Paaqqutarinniffimmi Qupanummi Sisimiuniittumi misissuineq Inatsisartut Ombudsmandeqarfiannit misissuiartortunit 2021-mi novemberimi ingerlanneqarpoq. Misissuineq Ombudsmandip ataatsimut sulineranut ilaatillugu ingerlanneqarpoq, taamaalillunilu naammagittaalliuummik aalajangersimasumik tunngaveqarani misissuinerulluni.

Ombudsmandip pingaarnerusutigut paasisaa unaavoq Qupanuk najugaqartunut sinaakkutassanik toqqissisimanartunik aalaakkaasunillu neqerooruteqarfiusoq, aamma pisortaqatigiit sulisullu suliassaminnik tunniusimallutik akisussaassuseqarluartumillu kiisalu najugaqartunik qitiutitsiniarlutik isumaginniffigigaat. Ombudsmandip paasisaa aammattaaq unaavoq najugaqartut sapinngisamik pitsaa-nerpaamik paaqqutarineqarnissaat isumassorneqarnissaallu pisortaqatigiit sulisullu kissaatigigaat.

Pissutsilli oqaaseqaateqarnissamut pissutissaqalersitsisut Ombudsmandip misissuineq pillugu nalunaarusiami aamma eqqartorpai.

Qupanuup najugaqartunut piffissami sivisunerusumi pissaanermik atuisarsimanera pissaanermillu atuinerit taakku pissusissaatut nalunaarsorneqartarsimanatillu nalunaarutigineqartarsimannginnerat Ombudsmandip nalunaarusiami isornartorsiorpaa.

Ombudsmandi isumaqarpoq najugaqartut inatsiseqartitsinikkut innarlitsaalineqarnerat tassani sanngiillisinneqarsimasoq. Ombudsmandip tamanna isorisarialittut taavaa.

Ombudsmandip tamatumunnga peqatigitillugu maluginiarpaa puigortunngortunut immikkoortortaqarfimmi sulisumik ilaatigut sulisut nutaat pissaanermik atuisarneq pillugu inatsimmik ilinniartinneqartarnissaannik isumaginnittussamik pissaanermillu atuinerit eqqortumik nalunaarsorneqartarnissaannik nalunaarutigineqartarnissaannillu qulakkeerisussamik toqqaasoqarsimasoq.

Misissuineq pillugu nalunaarusiaq uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

TUNULIAQUTAA

Ombudsmandip misissuisarneri

Ombudsmandi innuttaasut pisortat ingerlatsinerat pillugu naammagittaalliuutaannik suliarinnittarnermi saniatigut paaqqinniffinnik assigiinngitsunik innuttaasut piffissami sivikinnerusumi sivisunerusumiluunniit najugaqarfigisartagaanni arlalinni ukiut tamaasa misissuisarpoq.

Paaqqinniffiit najugaqartuutiminnik ajunngitsumik pinninnersut malittarisassanillu malinninnersut paasiniassallugu misissuinerit taakkua siunertaraat. Ombudsmandip Ombudsmandeqarfiullu sulisuisa paaqqinniffiit initaat misissortarpaat, kiisalu pisortaqatigiinnik, sulisunik, najugaqartunik ilaqutaasunillu oqaloqateqartarlutik.

Paaqqinniffiit siumut kalerrinneqareerajuttarput. Ombudsmandili siumut kalerreeqqarani aamma misissuisinnaavoq.

Ombudsmandi misissuinerit kingornatigut nalunaarusiortarpoq. Ajornartorsiutit suut Ombudsmandip misissuinermi maluginiarsimanerai aamma suut allatut iliorluni suliarineqarsinnaanerat Ombudsmandip kaammattuutigisimaneraa tassani atuarneqarsinnaapput.