Ombudsmandi meeqqanut ulloq unnuarlu paaqqinniffimmi namminersortumi siullermeerutaasumik misissuivoq. Tamanna 2018-imi martsimi aprilimilu pivoq, paaqqinniffiup imminut pigisup PITU-p Nuummi Tasiilamilu immikkoortortaqarfii Ombudsmandip tikeraarmagit.

Ombudsmandi tamatuma tungaanut taamaallaat pisortat paaqqinniffiutaanni, soorlu kommunit utoqqarnut illuini, meeqqanik ulloq unnuarlu paaqqinniffinni Namminersorlutik Oqartussanit pigineqartuni, innarluutilinnik paaqqinniffinni Namminersorlutik Oqartussanit pigineqartuni Dronning Ingridillu Napparsimmavissuani Tarnikkut Nappaatilinnut Immikkoortortaqarfimmi misissuisarpoq.

Ombudsmandi pillugu inatsisip 1. juli 2017-imi atuutilersumik allanngortinneqarneratigut Ombudsmandi paaqqinniffinni/suliffeqarfinni il.il. namminersortuni, meeqqat atugaat eqqarsaatigalugit suliassanik imaaliallaannaq isumagisaqartuni, pissutsinik meeqqat atugaannut tunngasunik aamma misissuisinnaalerpoq.

PITU-p immikkoortortaasa marluk misissorneqarnerisa kingornatigut Ombudsmandi misissuinerit pillugit marlunnik nalunaarusiorpoq, uani atuarsinnaasannik:

• PITU’p Nuummi immikkoortortaqarfianik misissuineq

• PITU’p Tasiilami immikkoortortaqarfianik misissuineq

PITU’p immikkoortortaqarfianik misissuineq Ombudsmandip nalinginnaasumik ingerlatsineranut ilaatillugu pivoq, taamalu paaqqinniffiup erseqqinnerusumik naammagittaalliuutigineqarneranik tunngaveqarani. Misissuinerit ingerlanneqarput meeqqat pisinnaatitaaffiinik sullissivik MIO suleqatigalugu.

Paasissutissat sukumiinerusut oqarasuaat 32 78 10 attaveqarfigalugu pissarsiarineqarsinnaapput.

TUNULIAQUTAA

Paaqqinniffiit najugaqartuutiminnik paarsilluarnersut malittarisassanillu malinninnersut paasiniarneqarnissaat misissuinerit taakkua siunertaraat. Misissuinerni taakkunani paaqqinniffiup initai Ombudsmandip Ombudsmandeqarfimmilu sulisut misissortarpaat, kiisalu pisortaqatigiit, sulisut, najugaqartut ilaqutaasullu oqaloqatigisarlugit.

Paaqqinniffiit siumut ilisimatinneqareerajuttarput. Ombudsmandili siumut ilisimatitsissuteqaqqaarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Ajornartorsiutit suut Ombudsmandip misissuinermi maluginiarsimanerai paaqqinniffiillu allatut qanoq iliorsinnaanerinut Ombudsmandi sunik kaammattuuteqarsimanersoq nalunaarusiami atuarneqarsinnaapput.