Kommunimi inuuniarnermut ikiorsiissutitut taaneqartartut aningaasartaasa tunaartarisassatut amerlassusii Kommuneqarfik Sermersuup ikililerniarai Nuuk Ugeavis 2014-imi allappoq. Ombudsmandi oqaaseqaammi nutaami isumaqarpoq innuttaasup inuuniarnermut ikiorsiissutisiaanik innuttaasoq tamanna pillugu aalajangiinermik ilisimatinnagu Kommuneqarfik Sermersuup ikililerisimanera isorisarialerujussuusoq. Ombudsmandi aamma isumaqarpoq kommunip aalajangiinerata Isumaginninnermi Naammagittaalliuuteqartarfimmit 2017-imi aalajangiusimaneqarsimanera isorisarialerujussuusoq.

“Ingerlatsivik tusagassiorfiit aqqutigalugit aalajangiisinnaanngilaq. Ingerlatsivik innuttaasumut tunngasumik aalajangiiguni aalajangiineq innuttaasumut toqqartumik nalunaarutigisussaavaa. Taamaaliortoqanngippat aalajangiineq imarisamisut sunniuteqartinneqarsinnaanngilaq. Aalajangiinerup imarisaanik innuttaasup allatut iliorluni paasisaqarnera tassani apeqqutaanngilaq”, Inatsisartut Ombudsmandiat Vera Leth taamatut oqarpoq.

Ikililerineq tassaavoq aalajangiineq innuttaasumut nalunaarutigineqartussaq

Innuttaasut inuuniarnermut ikiorsiissutisiarisinnaasaannut aningaasartat tunaartarisassatut amerlassusiat Kommuneqarfik Sermersuup 1. januar 2015-imi ikililerpai. Ikililerineq taanna Nuuk Ugeavisimi 2014-ip naalernerani eqqartorneqarpoq.

Innuttaasup inuuniarnermut ikiorsiissutit Kommuneqarfik Sermersuumit tigusartakkami ikililerneqarsimanerat Ombudsmandimut 2015-imi januarimi naammagittaalliuutigaa. Innuttaasup ikililerinermik ilisimatinneqarsimannginnini aamma naammagittaalliuutigaa.

Naammagittaalliuut Ombudsmandip Isumaginninnermi Naammagittaalliuuteqartarfimmut ingerlateqqillugu nassiuppaa, Naammagittaalliuuteqartarfillu suliami 2017-imi aalajangiivoq. Kommunip aalajangiinera Naammagittaalliuuteqartarfiup aalajangiusimavaa.

Aalajangiinerup assilinera Isumaginninnermi Naammagittaalliuuteqartarfiup Ombudsmandimut nassiuppaa, Ombudsmandillu Kommuneqarfik Sermersuup aamma Isumaginninnermi Naammagittaalliuuteqartarfiup suliamik suliarinninnerannik nammineerluni misissuiffiginninneq tamatuma kingornatigut aallartippaa.

Ombudsmandi misissuinini tunngavigalugu isumaqarpoq innuttaasup inuuniarnermut ikiorsiissutisiaanik 2015-imi januarimi ikililerineq suliassat suliarineqartarnerat pillugu inatsimmi aalajangiinermik oqartarnertut aalajangiinerusoq. Taamaattumik aalajangiineq imarisamisut sunniuteqarsinnaassaguni innuttaasumut nalunaarutigineqartussaavoq. Innuttaasorli ikililerineq pillugu aalajangiinermik oqaasiinnartigut allakkatigulluunniit tigusaqarsimanngilaq.

Ombudsmandi tamanna tunngavigalugu eqikkaalluni inerniliivoq innuttaasup inuuniarnermut ikiorsiissutisiaanik Kommuneqarfik Sermersuup 2015-imi januarimi atuutilersumik ikililerinera inatsiseqartitsinermut atuuttumut naapertuuttuusimanngitsoq. Ombudsmandip eqikkaalluni inerniliinermini nangilluni oqaatigaa Isumaginninnermi Naammagittaalliuuteqartarfiup kommunip aalajangiineranik 2017-imi aalajangiusimannissimanera inatsiseqartitsinermut atuuttumut aamma naapertuuttuusimanngitsoq.

Suliaq pillugu oqaaseqaataagallartoq Ombudsmandip Kommuneqarfik Sermersuumut aamma Isumaginninnermi Naammagittaalliuuteqartarfimmut 2019-imi oktoberimi nassiuppaa. Naammagittaalliuuteqartarfiup Ombudsmandi tamatuma kingornatigut nalunaarfigaa suliaq suliareqqinniarini.

Ombudsmandip suliaq pillugu inaarutaasumik oqaaseqaanni Kommuneqarfik Sermersuumut aamma Isumaginninnermi Naammagittaalliuuteqartarfimmut 3. december 2019-imi nassiuppaa. Suliarli Ombudsmandip suli malinnaaffigaa, Isumaginninnermillu Naammagittaalliuuteqartarfiup nutaamik aalajangiinissaa massakkut utaqqimaarlugu.

Ombudsmandip oqaaseqaataa uani atuarsinnaavat.

Paasissutissat amerlanerusut uani pissarsiarineqarsinnaapput: Oqarasuaat nr. 32 78 10.