Ombudsmandi oqaaseqaammi nutaami eqikkaalluni inerniliivoq Kommuneqarfik Sermersuup sulisumik soraarsitsinermut atatillugu suliassat suliarineqartarnerat pillugu inatsimmi suliami illua’tungiusup isumaanik tusarniaasarneq pillugu malittarisassat aamma suliami illua’tungiusup isumaanik tusarniaanissamut annertusisamik pisussaaffeqarneq kiisalu suliassat suliarineqartarnerat pillugu inatsimmi tunngavilersuisarneq pillugu malittariassat eqqortissimanngikkai.

Ombudsmandi naliliivoq kommunip suliami illua’tungiusup isumaanik kommunimi atorfeqartitaasumik peersitsissamaarneq pillugu tusarniaanera amigaateqartoq, pissutsimmi peersitsissamaarnermut pingaaruteqartut kommunip naammattumik erseqqissarsimanngimmagit. Tamanna Ombudsmandip ajuusaarnartutut isigaa.

Ombudsmandi eqikkaallluni aamma inerniliivoq kommunip peersitsisoqarnissaa-nik aalajangiineranut tunngavilersuut amigaateqartoq, piumasaqaatinimmi suliassat suliarineqartarnerat pillugu inatsimmi aalajangiinermut piumasaqaataasunik eqqortitsisuunnginnami. Tamanna Ombudsmandip ajuusarnarluinnartutut isigaa.

Ombudsmandi naliliivoq suliami illua’tungiusup isumaanik tusarniaaneq amigaateqaraluartoq tamanna aalajangiinerup atuussinnaassuseqannginneranik nassa-taqanngitsoq, amigaammi sulisup peersinneqartup pisunik paasinnissinnaaneranut kommunillu aalajangiinnginnerani aalajangiinissamut tunngavigisaanik sunniinissamut periarfissaanut sunniuteqanngimmat.

Ombudsmandip oqaaseqataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Suliassat suliarineqartarnerat pillugu inatsimmi suliami illua’tungiusup isumaanik tusarnaasarneq pillugu malittarisassat

Suliami illua’tungiusup isumaanik tusarniaasarneq pillugu malittarisassat pisortat ingerlatsineranni suliassat suliarineqartarnerat pillugu Inatsisartut Inatsisaanni nr. 8-mi, 13. juni 1994-imeersumi (matuma kingornatigut suliassat suliarineqartarnerat pillugu inatsimmik taaneqartartussami) ilaatigut § 19-ikkut aalajangersarneqarput.

Aalajangersakkakkut tassuuna aalajangersarneqarpoq oqartussaasup suliami illua’tungiusoq suliami pissusiviusut suliami illua’tungiusup ilisimanngisaatut oqartussaasup isigisai pillugit paasissutissanik ilisimatissagaa. Oqartussaasup suliami illua’tungiusoq tamatumunnga atatillugu aalajangiisoqannginnerani oqaaseqaamminik saqqummiussinissaanut periarfississavaa.

Suliami illua’tungiusup isumaanik tusarniaanerup siunertaa tassaavoq suliami illua’tungiusup iliuuserisami aalajangiissamaarnerullu ataqatigiinneqarnerannik paasinninnissaminut periarfissinneqarnissaa.

Peersitsissamaarneq pillugu suliami illua’tungiusup isumaanik tusarniaanermut atatillugu suliassat suliarineqartarnerat pillugu inatsimmi § 19 suliami illua’tungiusup isumaanik tusarniaanissamut pisussaaffimmit annertusisamit inatsisikkut aalajangersagaanngitsumit tapertalerneqartarpoq.

Tassa imaappoq suliami illua’tungiusoq suliami pissusiviusut saniatigut suliami inatsiseqartitsinikkut uppernarsaasersuinikkullu tunngavigisaq pillugu isumma-minik aamma tusarniaavigineqartartussaasoq. Taamaalilluni suliami illua’tungiu-soq aalajangiinissamut tunngaviusumik tamarmiusumik tusarniaavigineqartus-saavoq, oqartussaasup paasissutissanik pineqartunik peqarnera paasissutissallu pineqartut oqartussaasup aalajangiinissamut tunngavigisaanut ilaasut suliami illua’tungiusup ilisimareeraluarpaguluunniit.

Tunngavilersuisarneq

Tunngavilersuisarneq pillugu malittarisassat suliassat suliarineqartarnerat pillugu inatsimmi kapitali 6-ikkut aalajangersarneqarput.

Suliassat suliarineqartarnerat pillugu inatsimmi § 24-kkut aalajangersarneqarpoq inatsimmi malittarisassat aalajangiinermi tunngavigineqartut aalajangiinermut tunngavilersuummi innersuussutigineqartassasut. Oqartussaasoq missingiussilluni naliliisimappat aalajangiineq oqartussaasup pingaarnertut isiginiagassanik sunik pingaartitsilluni isiginninniarsimanera pillugu nassuiaammik imaqassaaq.

Aalajangiineq aammattaaq eqqortuussaaq, imatut paasillugu taanna oqartusaa-sup isumaliutersuutigisarpiaanut takussutissaassasoq. Taamaalilluni isiginiagassat oqartussaasup pingaartillugit isiginiarsimasai tunngavilersuummi oqaatigine-qassapput, oqartussaasullu pisut pingaartillugit isiginiarsimanngisani tunngavilersuummi erseqqissarniassanngilai.