Inatsisartut Ombudsmandiannit misissuiartortut ulloq unnuarlu paaqqinniffimmi Ikinngummi Ilulissaniittumi 2022-mi martsimi misissuipput. Ikinngut tassaavoq inunnik eqqarsartaatsimikkut timikkulluunniit innarluutilinnik ulloq unnuarlu paaqqinniffik.

Ombudsmandip pingaarnertut paasisaa unaavoq Ikinngut najugaqartunut ininik kusanartunik ipiitsunillu neqerooruteqartoq kiisalu sulisut najugaqartunik isumassuillaqqissuusut tusarnaallaqqissuullutillu.

Pissutsit oqaaseqaateqarnissannut pissutissaqalersitsisut Ombudsmandip nalunaarusiami aamma eqqartorpai.

Paaqqinniffiup pissaanermik atuisarnernik pissaanermik atuisarneq pillugu inatsimmi tamanna pillugu malittarisassat tunngavilugit ingerlaavartumik nalunaarutiginnittarsimannginnera Ombudsmandip nalunaarusiami isornartorsiorpaa. Najugaqartunulli pissaanermik pinngitsaaliinermilluunniit atuisoqartannginnissaa suliniutigineqartoq Ikinngutip misissuinermut atatillugu oqaatigigaa Ombudsmandip tamatumunnga peqatigitillugu maluginiarpaa.

Ombudsmandip misissuinermi maluginiarpaa najugaqartut tamulugassaataannik (snacks), mamakujuutaannik, sodavandiutaannik, cigaretsiutaannik, oqarasuaataannik angallattakkanik, iPadiinik, immiisaannik il.il. arsaarinnittarnermigut taakkua namminneq aalajangiisinnaatitaanerat Ikinngutip killilersuiffigigaa, kiisalu najugaqartut oqarasuaatiminnik angallattakkanik qaqugukkut atuisinnaanerlutik, cigaretsinik ullormut qanoq amerlatigisunik pujortarsinnaanerlutik kiisalu tamulugassaatiminnik qaqugukkut tamulussinnaanerlutik namminneq aalajangiisinnaatitaanerat Ikinngutip killilersuiffigigaa. Ombudsmandip tamanna isorisarialittut isigaa, Ombudsmandimmi naliliinera unaammat najugaqartut namminneq aalajangiisinnaantitaanerannut ilungersunartumik akuliunneq aaqqissuussaanermut tunngasunik tunngavilersorneqarsinnaanngitsoq tassani pineqartoq.

Oqaarasuaatit angallattakkat Ipadillu taamaallat najugaqartup taamaaliortoqarnissaanik akuersinermut uppernarsaat atsiorsimappagu arsaarinnissutigineqartartut najugaqartumilluunniit namminermit tunniunneqartartut Ikinngutip misissuinerup kingornatigut paasissutissiissutigigaa Ombudsmandip maluginiarpaa. Tamanna malitseqartitsiveqqullugu Ombudsmandip Ikinngut qinnuigaa.

Najugaqartut amerlanersaannut ineriartortitsinissamut pilersaarutit Ikinngummit ukiumi kingullermi nutarterneqarsimannginnerat Ombudsmandip nalunaarusiami aammattaaq isornartorsiorpaa. Tamanna malitseqartitsiveqqullugu Ombudsmandip Ikinngut taamatuttaaq qinnuigaa.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

TUNULIAQUTAA

Ombudsmandip misissuisarneri

Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinniffinni assigiinngitsuni innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanil-lu malinninnersut paasiniassallugu misissuinerit taakkua siunertaraat. Ombudsmandip Ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili siumut kalerreeqqaarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Tassani ajornartorsiutit suut Ombudsmandip misissuinermi maluginiarsimanerai aamma suut allatut iliorluni suliarineqarsinnaanerat Ombudsmandip kaammattuutigisimaneraa atuarneqarsinnaavoq.