Nukimmik pilersuinermi suliffeqarfik Nukissiorfiit Ombudsmandip apeqquteqaateqarneratigut paasissutissiissutigaat sullitat akiitsoqartut tamarmik allattorsimaffii suliffeqarfiup kommunini isumaginninnermik ingerlatsivinnut siusinnerusukkut nassiuttarsimallugit. Tamanna sullitat akiitsoqartut isumaginninnermilu ikiorsiissutinik pisariaqartitsisut pillugit ataatsimut suleqatigiinnermi ilaasutut pisarsimavoq.

Ombudsmandi pissutsit taamaannerat tunngavigalugu aalajangerpoq suliami annertunerusumik iliuuseqaqqinniarani. Ombudsmandip tamatumani manna pingaartillugu isiginiarpaa, tassalu Nukissiorfiit paasissutissiissutigigaat periaaseq pineqartoq Ombudsmandip saaffiginninnera ukioq ataaseq sinnerlugu sioqqullugu atorneqarunnaarsimasoq, paasissutissanillu ingerlatitseqqilluni tunniussisarneq pillugu tunaartarisassat il.il. suliffeqarfiup suliarisimagai (8. oktober 2015-imi inaarlugu suliarineqarpoq, j.nr. 2015-909-0004).

Nukimmik pilersuinermi suliffeqarfik Nukissiorfiit innuttaasup saaffiginnissuteqarnera tunngavigalugu allakkatigut 30. juni 2015-imeersutigut qinnuigaakka sullitani innaallagissamut, imermut kiassarnermulluunniit akiitsullit pillugit paasissutissanik kommuninut ingerlatsitseqqittarnersut – siusinnerusukkulluunniit ingerlatitseqqittarsimanersut – paasissutissiissutigeqqullugu.

Nukissiorfiit allakkatigut 24. juli 2015-imeersutigut ilaatigut makku oqaatigaat:

“[...]

Pissutsit saaffiginnissutit tunngavigalugu misissorpakka, paasissutissiissutigisinnaavaralu sullitat akiitsui pillugit paasissutissat Nukissiorfiit kommunini isumaginninnermik ingerlatsivinnut siusinnerusukkut tunniuttarsimagaat. Taamatut tunniussineq sullitat akiitsullit taamalu isumaginninnikkut ikiorserneqarnissamik pisariaqartitsisut pillugit ataatsimut suleqatigiinnermut ilaatillugu pisarsimavoq. Sulisunit taamani periaatsimik ilisimasaqartunit tamatunnga atatillugu paasitinneqarpunga paasissutissanik tunniussisarneq sullitat akiitsullit tamarmik allattorsimaffiannik nassiussinikkut pisarsimasoq.

Periaaseq taanna april 2014-imi atorneqarunnaarpoq, paasissutissanillu kommunini isumaginninnermik ingerlatsivinnut oqaatigineqartutut periaaseqarluni taamanimiilli tunniussisoqartarsimanani.

Paasissutissanik tunniussisarneq pillugu inatsiseqartitsineq atuuttoq Nukissiorfiit ullumikkut malippaat. Tamatumunnga atatillugu paasissutissiissutigisinnaavara paasissutissanik tunniussisarneq pillugu tunaartarisassat suliarineqarsimammata periaatsillu atulersinneqarsimallutik, taamaalillutik sulisut – soorlu sullitaq suleqatigisartagarluunniit paasissutissanik pissarsiniarluni saaffiginnikkaangat – qanoq iliussanerlutik ilisimareertalerlugu.

Siusinnerusukkut periaasiusimasoq Nukissiorfiit sinnerlugit ajuusaarutigissavara, paasissutissallu amerlanerusut perusunneqarpata ikiuunnissannut soorunalimi piareersimallunga.” (Atorfeqarfimmi nutsigaavoq)

Nukissiorfiit allakkatigut 8. oktober 2015-imeersutigut nalunaarfigaakka pissutsit taamaannerat pissutigalugu suliami annertunerusumik iliuuseqaqqinniarngana aalajangertunga, allakkallu taakkua assilinerat Pinngortitamut, Avatangiisinut Inatsisinillu Atuutsitsinermut Naalakkersuisoqarfimmut nassiullugu. Tamatumani manna pingaartillugu isiginiarpara, tassalu periaatsip pineqartup april 2014-imi atorneqarunnaarsimanera paasissutissanillu ingerlatitseqqilluni tunniussisarneq pillugu tunaartarisassat il.il. suliarineqarsimanerat Nukissiorfiit paasissutissiissutigigaat.