Piffissami kingullermi tusagassiortunit, ilaatigut qitiusumik aqutsisoqarfimmi inunnik atorfilikkaanik soraarsitsineq pillugu ilaatigullu Naalakkersuisut Siulittaasuata Naalakkersuisoqarfiani tusagassiuisarnermut siunnersortimik atorfinitsitsineq pillugu suliat pillugit qanoq isummerniarnera pillugu paasissutissiisoqarnissaanik piumasaqartunit saaffigineqartarsimavunga.

Aammattaaq Atuagagdliutini ippassaq saqqummersuni Transparency Greenlandimit sulianik inatsisilerinermut pisortamut aamma tusagassiuisarnermut siunnersortimut tunngasunik misissuinernik nammineerlunga allartitsinikkut qulaajaaqqullunga kaammattorneqarpunga.

Suliani aalajangersimasunut taakkununnga matumani isummernianngilanga, taamaallaalli oqaatigalugu Ombudsmandi pillugu inatsit naapertorlugu aallaaviusoq tassaammat naammagittaalliuutit uannut tunniunneqartut tunuliaqutaralugit sulianik suliarinnittartunga. Aallaaviusoq taanna suliani illua’tungiusup inatsiseqartitsinikkut soqutigisaqarfigisaani, tassalu pineqartup suliami nammineq annertuumik soqutigisaqarfigisaani, minnerunngitsumik aamma atuuttarpoq. Soorlu assersuutigalugu suliani soraarsitsinernut tunngasuni soraarsinneqartoq suliami inatsiseqartitsinikkut taamaalilluni soqutigisaqarpoq. Suliani taamaattuni aallaavik tassaavoq uanga, suliami illua’tungiusoq aamma eqqarsaatigalugu, Ombudsmandip misissuineranik aallartitsinissaq pillugu taamaallaat isumaliutersuuteqassasunga, suliami illua’tungiusoq taanna uannut naammagittaalliuuteqarpat. Taamaalillunga suliani taamaattuni misissuinermik nammineerlunga – aallaavittut - aallartitsinavianngilanga.

Aammattaaq oqaatigaara sulianik pisortat ingerlatsiveqarfiinit naammassillugit suli suliarineqanngitsunik aallaavittut pingaarnerpaatut suliarinnittannginnama. Soorlu suliami atorfinitsitsinermut tunngasumi taamaalillunga akuliunnavianngilanga atorfinitsitsineq pillugu ingerlatsiveqarfik aalajangeereersimatinnagu. Sulianut ingerlatsiveqarfimmit naammassillugit suli suliarineqanngitsunut akuliussinnaannginninnut pissutaavoq suliaq piffissami ataatsimi oqartussaasunit assigiinngitsunit marlunnit suliarineqarpat pissusissamisuunngimmat. Tassami ingerlatsiveqarfik suliamik inaarlugu suli suliarinninngitsoq suliaq taanna naatsorsuutigisamik allatut inernilerneqarsinnaanera akerlilerneqarsinnaanngilaq.

Vera Leth