Inatsisartut Ombudsmandiata ukiumoortumik nalunaarutaa 2018-imit atuutilersumik allanngortinneqarpoq, taamaalillutik suliat aamma misissuinerit pillugit nalunaarusiat tamanut saqqummiunneqartut ukiumoortumik nalunaarummi tamarmiutillugit ilanngunneqartarunnaarlutik.

Misissuinerit pillugit nalunaarusiat suliallu tamanut saqqummiunneqartut eqikkarneqarneri ukiumoortumik nalunaarummi ilanngunneqartassapput. Misissuinerit pillugit nalunaarusiat suliallu naalisarneqaratik Ombudsmandip nittartagaatigut www.ombudsmandi.gl-ikkut tamanut massakkut saqqummiunneqartarput.

Inatsisartut Ombudsmandiata nittartagaq naleqqussarsimavaa, Ombudsmandeqarfiup suliaatai misissuinerillu pillugit nalunaarusiat tamanut saqqummiunneqarsimasut qulequttani ‘Suliat’ aamma ‘Misissuinerit pillugit nalunaarusiat’ iserfigiuminartumik takussutissiartalerlugit.

Ombudsmandip oqartussaasoq pisut ilaanni qinnuigisarpaa suliamut imaluunniit misissuineq pillugu nalunaarusiamut malitseqartitseqqullugu. Oqartussaasup akissutaa Ombudsmandip tigugaangagu suliarereeraangagulu akissut nittartakkami suliamut misissuinerluunniit pillugu nalunaarusiamut pineqartumut ilanngunneqartarpoq.

Paasissutissat amerlanerusut uani pissarsiarineqarsinnaapput: Oqarasuaat nr. 32 78 10.

TUNULIAQUTAA

Suliat tamanut saqqummiunneqartut

Innuttaasut il.il. pisortat ingerlatsinerat pillugu naammagittaalliuutaat Ombudsmandip suliarisarpai, aammali suliamik misissuisoqarnissaa nammineq suliniutigisinnaallugu (nammineerluni misissuiffiginninnermik taaneqartartoq). Ombudsmandip suliat allakkatigoortumik suliarisarpai, taamaattumillu oqaaseqaatini suliami allagaatinik, oqartussaasut oqaaseqaataannik innuttaasullu oqaatigisaannik tunngaveqartittarlugit.

Ukiut tamaasa Ombudsmandip suliat suliarisimasani arlallit tamanut saqqummiuttarpai.

Misissuinerit pillugit nalunaarusiat

Ombudsmandi paaqqinniffinnik assigiinngitsunik innuttaasut piffissami sivikinnerusumi sivisunerusumiluunniit najugaqarfigisartagaannik arlalinnik ukiut tamaasa misissuisarpoq. Ombudsmandip soorlu pisortat utoqqarnik, inunnik innarluutilinnik kiisalu meeqqanik inuusuttunillu paaqqinniffiutaat misissortarpai. Ombudsmandip paaqqinniffiit namminersortut meeqqat inuusuttullu eqqarsaatigalugit suliassanik isumagisaqartut aamma misissorsinnaavai.

Ombudsmandi misissuinerit kingornatigut nalunaarusiortarpoq. Ajornartorsiutit suut Ombudsmandip misissuinermi maluginiarsimanerai paaqqinniffiullu allatut iliuuseqarnissaanik kaammattuutigisimasinnaasai nalunaarusiani taakkunani atuarneqarsinnaapput.

Ombudsmandi misissuinernik suliaqarnini tunngavigalugu misissuinerit pillugit nalunaarusianik arlalinnik ukiut tamaasa tamanut saqqummiussisarpoq.