Innuttaasup qaleralinniarsinnaanermut akuersissummik qinnuteqaataa Naalakkersuisut Avannaani sumiiffimmi aalajangersimasumi qaleralinniarsinnaanermut akuersissutinik nutaanik tunniussisarnermik unitsitsiniarlutik 2019-imi aalaja-ngersimanerat innersuussutigalugu Aalisarnermut Piniarnermullu Naalakkersuisoqarfiup itigartissinnaanngilaa. Ombudsmandi oqaaseqaammi nutaami inerniliilluni taamatut eqikkaavoq.

Aalisarnermut, Piniarnermullu Naalakkersuisoqarfiup qaleralinniarsinnaanermut akuersissummik qinnuteqaatip itigartinneqarnissaanik aalajangiinera innuttaasup Ombudsmandimut naammagittaalliuutigaa. Naalakkersuisoqarfiup aalajangiinermut tunngavilersuutitut oqaatigaa Naalakkersuisut aqutsiveqarfimmi 47-mi Qeqertarsuup Tunuani umiatsiaararsorluni qaleralinniarsinnaanermut akuersissutinik qinnuteqaateqartunut akuersissutinik nutaanik tunniussisarneq unitsinniarlugu aalajangersimasut. Naalakkersuisoqarfik aalajangiinermi ilaatigut allappoq qinnuteqaat Naalakkersuisoqarfiup tamanna tunngavigalugu immikkut naliliivigisimanngikkaa.

Naalakkersuisut aalajangernermikkut aqutsiveqarfimmi 47-mi Qeqertarsuup Tunuani qaleralinniarsinnaanermut akuersissutinik qinnuteqaateqartunut akuersissutinik nutaanik tunniussarnermik unitsitsiniarlutik aalajangersimasut Naalakkersuisoqarfimmit Ombudsmandip misissuineranut atatillugu oqaatigineqarpoq. Aalajangerneq taanna Naalakkersuisut nittartagaatigut nutaarsiassatut tamanut saqqummiunneqarsimavoq. Naalakkersuisoqarfiup tamatuma saniatigut oqaatigaa Naalakkersuisoqarfik Naalakkersuisut politikkikkut aalajangernerat unioqqutillugu ingerlatsisinnaanngitsoq.

Naalakkersuisoqarfiup politikkikkut aalajangernernik malinninniarsarinera paasisinnaallugu Ombudsmandip oqaatigaa. Ombudsmandilli tamatumunnga peqatigitillugu oqaatigaa Naalakkersuisoqarfiup aalajangiineri inatsiseqartitsineq atuuttoq tunngavigalugu pisussaasut. Inatsiseqartitsineq atuuttoq politikkikkut aalajangernernik eqqortitsisuunngippat taakkununngaluunniit naapertuutinngippat Naalakkersuisoqarfiup Naalakkersuisunut manna malugeqqusariaqaraa, tassalu tamanna pillugu inatsisiliorneq aatsaat pilersinneqareerpat aqutsinermik pilersaarusiortoqarsinnaasoq politikkikullu aalajangernerit tunngavigalugit aalajangiisoqarsinnaasoq.

Ombudsmandip paasinninnera unaavoq Naalakkersuisut akuersissutinik tunniussisarnermik unitsitsiniarlutik aalajangernerat inatsisiliornermut taamani attuuttumut naapertuuttuunngitsoq.

Naalakkersuisoqarfiup politikkikkut aalajangernerit unioqqutillugit ingerlatsisinnaanani Naalakkersuisoqarfiup oqarnera Ombudsmandip isumaqatiginngilaa. Ombudsmandip oqaatigaa Naalakkersuisut akuersissutinik tunniussarnermik unitsitsiniarlutik aalajangernerata inatsisiliat atuuttut tapertalersinnaanngikkai taarsersinnaanngikkaalluunniit, qinnuteqaallu inatsisiliorneq qinnuteqaateqarnerup nalaani atuuttoq tunngavigalugu suliarineqartussaasoq.

Ombudsmandip paasinninnera unaavoq Naalakkersuisoqarfiup aqutsiveqarfimmi 47-mi Qeqertarsuup Tunuani qaleralinniarsinnaanermut akuersissutinik qinnuteqaatinik itigartitsisarnermini ataatsimut periaasia attatiinnarneqarsinnaanngitsoq.

Ombudsmandip tamatuma saniatigut oqaatigaa Naalakkersuisoqarfik qinnuteqaammik erseqqissumik immikkoortillugulu suliarinninnissaminut pisussaaffeqartoq, Naalakkersuisoqarfiullu aalajangiinera ilaatigut suliassat suliarineqartarnerat pillugu inatsimmi tunngavilersuisarneq pillugu piumasaqaammik eqqortitsisuusussaasoq.

Ombudsmandi eqikkaallluni inerniliivoq Naalakkersuisoqarfiup aalajangiinera isorisarialerujussuusoq, inassutigalugulu suliaq qaleralinniarsinnaanermullu qinnuteqaatit allat piffissami aalajangersimasumi tunniunneqarsimasut tamaasa Naalakkersuisoqarfiup suliareqqissagai.

Suliaq Ombudsmandip Inatsisartut Inatsisinut Ataatsimiiititaliaannut aamma Naalakkersuisut Siulittaasuata Naalakkersuisoqarfianut nalunaarutigaa. Tamanna Ombudsmandi pillugu inatsimmi § 23-mi “annertunerusumik kukkussuteqartoqarsimanissaa imaluunniit sumiginnaasoqarsimanissaa ilimagisariaqartoq” in-nersuussutigalugu pivoq.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.