.

Eqqortumik nalunaarsuineq oqartussaasup eqqaasitseriaatsinik naammattumik pitsaassuseqartunik suliat puigorneqartannginnissaannik oqartussaasullu saaffiginnissutinut tigusaminnut malitseqartitsiviginnittarnissaannik qulakkeerisunik pilersitsisinnaaneranut tunngaviugajuttartussaavoq.