Ombudsmandi oqaaseqaammi nutaami inerniliilluni eqikkaavoq Qeqqata Kommunia meeqqap tapersersorneqarnissaa pillugu suliami amerlasoorpassuarnik assullu ilungersunartunik kukkussuteqarsimasoq, kommunillu suliamik suliarinninnera ataatsimut isigalugu akuerineqarsinnaanngitsoq.

Kommuni piffissami ukiut pingasut affarlu sinnerlugit sivisussuseqartumi meeqqap atugai pillugit nalunaarutiginninnernik arfineq pingasunik tigusaqartarsimavoq. Meeraq nalunaarutiginninnerup siulliup tiguneqarnerata nalaani qulingiluanik ukioqarsimavoq. Ombudsmandi isumaqarpoq kommuni nalunaarutiginninnernik tigusaqarnermini nalunaarutiginninnerit isumaginninnikkut misissuinermik aallartitsinermut pissutissaqalersitsinersut sukkulluunniit aalajangiisimanngitsoq. Ombudsmandi eqikkaalluni inerniliivoq tamanna akuerineqarsinnaanngilluinnartoq.

Kommunip anaanaasoq piffissami tassani arlalippassuariarluni ataatsimeeqatigisarsimavaa oqaloqatigisarsimallugulu. Ombudsmandi isumaqarpoq kommuni tamatumunnga atatillugu anaanaasumut ilitsersuisussaatitaanerminik sukkulluunniit eqqortitsisimanngitsoq. Ombudsmandi eqikkaalluni inerniliivoq kommunip ilitsersuisimannginnera isorisariaqarluinnartuusoq.

Ombudsmandi eqikkaalluni aammattaaq inerniliivoq kommunip nalunaarutiginninnermik siullermik tigusaqarnerminit anaanaasup tapersersortitut ikiortitut atorfinitsinneqarumalluni qinnuteqaateqarnerata tungaanut suliamik suliarinninnera naammaginanngilluinnartuusimasoq, anguniagaqannginnermit ilatsiinnarnermillu sunnigaasimasoq, kommunilu meeqqamut tapersersuiniutinik aallartitsisoqarnissaanik piffissami pissutissaqanngitsumik sivisuallaami aalajangiiniaasaarsimasoq. Ombudsmandi isumaqarpoq tamanna akuerineqarsinnaanngitsoq.

Kiisalu Ombudsmandi eqikkaalluni inerniliivoq suliami annertunerusutigut kuk-kussuteqartoqarsimasoq sumiginnaasoqarsimarlu, taamaattumillu Inatsisartut Inatsisinut Ataatsimiititaliaat aamma kommunalbestyrelsi oqaaseqaammik Ombudsmandi pillugu inatsimmi § 23 tunngavigalugu nalunaarfigisimallugit.

Ombudsmandip oqaaseqaataa uani atuarsinnaavat.

Paasissutissat amerlanerusut uani pissarsiarineqarsinaapput: 32 78 10.


Kommunip nalunaarutiginninnernut qisuariartussaatitaanera

Meeqqanik tapersersuisarneq pillugu inatsimmi § 19, imm. 1-ikkut aalajangersarneqarpoq kommuni nalunaarutiginninnermik tigusaqaruni isumaginninnikkut misissuinermik aallartitsinermut tunngavissaqarnersoq nal. ak. 24-it iluanni aalajangiissasoq.

Taamaalilluni kommuni nalunaarutiginninnermik tigusaqaruni iliuuseqartussaatitaavoq.


Ilitsersuisussaatitaaneq

Suliassat suliarineqartarnerat pillugu inatsimmi § 7, imm. 1-ikkut aalajangersarneqarpoq pisortani oqartussaasup inuit oqartussaaffigisamini suliat pillugit apeqquteqarlutik saaffiginnittut suliani aalajangiiffiusussani aalajangiiffiusunilluunniit ilitsersortassagai ikiortassallugillu.

Oqartussaasut ilitsersuisussaatitaanerisigut siunertaasoq tassaavoq innuttaasut paasissutissanik pisarisaqartitsinerannik akuersaartumik matussusiinissaq, innuttaasullu kukkusoqarnera, ilisimasaqanngissuseq paatsuuinerilluunniit pissutigalugit pisinnaatitaaffimminnik annaasaqarsinnaanerannik pinaveersaartitsineq.


Tapersersuiniutit

Meeqqanik tapersersuisarneq pillugu inatsimmi § 21, imm. 1-ikkut aalajanger-sarneqarpoq kommuni tapersuiniutit pillugit aalajangiinissaminut pisussaatitaasoq, tamanna meeqqap immikkut pisariaqartitaanut annertuumik pingaaruteqartutut isigisariaqarpat.