Inatsisartut Ombudsmandiat Kommuni Kujalliup suliaataanik meeqqanik inuusuttunillu angerlarsimaffiup avataanut inissiinernut tunngasunik misissuineq 2015-imi aasakkut aallartinneqartoq unitsinniarlugu aalajangerpoq.

Tamanna pivoq Namminersorlutik Oqartussani misissuisut kommunimi misissuinerminni suliani taakkunanerpiaq ajornartorsiutinik qulaajaareersullu, tamatumalu kommuni sulianik inissiinernut tunngasunik tamanik taakkunani ajornartorsiutit aaqqinniarlugit misissuinialersissimavaa.

Taamaattumik Ombudsmandi isumaqarpoq atugassiissutinik sulianik taakkuninnga misissueqqinnermut atuineq siunertaqanngitsoq. Kommunilli sulianik misissuinera sunik nassataqassanersoq Ombudsmandip malinnaaffiginiarpaa.

Kommuni Kujallermik misissuineq kommunit sisamaasut meeqqanik inuusuttunillu angerlarsimaffiup avataanut inissiinerminni inatsisinik malinninnersut ataatsimut misissuinerup ilagaa. Misissuineq taanna aallartinneqarpoq suliassaqarfik kommunit akuliuffiusorujussuarnik aalajangiiffigisartagaat qitiutillugu samminiarlugu. Naak aalajangiinerit taamaattut meeraq ikiorniarlugu ajoraluartumik pisariaqartuusaraluartut meeraq angajoqqaallu pisinnaatitaaffimmik eqqortinneqarnissaannut pisinnaatitaaffeqarput.

Ombudsmandip kommunit sinnerini pingasuni sulianik inissiisarnernut tunngasunik misissuinera ingerlaqqippoq.

Ombudsmandip Kommuni Kujallermut allagai atuarsinnavatit uani

Paasissutissat amerlanerusut uunga saaffiginnillutit pissarsiarisinnaavatit:

Inatsisartut Ombudsmandiat Vera Leth, oqarasuaat 32 78 10.


TUNULIAQUTAA:

Kalallit Nunaanni Namminersorlutik Oqartussani kommunilu pisortani oqartussaasut inatsiseqartitsinermik atuuttumik ingerlatsinermiluunniit ileqqorissaarnermik unioqqutitsillutik iliuuseqarnersut misissussallugu Inatsisartut Ombudsmandiata suliassaraa. Tamanna Inatsisartut Ombudsmandiat pillugu Inatsisartut inatsisaatigut aalajangersarneqarpoq.

Kinaluunniit Ombudsmandimut naammagittaalliorsinnaavoq, Ombudsmandilli aamma suliaq nammineerluni misissuiffigisassanngortissinnaavaa. Ombudsmandi oqartussaasut sulianik suliarinninnerinik tamatuma saniatigut ataatsimut misissuiffiginnissinnaavoq.