Allagaatinik paasitinneqarumanermik qinnutigisanik Naalakkersuisoqarfiit sisamat piffissami aalajangersimasumi tigusimasaanik taakkununnga akissutinik paasitinneqarumanermi itigartinneqarnera innuttaasup Ombudsmandimut naammagittaalliuutigaa.

Innuttaasup pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni nr. 9-mi, 13. juni 1994-imeersumi kingusinnerusukkut allannguuteqartinneqartarsimasumi (matuma kingornatigut paasitinneqarsinnaatitaaneq pillugu inatsimmik taaneqartartussami) suussusiliisimanissamik piumasaqaatip innuttaasumit eqqortinneqarsimannginnera Naalakkersuisoqarfiit innersuussutigaat.

Naalakkersuisoqarfiit marluk innuttaasoq allagaatinik kissaatigineqartunik taakkualuunniit ilaannik kingusinnerusukkut paasitippaat.

Suliat marluk Naalakkersuisoqarfiit itigartitsinerminnik aalajangiusimanniffii Ombudsmandip tamatuma kingornatigut suliarai. Pineqartut tassaapput Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik aamma Aningaasaqarnermut Naalakkersuisoqarfik.

Ombudsmandip suliani marlunni taakkunani oqaatigaa Naalakkersuisoqarfiit suussusiliisimanissamik piumaqaatip eqqortinneqarsimannginneranik oqarnerat isumaqatigigini.

Suliami siullermi Aningaasaqarnermut Naalakkersuisoqarfiup annertusisamik paasissutissiisinnaaneq isumaliutersuutigisimavaa, tamanna innuttaasup allagaatinik paasitinneqarneranik nassataqanngikkaluartoq. Ombudsmandi isumaqarpoq Naalakkersuisoqarfiup aalajangiinerata isornartorsiornissaanut tunngavissaqarani.

Ombudsmandip aammattaaq oqaatigaa oqartussaasup annertusisamik paasissutissiisoqarnissaanik naliliinerminut atatillugu tusagassiorfiit sinniisaannut immikkut akuersaartuusariaqarnerani ilisimatusartut pineqartunut ilaatinneqanngitsut.

Ombudsmandip Aningaasaqarnermut Naalakkersuisoqarfik pillugu oqaaseqaataa uani atuaruk.

Suliat aappaanni Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik isumaqarpoq annertusisamik paasissutissiineq Naalakkersuisoqarfiup nalilertussaanngikkaa nalilersinnaanaguluunniit, suussusiliisimanissamimmi piumasaqaat eqqortinneqarsimanngimmat.

Naalakkersuisoqarfiup annertusisamik paasissutissiisarnermik tunngavimmik paasinninnera Ombudsmandip isumaqatiginngilaa, oqaatigalugulu suussusiliisimanissamik piumasaqaat eqqortinneqarsimanngikkaluartorluunniit annertusisamik paasissutissiisoqassanersoq oqartussaasoq naliliisinnaasoq. Qinnuteqaateqartup tamanna qinnutigippagu oqartussaasoq annertusisamik paasissutissiisoqassanersoq tamatigut naliliisartussaavoq.

Naalakkersuisoqarfiup annertusisamik paasissutissiisoqarnissaanik isumaliutersuutiginnissimannginnera Ombudsmandip isornartorsiorpaa, innuttaasummi tamanna qinnutigisimammagu, Naalakkersuisoqarfiullu suliaq suliareqqissagaa inassutigalugu.

Ombudsmandip Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik pillugu oqaaseqaataa uani atuaruk.

Paasissutissat amerlanerusut oqarasuaatip normuanut 32 78 10-mut sianerluni pissarsiariniarneqarsinnaapput.