Inatsisartut Ombudsmandianni sulisut Qaanaami, Siorapalummi Qeqertanilu sapaatit akunnerini 17-imi 18-imilu paasisitsiniaallutik angalassapput. Ombudsmandimik ilisimasaqarnerup siammarterneqarnissaa Ombudsmandimullu naammagittaalliornissamut periarfissanik ilitsersuineq angalanerup taassuma siunertaraa.

Kikkulluunniit ornigullutik Ombudsmandip sulisuinik oqaloqatiginninnissaminnut tikilluaqqusaapput. Suliaq aalajangersimasoq Ombudsmandip sulisuinut oqaloqatiginnissutiginiaraanni oqartussaasut suliaq pillugu allagarisimasaannik nassataqarneq iluaqutaassaaq.

Ombudsmandip sulisui piffissani ukunani naapinneqarsinnaapput:

Siorapalummi: Tallimanngorneq 27. april 2018 nal. 17-19 kommunip allaffiani

Qeqertani: Sapaat 29. april 2018 nal. 17-19 atuarfimmi

Qaanaami: Marlunngorneq 1. maj 2018 nal. 13-16 kommunip allaffiani

OMBUDSMANDI SUTIGUT IKIUUSSINNAAVA?

Kalaallit Nunaanni Namminersorlutik Oqartussat kommunillu ataanni pisortat ingerlatsiviat pillugu naammagittaalliuutit Ombudsmandip suliarisinnaavai. Greenland Business A/S aamma INI A/S pillugu naammagittaalliuut Ombudsmandip pisuni aalajangersimasuni suliarisinnaavai. Ombudsmandilli soorlu eqqartuussiviit, politiit pinerluuteqarsimasunilluunniit isumaginnittoqarfik pillugu naammagittaalliuutit suliarisinnaanngilai.

Pisortat aalajangiineri, soorlu pisortanit ikiorsiissutinik, aalisarsinnaanermut akuersissutinik imaluunniit allagaatinik paasitinneqarumanermik itigartitsinerit aamma oqartussaasut pissusilersorneri, soorlu ataqqinninngitsumik nikaginnippalaartumilluunniit oqalunneri, naammagittaalliuutigineqarsinnaapput.

Suliami allamut naammagittaalliornissamut periarfissaqarpat tamanna Ombudsmandimut naammagittaalliunnginnermi atorneqareersimassaaq.

Naammagittaalliuut pisup naammagittaalliuutigineqartup pineranit ukioq ataaseq qaangiutsinnagu Ombudsmandimut tunniunneqassaaq.

Ombudsmandi pillugu inatsit uani atuarneqarsinnaavoq.