Innuttaasoq siusinaartumik pensionisiaqalerumalluni kommunimut qinnuteqaateqarpoq. Suliap suliarineqarnera sivitsuloorunneqarpoq, innuttaasorlu Ombudsmandimut naammagittaalliorpoq.

Ombudsmandi oqaaseqaammi nutaami eqikkaalluni inerniliivoq kommunip innuttaasoq suliap ingerlaneranik amigartumik ilisimatittarsimagaa.

Kommunip piffissaq suliamik suliarinninnermut atorneqartussatut naatsorsuutigineqartoq suliap suliarineqarnerata ingerlanerani innuttaasumut nalunaarutigisimavaa. Kommunilli naatsorsuutigisai eqquutinngillat. Innuttaasup akissuteqartoqarnissaanik nukingisaarutaanut akissutitut kommunip oqaatigaa suliaq 2017-imi februarimi suliarineqarniartoq, suliamili aalajangiineq innuttaasup aatsaat 2017-imi novemberimi tiguaa.

Ombudsmandi tamanna tunngavigalugu oqaaseqaammi ilaatigut allappoq piffissap suliamik suliarinninnermut atorneqartussatut innuttaasumut neriorsuutigineqartup eqqortuunnginnerata paasineqarnera kommunip innuttaasumut nalunaarutigisimasariaqaraluaraa.

Ombudsmandip oqaaseqaataa uani atuarsinnaavat.

Paasissutissat amerlanerusut uani pissarsiarineqarsinnaapput: Oqarasuaat nr. 32 78 10.

Malittarisassani qanoq aalajangersaasoqarpa?

Suliassat suliarineqartarnerat pillugu inatsit inatsisilluunniit allat tassunnga attuumassuteqartut suliaq siusinaartumik pensionisiaqalerumalluni qinnuteqaammut tunngasoq sivitsuloorunneqarpat ingerlatsiviup innuttaasoq qaqugukkut attaveqarfigissagaa malittarisassanik imaqanngillat.

Mannali nalinginnaasumik ilimagineqarpoq, tassalu suliani ingerlatsiviup suliarisaani illua’tungiusut ingerlatsiviup pisuni arlalinni ilisimatittarpagit tamanna ingerlatsinermi ileqqorissaarnermut naapertuunnerpaajusoq. Tamanna Kalaallit Nunaanni Namminersornerullutik Oqartussani Inatsisileriffiup suliassat suliarineqartarnerat pillugu inatsisit pillugu ilitsersuusiaani 1994-imi decemberimi saqqummersinneqartumi ilaatigut allaaserineqarpoq, tassanngalu makku erserput:

“205. Ingerlatsinermut oqartussaasup suliassap suussusia pissutigalugu imaluunniit oqartussaaffimmi tassani nalinginnaasumik suliarineqartarnerat pissutigalugu suliassaq tiguneraniit piffissap sivikinnerusup iluani aalajangiivigisinnaanngikkuniuk oqartussaaffiup suliassamut tunngassuteqartoq nalunaarfigisariaqarpaa suliassap qanoq inissisimaneranik aammalu ajornanngippat paasissutissillugu suliassap qaqugu aalajangiivigineqarnissaa oqartussaaffimmit naatsorsuutigineqarnersoq.

206. Oqartussaaffiup aammattaaq suliassamut tunngassuteqartoq ilisimatittariaqarpaa suliassaq sivikinnerusumik suliarineqartussaagaluaq immikkut pissuteqartumik pisarnermit sivisunerusumik suliarineqartariaqalerpat.

207. Suliamut tunngassuteqartumit allakkat nukingisaarutit suliassallu suliarineqarnerani piffissamik atorneqartumik naleqquttumik tunngavilersukkat ingerlaannartumik akineqartariaqarput. Akissuteqaammi ilisimatitsissutigineqartariaqarpoq suliassaq qanoq inissisimanersoq aammalu ajornanngippat ilisimatitsissutigineqarluni suliassap aalajangiivigineqarnissaa oqartussaaffiup qaqugu naatsorsuutigineraa.”