Inatsisartut Ombudsmandiannit misissuiartortut utoqqaat illuanni Qeersaat Il-luanni 2022-mi augustimi misissuipput. Misissuineq taanna innuttaasup ernum-mateqarluni allagai tunngavigalugit ingerlanneqarpoq.

Ombudsmandip pingaarnertut paasisaa unaavoq Qeersaat Illuat sulisut najugaqartunik isumassuilluartuusut. Ombudsmandip paasisaa aammattaaq unaavoq init ataatsimoortarfiusartut angerlarsimaffippalaartut Qeersaat Illuata neqeroorutigigai, najugaqartullu soorlu sammisassaqartitsineq eqqarsaatigalugu kissaatigisaat tusaaniarneqartartut.

Pissutsilli oqaaseqaateqarnissannut pissutissaqalersitsisut Ombudsmandip misissuineq nalunaarusiami aamma eqqartorpai.

Qeersaat Illuata najugaqartunut piffissami sivisunerusumi pissaanermik atuisarsimanera pissaanermillu atuisarsimanerit taakku pissusissaatut nalunaarsorneqartarsimannginnerat nalunaarutigineqartarsimannginnerallu Ombudsmandip nalunaarusiami isornartorsiorpaa.

Ombudsmandi isumaqarpoq taamaattoqarneratigut najugaqartut inatsiseqartitsinikkut innarlitsaalineqarnerat sanngiillisinneqarsimasoq. Ombudsmandip tamanna isorisarialittut oqaatigaa.

Ombudsmandip Kommuni Qeqertalimmi kommunalbestyrelsi kommunimi utoqqarnik paaqqinniffinnut pingaarnerusutigut akisussaasuusoq aamma Inatsisartut Inatsisinut Ataatsimiititaliaat nalunaarfigai. Tamanna Ombudsmandi pillugu inatsimmi § 23-mi “annertunerusumik kukkussuteqartoqarsimanissaa imaluunniit sumiginnaasoqarsimanissaa” pillugu oqaatigineqartut innersuussutigalugit pivoq. Ombudsmandip taakkua saniatigut Meeqqanut, Inuusuttunut Ilaqutariinnullu Naalakkersuisoqarfik pissaanermik atuisarneq pillugu inatsimmik suliassaqarfimmi oqartussaasuusoq nalunaarfigaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

TUNULIAQUTAA

Pissaanermik atuisarneq

Pissaanermik atuisarneq pillugu inatsit (isumaginninnermik suliassaqarfimmi pis-saanermik atuineq pillugu Inatsisartut inatsisaat nr. 1, 21. november 2013-i-meersoq kingusinnerusukkut allannguuteqartinneqarsimasoq) ilaatigut utoqqaat illuini sulisut najugaqartunut aalajangersimasunut timikkut pinngitsaaliinermik atuisinnaanerannut periarfissiivoq. Inatsit malittarisassanik arlalinnik najugaqartut ataqqinassusiiaanngitsumik inatsiseqartitsinermilu innaarlitsaaliinikkut illersorneqarsinnaasumik pineqartarnissaannik qulakkeerinneqataasunik aamma imaqarpoq. Inatsimmi soorlu makku piumasaqaataapput:

● Inuk pineqartoq iliuuseqarfiginninnermut pisariaqartunut nammineq piumassutsiminik peqataatinniarlugu kommuni periarfissanik tamanik atuisi-massasoq

● Pissaanermik atuineq sapinngisamik qajassuussisumik sapinngisamillu sivikinnerpaamik pisassasoq

● Nangermik taarsiinermi, ufaanermi assigisaannilu aalajangiilluni tigumminninneq kommunip aalajangiinera tunngavigalugu pisassasoq.

● Kommunip aalajangiinera Isumaginninnermi Naammagittaalliuuteqartarfimmut naammagittaalliuutigineqarsinnaasoq.

● Pissaanermik atuineq sunaluunnmiit kommunimut Naalakkersuisunullu nalunaarutigineqartassasoq.

Pissaanermik atuisarneq pillugu inatsit www.inatsisit.gl-imi atuarneqarsinnaavoq.

Ombudsmandip misissuisarneri

Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinniffinni assigiinngitsuni innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombuds-mandip Ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili siumut kalerreeqqaarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Tassani ajornartorsiutit suut Ombudsmandip misissuinermi maluginiarsimanerai aamma suut allatut iliorluni suliarineqarsinnaanerat Ombudsmandip paaqqinniffimmut kaammattuutigisimaneraa atuarneqarsinnaavoq.