Sapaatit akunnerini 14-imi aamma 15-imi Inatsisartut Ombudsmandeqarfianni sulisut Tunumi Tasiilami nunaqarfiinilu paasisitsiniaassapput. Ombudsmandi pillugu ilisimasaqarnerulernissaq aamma Ombudsmandimut naammagittaalliornissamut periarfissanik ilitsersuinissaq angalanerup siunertaraa.

Kikkulluunniit ornigullutik Ombudsmandip sulisuinik oqaloqateqarnissaminnut tikilluaqqusaapput. Suliaq aalajangersimasoq pillugu Ombudsmandip sulisuinik oqaloqateqarniaraanni suliaq pillugu allagaatinik peqaraanni tamaasa nassarnissaat iluaqutaassaaq.

Ombudsmandip sulisui piffissami uani naapinneqarsinnaapput:

Tasiilaq: Tallimanngorneq 6. april 2018 nal. 13-16 katersortarfimmi

Tiilerilaaq: Sapaat 8. april 2018 nal. 12-15 atuarfimmi

Kuummiit: Ataasinngorneq 9. april 2018 nal. 14-17 atuarfimmi

Sermiligaaq: Pingasunngorneq 11. april 2018 nal. 9-12 katersortarfimmi

Kulusuk: Tallimanngorneq 13. april 2018 nal. 12-15 atuarfimmi

INATSISARTUT OMBUDSMANDIAT SUNA PILLUGU IKIUISINNAAVA?

Namminersorlutik Oqartussat kiisalu kommunit ataanni pisortani oqartussaasut pillugit naammagittaalliuutit Ombudsmandip suliarisinnaavai. Pisuni aalajangersimasuni Greenland Business A/S aamma A/S Inissiaatileqatigiiffik INI pillugit naammagittaalliuutit Ombudsmandip aamma suliarisinnaavai. Kisianni eqqartuussiviit, politiit imaluunniit pinerluuteqarsimasunik isumaginnittoqarfik pillugit naammagittaalliuutit Ombudsmandip suliarisinnaanngilai.

Ombudsmandimut naammagittaalliuutit oqartussat aalajangiinerannut, assersuutigalugu pisortanit ikiorsiissutinik qinnuteqarnerup, aalisarsinnaanermut akuersissummik imaluunniit allagaatinik paasitinneqarumalluni qinnutigisap itigartinneqarneranut, aamma oqartussaasup pinninneranut, soorlu ataqqinninngitsumik aamma ilasseraanngitsumik oqaatsinik atuisimaneranut tunngassuteqarsinnaavoq. Aamma piffissaq oqartussaasup suliamik suliarinninnerminut atugaa sivisuallaarpat imaluunniit oqartussaasoq innuttaasup saaffiginnissutaanut akisimanngippat Ombudsmandimut naammagittaalliuutigineqarsinnaapput.

Ombudsmandimut naammagittaalliunnginnermi ingerlatsinermi oqartussaasumut naammagittaalliornissamut periarfissaqarsimappat taanna atoreersimassaaq.

Ombudsmandimut naammagittaalliuutit naammagittaalliuutigisap pisimaneranit ukioq ataaseq qaangiutsinnagu tunniunneqarsimassaaq.

Ombudsmandi pillugu inatsit uani atuarneqarsinnaavoq:  

http://inatsisit.gl/Lov?rid=%7bCA8F46B2-92B7-4BCF-A7CF-4ADFD9D6B969%7d&sc_lang=kl-GL