“... isumaqarattami Aalisarnermut, Piniarnermut Nunalerinermullu Naalakkersuisoqarfiup aalisakkanik suliffissuaqarnermi ingerlatsisut assigiinngitsumik pisariaqanngikkai.“ Aalisarnermi suliffeqarfik Ombudsmandimut naammagittaalliuummi taamatut allappoq.

Aalisarnermi suliffeqarfiup taassuma ilaatigut oqaatigaa suliffeqarfiup ataani ingerlatseqatigiiffiit pingasut angallammit angallammut allamut usingiarnissamut akuersissutinik taaneqartartunik Naalakkersuisoqarfimmit tunineqarsimasut. Angallammit angallammut allamut usingiarnissamut akuersissutit taakku nunap ilaani sumiiffinni kisitsisinngorlugit taaneqartuni aalajangersimasuni atugassatut killilerneqarsimanerat aalisarnermili suliffeqarfiup unammillertigisami angallammit angallammut allamut usingiarnissamut akuersissummik taamatut killiligaanngitsumik tunineqarsimanera aalisarnermi suliffeqarfiup taassuma naammagittaalliuutigaa.

Ombudsmandi suliamik misissuereerluni eqikkaalluni inerniliivoq angallammit angallammut allamut usingiarnissamut akuersissutinik killiliineq isornartorsiuinermut tunngavissaqalersitsinngitsoq. Ombudsmandi akuersissutinik killiliinerup suliamut attuumassuteqanngitsumik assigiinngisitsinermik pissuteqarnera ilimagissallugu aamma tunngavissaqanngilaq.

Ombudsmandili aamma eqikkaalluni inerniliivoq angallammit angallammut allamut usingiarnissamut akuersissutit nunap ilaani aalajangersimasumi atugassatut killilerneqarnerat Naalakkersuisoqarfiup naammattumik tunngavilersorsimanngikkaa. Ombudsmandi oqarpoq tamanna suliamut attuumassuteqanngitsumik assigiinngisitsisoqarneranik aalisarnermi suliffeqarfiup kukkulluni isumaqarneranut pissutaaqataasimasinnaasoq.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.