Ombudsmandi oqaaseqaammi nutaami eqikkaalluni inerniliivoq Qeqqata Kommuniani suliami siusinaartumik pensionisianut tunngasumi suliamik suliarinninneq piffissarlu suliamik suliarinninnermut atorneqartoq akuerineqarsinnaanngitsut.

Kommunip suliamik suliarinninnera Ombudsmandip pisariaqanngitsumik sivisuallaarsimasutut isigaa.

Suliaq piffissani pingasuni tulleriinneri malillugit qaammatini 27-ni, qaammatini qulini aamma qaammatini arfineq marlunni iliuuseqarfigineqarani uninngatinneqartarsimavoq, suliarlu ataatsimut isigalugu ukiut tallimat sinnerlugit suliarineqarsimalluni.

Kommunip aqutsisoqarfiata siusinaartumik pensionisiaqalerumalluni qinnuteqaat suliarinngitsoorsimavaa, qinnuteqaateqartummi utoqqalinersiaqarsinnaatitaalernissaanut piffissaq sivikitsuinnanngoreersimammat, tamannalu qinnuteqaateqartumut nalunaarutigalugu. Tamanna Ombudsmandip isorisarialittut isigaa.

Kommunip aqutsisoqarfiata piginnaatitaanini pisinnaatitaaninilu avaqqullugit iliuuseqarsimanera Ombudsmandip ajuusaarnartutut aammattaaq isigaa, qinnuteqaateqartummi siusinaartumik pensionsiaqalerumalluni qinnuteqaataa ataatsimiititaliani susassaqartuni kommunip pisinnaatitaaneq pillugu aalajangersagaa tunngavigalugu suliarineqartussaagaluarluni suliarineqarsimanngimmat.

Kiisalu Ombudsmandip eqikkaalluni oqaatigaa suliami annertunerusunik kukkus-suteqartoqarsimasoq sumiginnaasoqarsimasorlu, taamaattumillu Inatsisartut I-natsisinut Ataatsimiititaliaat kommunalbestyrelsilu tamatuminnga nalunaarfigalugit.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Piffissaq suliamik suliarinninnermut atorneqartoq qaqugukkut sivisuallaalertarpa?
Piffissaq suliamik suliarinninnermut atorneqartoq qanoq sivisutigisoq pisortani oqartussaasup atussagaa ataatsimit malittarisassanik peqanngilaq. Naatsumilli oqaatigalugu ingerlatsinermi ileqqorissaarnerup manna nassataraa, tassalu suliat sapinngisamik pilertornerpaamik illersorneqarsinnaasumillu suliarineqar-tassasut.

Suliaq pisariaqarneratut pilertortigisumik suliarineqarsimanersoq apeqqummi suliap suussusia, oqartussaasup suliani tassunga assingusuni piffissaq suliarinninnermut atortagaa nalinginnaasoq, suliap pisariussusia, suliami ingerlaavartumik iliuuserineqartut kiisalu suliaq paasissutissartalersorniarlugu suliamik suliarinninnermi iliuutsit piffissartornartut iliuuserineqassanersut apeqqutaavoq.