Inatsisartut Ombudsmandiannit misissuiartortut Meeqqat Angerlarsimaffianni Ivaaqqami meeqqanik, inuusuttunik inersimasunillu innarluutilinnik ulloq unnuarlu paaqqinniffiusumi Qaqortumiittumi 2017-imi majimi misissuipput.

Sulisut ilaqutaasullu arlallit misissuinermi oqaatigaat sulisunik amigaateqarneq paaqqinniffimmi annertuumik ajornartorsiutaasartoq – pingaartumik sapaatit akunnerisa naanerini aamma ullut akissarsiffiusut nalaanni, ullunilu taakkunani sulisut ilaat takkutinngitsoorsinnaasarput. Taamaattumik sulisut paaqqinniffimmi najugaqartunik anartarfimmi aqunngatitsinissaminnut, uffaanissaminnut sammisassaqartitsinissaminnullu ilaanneeriarlutik piffissaaleqisarsimapput.

Paasissutissat taakku Ombudsmandip isumakulunnartorujussuartut isigalugit allaaserai.

Taamaattumik Ombudsmandeqarfimmit misissuiartortut Ivaaqqamut malitseqartitsiviusumik 2018-imi septemberimi misissuiartorput.

Ombudsmandip massakkut paasisai ukuupput sulisut sulinngitsoortarnerat pissutigalugu ajornartorsiutit – taakkualu najugaqartunut kingunerisartagaat – 2017-imi majimi misissuinermi malugineqartunut sanilliullugit malunnartumik annikilleriarsimasut.

Ombudsmandi misissuineq kingulleq pillugu nalunaarusiamini tamanna tunngavigalugu ilaatigut allappoq taamatut pitsanngoriaateqarneq pitsaasorujussuusoq.

2018-imi septemberimi misissuineq pillugu nalunaarusiaq uani atuarsinnaavat.

2017-imi majimi misissuineq pillugu nalunaarusiaq uani atuarsinnaavat.

Paasissutissat amerlanerusut uani pissarsiarineqarsinnaapput: Oqarasuaat 32 78 10

Tunuliaqutaa

Ombudsmandi innuttaasut pisortat ingerlatsiviat pillugu naammagittaalliuutaannik suliarinnittarnermi saniatigut paaqqinniffinni assigiinngitsuni innuttaasut piffissami sivikinnerusumi sivisunerusumiluunniit najugaqarfigisartagaanni misissuinernik arlalinnik ukiut tamaasa aamma ingerlatsisarpoq.

Misissuinerit taakkua siunertaat tassaavoq paaqqinniffiit innuttaasunik isumaginnilluarnersut malittarisassanillu malinninnersut paasiniarlugu misissuineq. Misissuinermi taamaattumi init Ombudsmandip Ombudsmandeqarfimmilu atorfilittat misissortarpaat, kiisalu pisortaqatigiit, sulisut, najugaqartut taakkualu ilaqutaat oqaloqatigisarlugit.

Paaqqinniffiit misissuineq sioqqullugu siumut kalerrinneqareerajuttarput. Ombudsmandili kalerreeqqaarani aamma misissuiartorsinnaavoq.

Ombudsmandi misissuinerup kingornatigut nalunaarusiortarpoq. Tassani ajornartorsiutit suut Ombudsmandip misissuinermi maluginiarsimanerai Ombudsmandillu sutigut allatut iliuuseqarsinnaaneq kaammattuutigisimaneraa atuarneqarsinnaavoq.