Ombudsmandeqarfimmit misissuiartortut Angerlarsimaffik Neriusaami Maniitsumiittumi 2019-imi majimi misissuipput.

Utoqqaat illuat najugaqartut toqqissisimanartunik avatangiiseqarnissaannik neqerooruteqarfiusutut, aamma pisortaqatigiit sulisullu suliassatik tunniusimalluarlutik unneqqarillutillu isumagigaat, taamatuttaarlu najugaqartunut pissaanermik atuineq tunuarsimaarfigisorujussuugaat Ombudsmandip pingaarnerusutigut paasisaqarfigaa.

Ombudsmandilli misissuineq pillugu nalunaarusiaani pissutsit oqaaseqaateqarnissamut pissutissaqalersitsisut aamma eqqaanerput.

Ombudsmandi eqikkaalluni ilaatigut inerniliivoq utoqqaat illuata pissaanermik atuisarneq pillugu inatsimmi malittarisassat arlalitsigut malissimanngikkai.

Siullertut utoqqaat illuat najugaqartunik puigortunngortunik uffaanermut, atisanik taarsiinermut nanginillu taarsiinermut atatillugu najugaqartunik aalajangiilluni tigumminnittarnikkut timikkut pissaanermik akuttunngitsumik atuisarsimavoq, naak taamaaliornissamut kommunalbestyrelsip siumoortumik akuersissutaa pigineqanngikkaluartoq.

Aappaattut utoqqaat illuanni najugaqartut ineeraasa matui silarliit tamarmik “matunut immikkut ammaatinik” taaneqartartunik marloriarlugit toortakkanik pilersorneqarsimapput, naak kommunalbestyrelsi taamaaliornissamut akuersissuteqarsimanngikkaluartoq.

Ombudsmandi pissutsit taakku marluk isornartorsiorlugit misissuineq pillugu nalunaarusiami oqaaseqaateqarpoq.

Misissuineq pillugu nalunaarusiaq uani atuarsinnaavat.

Paasissutissat amerlanerusut uani pissarsiarineqarsinnaapput: Oqarasuaat nr. 32 78 10.

TUNULIAQUTAA

Ombudsmandip misissuisarneri

Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinniffinnik assigiinngitsunik innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombudsmandip Ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili kalerreeqqarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Ajornartorsiutit suut Ombudsmandip misissuinermi maluginiarsimanerai aamma suut allatut iliorluni suliarineqarsinnaanerat Ombudsmandip kaammattuutigisimaneraa tassani atuarneqarsinnaapput.