Meeraq tapersersortitut ikiorteqarsinnaatitaanersoq kommuni isummernialuusaarpallaarsimavoq. Inatsisartut Ombudsmandiat oqaaseqaammi nutaami taamatut inerniliivoq.

Suliaq aallartippoq arnaq panimmi tapersersortitut ikiortilerneqarnissaanik Qaasuitsup Kommunianut 2013-imi septemberimi qinnuteqaateqarmat. Tamatumunnga atatillugu ilaatigut oqaatigaa panini siusinaarluni erniusimasoq qaratsamigullu aanaartoorsimasoq.

Pania ukiut pingasut sinnerlugit qaangiutereersut - 2017-imi februarimi – tapersersortitut ikiortilerneqarpoq, kommunilu aatsaat 2017-imi ukiakkut aalajangiivoq ikiorsiineq inunnik innarluutilinnik ikiorsiisarneq pillugu malittarisassat tunngavigalugit pisinnaasoq.

Qaasuitsup Kommunia aamma kommuni Qaasuitsup Kommuniata 1. januar 2018-imi avinneqarnerata kingornatigut suliamik tigusisoq Ombudsmandip suliamik suliarinninnerminut atatillugu oqaaseqaateqar-tippai. Piffissap suliamik suliarinninnermut atorneqartup sivisussusia innarluutilinnut tunngasuni sulisussaaleqinermik pissuteqartoq kommunit taakku marluullutik oqaatigaat.

Ombudsmandip suliaq pillugu oqaaseqaammi ilaatigut oqaatigaa piffissaq suliamik suliarinninnermut atorneqartoq akuerineqarsinnaanngitsoq isorisarialerujussuarlu pineqartoq – suliassaqarfimmi tassani sulisussaaleqisimaneq apeqqutaatinnagu.

Ombudsmandi aammattaaq inerniliivoq suliami annertuutigut sunniuteqartunik kukkussuteqartoqarsimallunilu sumiginnaasoqarsimasoq, taamaattumillu ilaatigut Inatsisartut Inatsisinut Ataatsimiititaliaat suliamik Ombudsmandi pillugu inatsimmi § 23 tunngavigalugu ilisimatillugu.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.

Piffissaq suliamik suliarinninnermut atorneqartoq qaqugukkut sivisuallaartarpa?

Piffissaq qanoq sivisutigisoq pisortani oqartussaasup suliamik suliarinninnerminut atussagaa ataatsimut malittarisassanik peqanngilaq. Naatsumilli oqaatigalugu suliat sapinngisamik pilertornerpaamik illersorneqarsinnaasumillu suliarineqartarnissaat ingerlatsinermi ileqqorissaarnerup nassataraa.

Suliaq pisariaqarneratut pilertortigisumik suliarineqarsimanersoq apeq-qummi ilaatigut suliap pissusia, oqartussaasup piffissaq sulianik taamatut ittunik suliarinninnerminut atortagaa nalinginnaasoq, suliap ajornaku-suussusia/pisariussusia, suliami ingerlaavartumik iliuuseqarnerit kiisalu suliaq paasissutissartalersorniarlugu suliamik suliarinninnerit piffissartornartuunersut apeqqutaapput.