Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutinik qinnuteqaatinik itigartitsisarnerpassui tusagassiuutit piffissami kingullermi sammivaat.

Aalisarnermut, Piniarnermut Nunalerinermullu Naalakkersuisoqarfiup sulianik aalisarnermut tunngasunik assigiinngitsunik suliarinninnera pillugu nammineerluni misissuiffiginninneq annertooq Inatsisartut Ombudsmandiata massakkut ingerlappaa. Tamatumunnga pissutaasoq tassaavoq aalisartut Naalakkersuisoqarfimmit kukkusumik pineqartutut isumaqartut naammagittaalliuutaannik amerlasoorpassuarnik Ombudsmandip qaammatini qulini kingullerni tigusaqartarsimanera.

- Aalisarnermut, Piniarnermut Nunalerinermullu Naalakkersuisoqarfiup sulianik aalisarnermut tunngasunik ataatsimut suliarinninneranik misissuinera tunngavigalugu aalisarsinnaanermut akuersissutinik qinnuteqaatit taama amerlatigisut itigartinneqartarsimanerannut inatsiseqartitsinikkut tunngaviusoq aamma naliliiffiginiarpara, Ombudsmandi Vera Leth oqarpoq.

Misissuineq naammassillugu qaqugu suliarineqarumannersoq Ombudsmandip erseqqinnerusumik oqaatigisinnaanngilaa.