Suliamik suliarinninnermi kukkunerit annertuut aamma piffissap suliamik suliarinninnermut atorneqartup sivisussusianik paasinninnginneq suliani angajoqqaat meeqqallu akornanni pissutsinut tunngasuni aalajangiisuusumik sunniuteqarput. Ombudsmandip oqaaseqaataani nutaami oqaatigineqarpoq taakku tassaasut suliami meeqqamut tunngasumi piffissap suliamik suliarinninnermut atorneqartup taama sivisutigineranut nassuiaatissat ilaat.

Angajoqqaap meeqqani 12-inik ukioqartoq angerlarsimaffiup avataanut akuersisitsinani inissinneqarsimasoq angerlartikkumallugu Qaasuitsup Kommunianut 2013-imi qinnutigaa. Aatsaat ukiut tallimat sinnerlugit qaangiutereersut – meeqqap 18-iliinngitsiarnerani – Avannaata Kommunia aalajangiivoq meeraq angerlartinneqarsinnaanngitsoq.

Ombudsmandi suliaq pillugu oqaaseqaammini eqikkaalluni inerniliivoq piffissaq pissutissaqanngilluinnartumik sivisooq isorisariaqarluinnartorlu pineqartoq.

Ombudsmandi oqaaseqaammi ilaatigut imatut allappoq:

“Uanga paasinninnera unaavoq suliami matumanisut ittumi angajoqqaatut oqartussaassutsimik tigummiaqartup meeqqami akuersisitsilluni inissinneqarsimasup angerlartinneqarnissaanik qinnuteqarfigisaani qinnutigisaq akuerineqarsinnaanersoq kommunip sapaatit akunnerisa arlallit sivisunerpaamilluunniit qaammatialunnguit ingerlaneranni isummerfigisariaqaraa.”

Ombudsmandi eqikkaalluni aammattaaq inerniliivoq suliami annertuumik sunniuteqartunik kukkussuteqartoqarsimallunilu sumiginnaasoqarsimasoq. Taamaattumik Ombudsmandip Inatsisartut Inatsisinut Ataatsimiititaliaat kommunalbestyrelsilu suliamik Ombudsmandi pillugu inatsimmi § 23 tunngavigalugu nalunaaruteqarfigai.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.


Meeqqanik inissinneqarsimasunik angerlartitsisarneq pillugu malittarisassat

Meeqqamut angerlarsimaffiup avataanut inissinneqarsimasumut angajoqqaatut oqartussaassutsimik tigummiaqartup meeraq angerlartikkusukkini kommunimut nalunaarutigippagu qinnutigisaq akuersaarneqarsinnaanersoq kommunip isummerfigissavaa.

Meeqqanik inissiisarneq angerlartitsisarnerlu pillugit malittarisassat 1. juli 2017-ip siornatigut meeqqanik inuusuttunillu ikiorsiisarneq pillugu Inatsisartut peqqussutaatigut (matuma kingornatigut meeqqat pillugit peqqussummik taaneqartartussakkut) nr. 1-ikkut, 15. april 2003-meersukkut aalajangersarneqarsimapput. Avannaata Kommunia suliami matumani 2018-imi decemberimi aalajangiimmat meeqqat pillugit peqqussut meeqqat tapersersorneqarnissaat pillugu inatsimmit (matuma kingornatigut meeqqanik tapersersuisarneq pillugu inatsimmik taaneqartartussamit) nr. 20-mit, 26. juni 2017-imeersumit massakkut atuuttumit taarserneqarsimavoq.

Meeqqanik tapersersuisarneq pillugu inatsimmi § 40, imm. 1-ikkut 2-kkullu aalajangersarneqarpoq angerlarsimaffiup avataanut inissiinerup siunertaa anguneqarpat inuusuttuararluunniit 18-inik ukioqalerpat inissiineq unitsinneqassasoq.

Angerlarsimaffiup avataani inissiineq unitsinneqassanersoq kommuni aalajangisinnaalersinnagu pissutsit arlallit kommunip misissussagai meeqqanik tapersersuisarneq pillugu inatsisikkut aalajangersarneqarpoq.

Meeqqap pisariaqartitai angajoqqaatut oqartussaassutsimik tigummiaqartup (pisariaqarpat meeqqanik tapersersuisarneq pillugu inatsit tunngavigalugu tapersersuiniutitalimmik) tunniussinnaanerai kommunip ilaatigut misissortussaavaa. Tamanna meeqqanik tapersersuisarneq pillugu inatsimmi § 41, imm. 1, nr. 1 pillugu oqaaseqaatini imatut itisilerneqarpoq:

“Meeqqap angerlarsimaffimmi avataanut inissinneqartariaqarneranut taamanikkut atukkat tunngavilersuutigineqartut ilaqutariinni aaqqinneqarsimanersut misissuinermi aallaavigisariaqarpaa. Sioqqutsisumik misissuinerup tamatuma ilaatut angajoqqaatut oqartussaassusilinni pissutsit maannakkullu angajoqqaatut piginnaassusaat isummerfigineqartariaqarput. Angajoqqaat assersuutigalugu imigassamik atornerluisuusimappata, angajoqqaat maannakkut atornerluinermiit aniguisimanersut misissuiffigineqassaaq. Angajoqqaatut oqartussaassusilinni pissutsinik il.il. misissuinermi, angajoqqaat maannakkut isumassuisinnaassusiat, isumannaatsuunerat, misigissutsitigut kialaassusiat, meeqqanik inerikkiartortitsisinnaassusiat, ilitsersuisinnaassusiat, killiliisinnaassusiat, allanngujaassusiat il.il. aamma ilanngunneqartariaqarput. Angajoqqaatut oqartussaassusillit allanik meeraqarsinnaanerat pillugu paasissutissat meeqqallu taakku alliartornerat angajoqqaaminnullu attaveqarnerat, angajoqqaatut oqartussaassusilinni pissutsit nalilersornerannut ilaasussatut naatsorsuutigisariaqarpoq.”