Kommunip atuarfimmi pissutsip pillugit naammagittaalliuutit arlallit tiguai. Kommunip atuarfimmi pissutsit misissoreerlugit atuarfiup pisortaata tullia mianersoqquaa.

Kommunilli suliamik suliarinninnermini suliassat suliarineqartarnerat pillugu inatsimmi suliami illua’tungiusup isumaanik tusarniaasarneq tunngavilersuisarnerlu pillugit malittarisassat eqqortissimanngilai. Tamanna Ombudsmandip oqaaseqaataani nutaami atuarneqarsinnaavoq.

Ombudsmandi ilaatigut allappoq suliami illua’tungiusup isumaanik tusarniaanermi paasissutissat ilaat atuarfiup pisortaata tullianut nassiunneqartut annertoorujussuartigut oqaaseqatigiinnik paasissaanngivissortunik imaqartut. Ombudsmandip paasinninnera unaavoq mianersoqqussut pissusiviusunik kommunip suliamik aalajangiiviginninnermini annertuumik pingaaruteqartutut isiginiagaanik amigaateqartoq.

Ombudsmandi tamanna tunngavigalu eqikkaalluni ilaatigut inerniliivoq suliami pissusiviusutigut sorpiaat tunngaviunersut suliarlu inernilerneqarnermisut sooq inernilerneqarsimanersoq suliami illua’tungiusup isumaanik tusarniaanermi paasissutissani mianersoqqussumilu namminermi erseqqarluttumik oqaatigineqarsimasut.

Ombudsmandip kommuni qinnuigaa suliaq suliareqqeqqullugu.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaammut 32 78 10-mut sianerluni pissarsiarineqarsinnaapput.

Tunuliaqutaa

Suliami illua’tungiusup isumaanik tusarniaasarneq pillugu malittarisassat ilaatigut pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi kingusinnerusukkut allannguuteqartinneqarsimasumi § 19-imiipput:

“§ 19. Suliassami (illua’tungiulluni) peqataasoq paasissutissanik aalajangersimasunik suliassami pisimasuinnut tunngasunik oqartussaasut pigisaqarnerannik ilisimasaqarsorinanngippat aalajangiisoqassanngilaq peqataasoq taanna paasissutissanik tamakkuninnga oqartussaasunit ilisimatinneqartinnagu oqaaseqaateqarnissaanullu periarfissinneqartinnagu. Aalajangigarli taanna aatsaat atortuussaaq paasissutissat peqataasumut tassunga iluaqutaasussaassanngippata suliallu aalajangiiffiginissaanut annertuumik pingaaruteqarpata. Oqartussaasut oqaaseqaateqarnissamut taaneqartumut piffissamik killiliisinnaapput.

Imm. 2. Imm. 1-imi aalajangersagaq atortuussanngilaq

[...]”

Tunngavilersuisarneq pillugu malittarisassat ilaatigut inatsimmi tassani §§-ini 22-miipput 24-miillutillu:

Ҥ 22. Aalajangiineq allakkatigut nalunaarutigineqaruni aalajangiinermut tunngaviusumik ilaqartinneqassaaq, suliami peqataasumut tassunga tapersiisuulluinnanngikkuni.

[...]

§ 24. Aalajangiinermut tunngaviusumik nalunaarummi innersuussutigineqassapput inatsisini maleruaqqusat aalajangiinermi tunngavigineqartut. Maleruaqqusat tamakku malillugit aalajangiineq oqartussaasuni sulisut isumaannik tunngaveqarpat tunngaviusumik nalunaarummi taaneqassapputtaaq pissutaasut pingaarnerusut isummat tamakkua atornerannut aalajangiisuunerusut.

Imm. 2.Tunngaviusumik nalunaarummi pisariaqarpat naatsumik erseqqissarneqassapputtaaq paasissutissat suliami pissusiviusunut tunngasut aalajangiinermi annertuumik pingaartinneqartut.

[...]”