Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissummik pisariaqarneratut piginnaatitaanani (inatsisikkut tunngavissaqarani) itigartitsissutiginninnera
Aalisarsinnaanermut akuersissummik qinnuteqaat. Inatsimmut naapertuuttumik tunngaveqarneq. Inatsisikkut tunngavigisaq
Aalisarsinnaanermut akuersissutinik qinnuteqaatimi Aalisarnermut, Piniarnermut Nunalerinermullu Naalakkersuisoqarfimmit itigartinneqarnerat A-p Ombudsmandimut naammagittaalliuutigaa.
Ombudsmandi isumaqarpoq Aalisarnermut, Piniarnermut Nunalerinermullu Naalakkersuisoqarfik A-p aalisarsinnaanermut akuersissummik qinnuteqaataasa A-p ukiumi siuliani assinganik akuersissutaateqarsimannginnera innersuussutigalugu itigartinnissaannut inatsisikkut tungavissaqarsimanngitsoq.
A-p aalisarsinnaanermut akuersissummik qinnuteqaatai Aalisarnermut, Piniarnermut Nunalerinermullu Naalakkersuisoqarfiup arlaleriarluni suliareqqittarsimavai. Ombudsmandi isumaqarpoq Naalakkersuisoqarfiup suliami aalajangiinera kingulleq A aalisarsinnaanermut akuersissumik tunineqarsinnaassagaanni piumasaqaat eqqarsaatigalugu ataatsimut immikkut akuersissuteqarnermi pineqartunut ilaanersoq naliliinerinnarmik imaqarani A-p qinnuteqaatai tunngavigalugit inuussutissarsiutigalugu aalisarsinnaanermut akuersissummik tunineqassagaanni piumasaqaatinik A eqqortitsinersoq naliliinermik imaqarsimasariaqaraluartoq.
Ombudsmandip tamanna tunngavigalugu inassuteqaatigaa A-p aalisarsinnaanermut akuersissummik qinnuteqaatai Aalisarnermut, Piniarnermut Nunalerinermullu Naalakkersuisoqarfiup suliareqqissagai, Ombudsmandillu oqaatigisai tunngavigalugit nutaamik aalajangiissasoq (oqaaseqaat 2. juni 2016-imeersoq, 2016-811-0053-imik j. normoqartoq).
Suliaq pillugu takussutissiaq
Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutinik qinnuteqaatit qinnuteqartup ukiup siuliani taamaattumik akuersissutaateqarsimannginnera innersuussutigalugu itigartitsinissamut inatsisikkut tunngavigisap qanoq paasineqarnissaanik nassuiaataata isummerfiginissaanut siusinnerusukkut periarfissaqarsimavunga. Taamaalilluni taanna Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutinik pisassiissutinillu tunineqarnissamik qinnuteqaatinik suliarinnittarneranik nammineerlunga misissuiffiginninninni (2012-902-0001-imik j. normoqartumi) suliarineqarpoq. Suliami tassani oqaaseqaatiga 18. december 2013-imeersoq 2013-imi ukiumoortumik nalunaarutinni immikkoortutut 5.6-itut ilanngunneqarpoq.
Suliaq nammineerluni misissuiffiginninnermut tunngasoq pillugu oqaaseqaatinni ilaatigut oqaatigaara Naalakkersuisoqarfiup aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni nr. 1-imi, 2. februar 2012-imeersumi (matuma kingornatigut akuersissutit pillugit nalunaarummik 2012-imeersumik taaneqartartussami) § 4, imm. 2-mi imaattumik aalajangersaanissaminut tunngavissaqarnera qularnartutut isigigiga:
“Aalisarsinnaanermut akuersissut taamaallaat angallatinut suliffeqarfinnulluunniit ukiup siuliani taassuma assinganik aalisarsinnaanermut akuersissutaateqarsimasunut taassuminngalu atuisimasunut qinnuteqartoqarneratigut tunniunneqartarpoq.”
Suliamili matumani aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni nr. 9-mi, 17. juli 2014-imeersumi (matuma kingornatigut akuersissutit pillugit nalunaarummik 2014-imeersumik taaneqartartussami) § 4, imm. 2-mi imaattumik aalajangersaasoqarsimanera pineqarpoq:
“Aalisarsinnaanermut akuersissut taamaallaat angallatinut suliffeqarfinnulluunniit ukiup siuliani taassuma assinganik aalisarsinnaanermut akuersissutaateqarsimasunut qinnuteqartoqarneratigut tunniunneqartarpoq.”
Suliami matumani Aalisarnermut, Piniarnermut Nunalerinermullu Naalakkersuisoqarfimmut allaffigeqatiginnittarninni suliami nammineerluni misissuiffiginninnermut tunngasumi allaffigeqatigiittarsimanermi allagaasimasunut arlaleriarluni innersuussisoqartarmat nammineerluni misissuiffiginninnermi suliap ingerlasimanerata ilai matumunnga attuumassuteqartut allaaseraakka.
Suliaq A-p naammagittaalliuutaanut tunngasoq tamatuma kingornatigut allaaseraara.
A-p 2016-imi januarimi uannut saaffiginnissutaa suliamut akuliutsinneqarninni siulliunngilaq. Taamaalilluni A-p aalisarsinnaanermut akuersissummik qinnuteqaammi Aalisarnermut, Piniarnermut Nunalerinermullu Naalakkersuisoqarfimmit suliarineqarnera uannut siullermik 10. april 2015-imi naammagittaalliuutigaa. Suliaq suliareqqinneqarniartoq Naalakkersuisoqarfiup 26. juni 2015-imi nalunaarfigimmanga suliamik suliarinninnera unitsikkallarpara. Suliap ingerlasimanera A-p naammagittaalliuuta siulleq pillugu immikkoortumi allaaserineqarpoq.
A-p qinnuteqaammi Aalisarnermut, Piniarnermut Nunalerinermullu Naalakkersuisoqarfiup aalajangiineratigut 18. august 2015-imeersukkut itigarteqqinneqarnera 28. august 2015-imi uannut naammagittaalliuutigaa. Naalakkersuisoqarfiup 21. december 2015-imi nalunaarfigaanga A-p aalisarsinnaanermut akuersissummik qinnuteqaataa suliareqqinneqarniartoq, taamaattumillu suliamik suliarinninnera 22. december 2015-imi unitsippara. Suliap ingerlasimanera taanna A-p naammagittaalliuutaata aappaa pillugu immikkoortumi allaaserineqarpoq.
Aalisarnermut, Piniarnermut Nunalerinermullu Naalakkersuisoqarfiup aalajangiinera 8. januar 2016-imeersoq A-p uannut 12. januar 2016-imi naammagittaalliuutigaa. Naammagittaalliuutip taassuma suliarineqarnera oqaaseqaammi matumani sammineqarpoq. Suliap ingerlasimanera A-p naammagittaalliuutaasa pingajuat pillugu immikkoortumi sukumiinerusumik allaaserineqarpoq.
Suliap ingerlasimanera
Suliaq nammineerluni misissuiffiginninnermut tunngasoq (2012-902-0001-imi j. normoqartoq)
Suliami matumani isumaliutersuutikka pillugit sukumiinerusumik nassuiaateqalersinnanga suliami nammineerluni misissuiffiginninnermut tunngasumi allagaatit suliamut matumunnga attuumassuteqartut oqaatigineqareersutut allaaseraakka.
Suliami nammineerluni misissuiffiginninnermut tunngasumi oqaaseqaatinnut missingiut Aalisarnermut, Piniarnermut Nunalerinermullu Naalakkersuisoqarfimmut tusarniaatigalugu 30. oktober 2013-imi nassiuppara. Naalakkersuisoqarfiup 13. december 2013-imi nalunaarfigaanga Naalakkersuisoqarfik missingiut pillugu oqaaseqaatissaqanngitsoq, sulianillu suliarinnittarneq kaammattuutigisannut naapertuuttunngortinneqarniartoq.
Aalisarnermut, Piniarnermut Nunalerinermullu Naalakkersuisoqarfiup suliamik suliarinninnermut atatillugu allakkatigut 28. juni 2013-imeersutigut nalunaarfigaanga akuersissutit pillugit nalunaarummi 2012-imeersumi § 4, imm. 2-mut inatsisikkut tunngaviusoq tassaasoq aalisarneq pillugu Inatsisartut inatsisaanni (matuma kingornatigut aalisarneq pillugu inatsimmik taaneqartartussami) § 10, imm. 1. Oqaaseqaatinni 18. december 2013-imeersumi inatsiseqartitsinermik paasinninnera pillugu ilaatigut imaattunik oqaaseqaateqarpunga:
“[...]
Uanga pingaarnertut naliliinera unaavoq aalisarneq pillugu inatsimmi § 10-mi aalajangersakkap siunertaa, tak. aalajangersagaq taanna pillugu oqaaseqaatit – aalisarneq pillugu inatsimmi § 6-imut ataneqarluni – tassaavoq nungusaataanngitsumik aalisarneq Aalisarnermut, Piniarnermut Nunalerinermullu Naalakkersuisoqarfiup qulakkeersinnaassagaa, tassanilu ilaatigut pisaqarsinnaassutsip piusup agguataarneqarnera isiginiarneqassalluni, taamatuttaarlu aalisartut kalaallinut inuiaqatigiinnut aalajangersimasumik attuumassuteqartut aalisarnermi salliutinneqassasut.
§ 4, imm. 2-mi aalajangersakkap Kalaallit Nunaanni nungusaataanngitsumik aalisarneq qulakkiiginnassanngilaa. Aalajangersagarli taanna qinnuteqartup inuussutissarsiornissamut periarfissaanut toqqaannartumik akuliuttuuvoq, tassami aalajangersakkap taassuma atuunnermini ukiup siuliani qaleralinniareersimanngikkaanni ukiumi pineqartumi qaleralinniarnissaq ajornarsisimmagu. Taamaalilluni nalunaarummi [akuersissutit pillugit nalunarummi 2012-imeersumi] § 4, imm. 2-mi aalajangersagaq aalisarneq pillugu inatsimmi § 10-p siunertaata imaanik qaangiisuuvoq.
Taamaattumik aalisarneq pillugu inatsimmi § 10 nalunaarummi [akuersissutit pillugit nalunaarummi 2012-imeersumi] § 4, imm. 2-mi aalajangersakkamut inatsisikkut tunngaviusinnaanersoq qularnartutut isigaara.
[...]”
Naammagittaalliuutit arlallit Aalisarnermut, Piniarnermut Nunalerinermullu Naalakkersuisoqarfiup inatsisikkut tunngavigisap qanoq paasineqarnissaanik nassuiaaneranut erseqqarlutsitsisut 2014-imi tiguakka. Naalakkersuisoqarfik allakkatigut 23. maj 2014-imeersutigut qinnuigaara tamanna pillugu oqaaseqaateqaqqullugu. Naalakkersuisoqarfimmut tamatuma saniatigut ilaatigut imatut allappunga:
“[...]
Massakkut 2014-ip ingerlanerani Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutinik qinnuteqaatinut itigartitsissutai pillugit naammagittaalliuutit pingasut tiguakka. Itigartitsinerit tamarmik 2014-ip ingerlanerani ullunerneqarsimapput (kingulleq majip qaammataani). Itigartitsissutit tamarmik nalunaarummi aalajangersagaq qulaani taaneqartoq tunngavigalugu itigartitsissutigineqarsimapput.
[...]
Taamaattumik manna iluarinanngilluinnartutut isigaara, tassalu inatsisikkut tunngavissaqarneq eqqarsaatigalugu ajornartorsiummik uanga paasinninnera pillugu oqaaseqaatissaqarani (matumani Naalakkersuisoqarfiup suliamik suliarinninnera kaammattuutinnut napertuuttunngortinneqarniartoq ilanngullugu eqqarsaatigalugu) Naalakkersuisoqarfiup nalunaarfigigaanga, tamatumunngali peqatigitillugu periaasitoqqani nangiinnarlugu – uanga inatsiseqartitsinermi paasinninnerma paarlattuanik.
[...]”
Aalisarnermut, Piniarnermut Nunalerinermullu Naalakkersuisoqarfiup saaffiginnissutiga allakkatigut 27. maj 2014-imeersutigut ilaatigut imatut akivaa:
“[...]
Akuersissutinik tunniussisarnermi periutsinik naalakkersuisoqarfik allannguinikuuvoq, Ombudsmandip decembarip 13-iani 2013-imi oqaaseqarnerata kingorna. Taamaalilluni ilisimatitsissutigineqarsinnaavoq, ukiup tullissaanut aalisarnissamut akuersissummik tunineqassagaanni taava ukiup siuliani akuersissutip tunniunneqartup atorneqarsimanissaa naalakkersuisoqarfimmit piumasaqaataajunnaarmat.
Taamaattorli naalakkersuisoqarfiup piumasaqaat manna aalajangiusimavaa, tassalu qinnuteqartup ukiup siuliani akuersissummik assingusumik pereersimanissaa qinnuteqartup aalisarfissami ataatsimi immikkoortoq 47-tut taaneqartumi inuussutissarsiutigalugu aalisarnissani kissaatigippagu Diskobugtimi, Uummannami kiisalu Upernavimmi immikkoortoq 47-mut atatillugu piumasaqaatip aalajangiusimaannarneqarneranut pissutaavoq, immikkoortup tamatuma peqassutsimigut aalisarfiuallaarnissaa naleqqutinngimmat. Piumasaqaat tamanna aalisarnermut inatsimmi § 10-mut naapertuuttuusoq naalakkersuisoqarfiup nalilermagu, Ombudsmandip oqaaseqaataanut atatillugu naalakkersuisoqarfik allatut isummernissaminut pissutissaqarsorinngilaq.
Periutsip taassuma inatsisitigut naleqqussarneqarnera sukkulluunniit nalornisoorutigeqqunagu, inatsisip naleqqussarneqarnissaa naalakkersuisoqarfiup sulissutigilerpaa ilaatigut akuersissuteqartarnermi periutsit nutaat ataatsimoortinneqalernerannik kinguneqartussaq. Naatsorsuutigineqarpoq periusissaq tamanna sapaatip akunnerini tulliuttuni naammassineqarumaartoq.”
Aalisarnermut, Piniarnermut Nunalerinermullu Naalakkersuisoqarfimmut 1. juli 2014-imi ilaatigut imatut allappunga:
“[...]
Naalakkersuisoqarfiup allagai imatut paasivakka aalisarsinnaanermut akuersissutit pisassiissutillu pillugit Namminersornerullutik Oqartussat nalunaarutaanni § 4, imm. 2-mik inatsiseqartitsinikkut uanga paasinninnera Naalakkersuisoqarfiup malissimagaa, taamalu periaatsini allanngortissimagaa.
Naalakkersuisoqarfiulli allagai aamma imatut paasisariaqarpakka nalunaarummi § 4, imm. 2-p nunap ilaani aqutsisoqarfiit erseqqinnerusumik taaneqartut eqqarsaatigalugit atuuttutut isigineqarnissaa toqqarsimagaa. Tamanna akuersissutinik itigartitsinerit pillugit sulianut nutaanut allakkanni 23. maj 2014-imeersunut aamma naapertuuttuusorinarpoq, taakkunanilu nalunaarummi § 4, imm. 2-p itigartitsinermut inatsisikkut tunngavittut oqaatigineqartarsimavoq.
Naalakkersuisoqarfiup nalunaarummi § 4, imm. 2-mut inatsisikkut tunngavigisaq eqqarsaatigalugu aqutsiveqarfimmit aqutsiveqarfimmut assigiinngitsunik qanoq iliorluni periaaseqarsinnaanera uannut imaaliallaannaq paasiuminaappoq. Aalajangiisuusoq unaavoq nalunaarummi § 4, imm. 2 aalisarneq pillugu inatsimmi pisariaqarneratut tunngavissaqarnersoq - imaanngitsoq aalajangersagaq taanna naleqquttuutitsinermik isiginninneq aallaavigalugu nunap ilaani aalajangersimasuni naleqquttuunersoq.
[...]”
Inatsisartut Inatsisinut Ataatsimiititaliaat Aalisarnermut, Piniarnermut Nunalerinermullu Naalakkersuisoqarfimmik allaffigeqatiginnittarsimaninnik ulloq taanna ilisimatippara. Inatsisartut Inatsisinut Ataatsimiititaliaata Aalisarnermut, Piniarnermut Nunalerinermullu Naalakkersuisumut allagaasa 6. marts 2015-imeersut assilinerat tamatuma kingornatigut tiguara. Allakkanit taakkunannga erserpoq Aalisarnermut, Piniarnermut Nunalerinermullu Naalakkersuisoqarfiup periaatsiminik inassuteqaatikka malillugit naleqqussaasimalluni oqaraluarluni ilaannakortumik taamaaliorsimanera Inatsisinut Ataatsimiititaliap akuerineqarsinnaanngitsutut isigigaa.
Kiisalu oqaatigaara akuersissutit pillugit nalunaarut 2012-imeersoq 17. juli 2014-imi atorunnaarsinneqarmat, akuersissutillu pillugit nalunaarut 2014-imeersoq atortuulerluni. Tamannalu tunngavigalugu A-p naammagittaalliuutaa siulleq 10. april 2015-imi tiguara. Suliap taassuma ingerlasimanera tulliuttuni sukumiinerusumik allaaserineqarpoq.
A-p naammagittaalliuutaa siulleq (2015-811-0048-mik j. normoqartoq)
A-p 2014-imi sinerissamut qanittumi inuussutissarsiutigalugu saarullinniarsinnaanermut immikkut akuerineqarnissanik K Kommuni aqqutigalugu Aalisarnermut, Piniarnermut Nunalerinermullu Naalakkersuisoqarfimmut 8. september 2014-imi qinnutigaa. A-p qinnuteqaammini oqaatigaa “nalunaarummi 2014-imeersumi § 5” tunngavigalugu qinnuteqarluni.
A-p qinnuteqaataa Aalisarnermut, Piniarnermut Nunalerinermullu Naalakkersuisoqarfiup allakkatigut 2. oktober 2014-imeersutigut itigartippaa: Aalajangiinermit makku ilaatigut erserput:
“[...]
2014-imi umiatsiaararsorluni saarullinniarnissamut akuersissummik qinnuteqarputit. Misissuinitsinni paasivarput siornatigut umiatsiaararsorluni saarullinniarsinnaanermut akuersissummik peqarsimanngitsutit.
Ukioq 2014-imi saarullinniarsinnaanermut akuersissummik tunineqassaguit aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni nr. 9-imi, 17. juli 2014-imeersumi § 4, imm. 2-mi piumasaqaat naammassisimassavat:
“Aalisarsinnaanermut akuersissut taamaallaat inunnut suliffeqarfinnulluunniit ukiup siuliani taassuma assinganik aalisarsinnaanermut akuersissuteqarsimasunut [erseqqissaaneq tassaneerpoq, uanga ilanngussara] qinnuteqartoqarneratigut tunniunneqartarpoq.”
Umiatsiaararsorluni saarullinniarsinnaanermut akuersissummik tunineqarnissamut piumasaqaat qulaani pineqartoq naammassisimanngilat, taamaammat Aalisarnermut, Piniarnermut Nunalerinermullu Naalakkersuisoqarfimmit qinnuteqaatit itigartinneqarpoq.”
A Aalisarnermut, Piniarnermut Nunalerinermullu Naalakkersuisoqarfimmut e-mailimi 3. oktober 2014-imeersumi ilaatigut imatut allappoq:
“Siullermik erseqqissalaarusuppara nalunaarummi pineqartumi § 5, stk. 5. aallaavigalugu saarullinniarnissamut akuersissummik qinnuteqaammik nassiussigama.
Akissuteqaatit toqqammavigalugu apeqqutigerusuppara, § 5 stk. 5-ip suna siunertarivaa???
Tassami imatut allaqqavoq, "Imm. 5. Saarullinniarnermi tunisinikkut killilersuisoqartinnagu imm. 1-imiit tamanut atuuttumik immikkut akuersisoqarsinnaavoq".
Uanga imatut nassuiaaserpara, siusinnerusukkut akuersissuteqarsimanissamik piumasaqaat qulaatiinnarlugu, immikkut akuerineqarnikkut akuersissummik tunniussisoqarsinnaasoq.
Qulaani nassuaatiga innersuussutigalugu qinnuteqaatima aallaqqaataaniit suliareqqinneqarnissaa matumuuna inussiarnersumik noqqaassutigissavara.”
A-p 20. marts 2015-imi sinerissamut qanittumi inuussutissarsiutigalugu saarullinniarsinnaanermut akuersissut Aalisarnermut, Piniarnermut Nunalerinermullu Naalakkersuisioqarfimmut qinnutigaa. Allakkani nassitsissutini A-p aammattaaq oqaatigaa nalunaarummi nr. 9-mi, 17. juli 2014-imeersumi § 5 tunngavigalugu qinnuteqarluni.
A-p qinnuteqaataa Aalisarnermut, Piniarnermut Nunalerinermullu Naalakkersuisoqarfiup allakkatigut 30. marts 2015-imeersutigut itigartippaa. Aalajangiinermit ilaatigut makku erserput:
“[...]
2015-imi umiatsiaararsorluni saarullinniarsinnaanermut akuersissummik qinnuteqarputit. Misissuinitsinni paasivarput siornatigut umiatsiaararsorluni saarullinniarsinnaanermut akuersissummik peqarsimanngitsutit.
Ukioq 2015-imi saarullinniarsinnaanermut akuersissummik tunineqassaguit aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni nr. 9-imi, 17. juli 2014-imeersumi § 4, imm. 2-mi piumasaqaat naammassisimassavat:
“Aalisarsinnaanermut akuersissut taamaallaat inunnut suliffeqarfinnulluunniit ukiup siuliani taassuma assinganik aalisarsinnaanermut akuersissuteqarsimasunut [erseqqissaaneq tassaneerpoq, uanga ilanngussara] qinnuteqartoqarneratigut tunniunneqartarpoq.”
Umiatsiaararsorluni saarullinniarsinnaanermut akuersissummik tunineqarnissamut piumasaqaat qulaani pineqartoq naammassisimanngilat, taamaammat Aalisarnermut, Piniar-nermut Nunalerinermullu Naalakkersuisoqarfimmit qinnuteqaatit itigartinneqarpoq.”
A tamatuma kingornatigut uannut e-mailikkut 10. april 2015-imeersukkut naammagittaalliorpoq. A-p 3. oktober 2014-imi mailiata naqitanngortinneqarnera aamma Aalisarnermut, Piniarnermut Nunalerinermullu Naalakkersuisoqarfiup itigartitsissutai 2. oktober 2014-imeersoq aamma 30. marts 2015-imeersoq mailimut 10. april 2015-imeersumut kakkiunneqarsimapput.
Sulisuma ilaata A 20. april 2015-imi sianerfigaa naammagittaalliuutaa pillugu erseqqinnerusumik paasiniaalluni. A-p oqaatigaa Diskobugtimi, Uummannami Upernavimmiluunniit aalisarsinnaanermut akuersissut qinnutigisimanngikkini.
Aalisarnermut, Piniarnermut Nunalerinermullu Naalakkersuisoqarfik allakkatigut 11. maj 2015-imeersutigut qinnuigaara suliaq pillugu oqaaseqaateqaqqullugu kiisalu suliami allagaatinik A-p uannut naammagittaalliuutaani ilaanngitsunik peqarpat taakku nassiuteqqullugit. Naalakkersuisoqarfimmut ilaatigut imatut allappunga:
“[...]
Naalakkersuisoqarfik pingaartumik qinnuigaara Naalakkersuisoqarfiup Atorfeqarfimmalu aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni nr. 1-imi, 2. februar 2012-imeersumi taamani atuuttumi § 4, imm. 2-mi aalajangersakkamut inatsisikkut tunngavigisaq pillugu siusinnerusukkut allaffigeqatigiittarsimaneranni allagaasimasut isiginiarlugit suliaq pillugu nassuiaateqaqqullugu. Naalakkersuisoqarfiup suliaataasa normui 2012-078197 aamma 2014-100269 innersuussutigaakka, Naalakkersuisoqarfiullu e-mailii 13. december 2013-imeersoq aamma 27. maj 2014-imeersoq, allakkakka 18. december 2013-imeersut, 23. maj 2014-imeersut aamma 1. juli 2014-imeersut kiisalu Inatsisartut Inatsisinut Ataatsimiititaliaata allagai 6. marts 2015-imeersut immikkut maluginiaqquakka.
Naalakkersuisoqarfik aammattaaq qinnuigaara [A-p] aalisarsinnaanermut akuersissutit pisassiissutillu pillugit nalunaarummi nr. 9-mi, 17. juli 2014-imeersumi atuuttumi § 5, imm. 5 tunngavigalugu immikkut akuersissummik qinnuteqaataa sunik isumaliutersuuteqarnissamut suliamilu iliuuseqarnissamut pissutissaqalersitsisimanersoq pillugu nassuiaateqaqqullugu. Oqaatigaara Naalakkersuisoqarfiup allagai 30. marts 2015-imeersut immikkut akuersissuteqartoqarnissaanik apeqqummut isummernermik erseqqivissumik imaqanngitsut.
[...]
Qinnutigisara Aalisarnermut, Piniarnermut Nunalerinermullu Naalakkersuisoqarfiup allakkatigut 26. juni 2015-imeersutigut akivaa. Allakkani taakkunani Naalakkersuisoqarfiup allagaani 27. maj 2014-imeersumi nunap ilaani aalajangersimasuni inuussutissarsiutigalugu aalisarsinnaanermut akuersissummik tunniussisoqassappat qinnuteqartup ukiup siuliani akuersissutaateqarsimanissaanik piumasaqaatip aalajangiusimaneqarnera innersuussutigineqarpoq. Allakkannut 1. juli 2014-imeersunut aammattaaq innersuussisoqarsimavoq, tassanilu oqaatigaara Naalakkersuisoqarfiup ingerlatsiveqarfimmit ingerlatsiveqarfimmut immikkoortitsimanera paatsuunganartutut o-qaatigisariaqariga. Naalakkersuisoqarfiup allagaanit ilaatigut makku erserput:
“[...]
Naalakkersuisoqarfiulli isummerneraa aalisarneq pillugu inatsisip § 10-a inatsisitigut toqqammaviliisoq maannakkut aalisarnermut akuersissutit aamma pisassiissutit pillugit Namminersorlutik Oqartussat nalunaarutaannut nr. 9-mut 17. juli 2014-imeersumut. Naalakkersuisoqarfiup periusaa paragrafini taakkunani marlunni oqaasertamut naapertuussimavoq taamanikkulli nammineerluni suliniuteqarluni misissuinermut tunngatillugu Ombudsmandip inatsimmut toqqammaveqartoqannginnera uparuarmaguli. Allatut oqaatigalugu Naalakkersuisoqarfik piffissamut nammineerluni suliniuteqarluni misissuinerup kingorna aamma nalunaarutip juli 2014-imi allanngortinneqarnissaata tungaanut siusinnerusukkut piumasaqaataasimasoq isiginiarsimanngilaa, tassalu akuersissut iluaqutigineqarsimasuussasoq.
Naalakkersuisoqarflk isumaqarpoq aalisarneq pillugu § 10-mi aalajangersagaq tunngaviliisoq aalisarnerup iluarsiivigineqarnissaani malittarisassanik aalajangersaasinnaanissamut inuussutissarsiutigalugu aalisarnermut inuussutissarsiortut appakaassinnaanerisa nalaani, ilanngullugulu aalajangersakkamit pingaarnerusutigut siunertarineqarmat qulakkiissallugu aalisartut aningaasaqarniarnikkut imminut akilersinnaasumik inuussutissarsiornerminnut toqqammaveqarnissaat, tamannalu pisarluni § 2-p kingunerisaanik aalisagaqatigiinnik piujuartitsineq aallaavigalugu illersorneqarsinnaasumik iluaqutiginninneq pilliutiginagu.
Naalakkersuisoqarfik aalajangersakkamut immikkut ittumik oqaaseqaatini taamatut paasinninnerminut taperserneqarpoq (takukkit § 10-mut immikkut ittumik oqaaseqaatit aalisarneq pillugu Inatsisartut inatsisaata nr. 18-ip, 31. oktober 1998-imeersup akuersissutigineqarneranut atatillugu):
“Siunertarineqarpoq aalisarnermit iluarsaassineq ingerlanneqarsinnaasoq inuussutissarsiortut mianeralugit, tassalu Naalakkersuisut inuussutissarsiortunut aalajangersimasunut inuussutissarsiutigalugu aalisarsinnaanerat nangaassuteqarfigineqarsinnaammat.
Tamanna Avannaani qaleralinniarluni aalisarnermi maannakkut pisinnaavoq, tassanimi pisariaqalersinnaammat sulinermik inuussutissarsiutilinnik ilaatitsinngitsoorsinnaaneq, taakkununnga ilanngullugit kilisaatini aalisariutinilu inuttat – tamakku aningaasarsisinneqartartut inuussutissarsiutigalugu qaleralinniarluni aalisarnermi peqataasinnaanermit isumaqatigiissutini sulisunullu isumaqatigiissutini sinaakkutissatut aalajangersarneqarsimasut tunngavigalugit. Taamatuttaaq siunertaavoq Naalakkersuisut aalisartunik ilaa-titsinngitsoorsinnaasut aalisakkanut aalajangersimasunut aalisarsinnaanermut akuersissuteqareersunik.”
Tamanna naapertuussorinarpoq allakkassinni 18. december 2013-imeersuni oqaaseqaatigisimasanut.
“Pingaarnerusutigut naliliinerivara, aalisarneq pillugu inatsimmi § 10-imi aalajangersakkami siunertarineqartoq, takukkit aalajangersakkamut tassunga oqaaseqaatit, aali-sarneq pillugu inatsimmi § 6-imut sanilliullugu, tassalu Aalisarnermut, Piniarnermut Nunalerinermullu Naalakkersuisoqarfimmit imminut akilersinnaasumik aalisarneq qu-larnaarneqarsinnaassasoq, tassani llaatigut mianerineqassasoq pisaqarsinnaassutsimi maannakkut atorneqartumi agguaassineq taamatuttaarlu aalisarneq ingerlanneqassa-soq aalisartunit inuiaqatigiinnut kalaallinut aalajangersimasumik atassuteqartunut.”
Paasiuminarnerussammat oqaatigineqassaaq Naalakkersuisoqarfimmit paasineqanngimmat taanna inatsimmit aqutsisoqarfimmiit aqutsisoqarfimmut assigiinngisitsilluni pinninnermut inatsisitigut toqqammaviliisutut, ilanngullugulu assigiinngisitsisarsimanerit periuserineqarsimanngitsut.
Tamannali pillugu Naalakkersuisoqarfiup oqaasertalersuinera allakkani 27. maj 2014-imeersumi ajuusaarnaraluartumik erseqqarissuusimanngilaq. Tamanna pillugu siusinnerusukkut Naalakkersuisoqarfimmit attaveqaqatigiittarnerni tamanna ersarinnerusumik oqaatigisimanngimmagu ajuusaarutigissavara, taamatullu tamanna siusinnerusukkut Ombudsmandip suliarinninneranut ilaatinneqarsinnaasimannginnera aalisarsinnaanermut akuersissutinik Naalakkersuisoqarfiup sulianik suliarinninneranut atatillugu.
Ilanngullugu oqaatigineqassaaq Naalakkersuisoqarfimmit allakkani 27. maj 2014- imeersuni immikkoortumi kingullerpaami naalakkersuisoqarfiup nassuiaatigisimasaanut naapertuuttumik inatsisip allanngortinnissaa isumagisimammagu. Allannguineq atortuulerpoq 4. juni 2015.
Suliamut aalajangersimasumut tunngatillugu itigartitsineq nalunaarutigineqartoq tunngaveqarpoq [A-p] siusinnerusukkut inuussutissarsiutigalugu aalisarnermut akuusimannginnera, taamaasillunilu inuussutissarsiutigalugu aalisarsinnaanermut akuersissuteqanngisaannarsimalluni.
[...]
Immikkut ittumik akuersissummik qinnuteqaat pillugu:
Ajuusaarnaraluartumik Naalakkersuisoqarfimmit [A-p] immikkut ittumik akuerineqarnissamik qinnuteqaataa suliarineqarsimanngilaq § 5, imm. 5-imut Namminersorlutik Oqar-tussat nalunaarutaanni nr. 9-mi 17. juli 2014-imeersumi aalisarnermut akuersissutit pisassiissutillu pillugit.
Tamanna tunngavigalugu Naalakkersuisoqarfiup suliaq suliareqqinniarpaa nutaamik nalilerlugu.
Tamatuma kingornatigut Naalakkersuisoqarfimmit [A] attaveqarfigineqarumaarpoq.
Paasiuminarnerussammat oqaatigineqassaaq erseqqissaassutigineqaqqinnikuummat sullissisunut aqutsinermi inatsisitigut malittarisassat aamma pitsaasumik aqutsisarnerrni ileqqut eqquutinneqartarnissaat.”
Suliami allagaatit amerlanerusut Aalisarnermut, Piniarnermut Nunalerinermullu Naalakkersuisoqarfimmit 30. juni 2015-imi tiguakka, matumani A-p Naalakkersuisoqarfimmut qinnuteqaataa 8. september 2014-imeersoq aamma 20. marts 2015-imeersoq kiisalu allakkat nassiussissutit allakkanut taakkununnga atasut ilanngullugit eqqarsaatigalugit.
A allakkatigut 15. juli 2015-imeersutigut nalunaarfigaara suliamik suliarinninnera unitsikkiga, isumaqaramami suliap Aalisarnermut, Piniarnermut Nunalerinermullu Naalakkersuisoqarfimmit uangalu Atorfeqarfinnit ataatsikkut suliarineqarnera naleqquttuunngitsoq. Tamanna Naalakkersuisoqarfimmut ulloq taanna aamma nalunaarutigaara.
A-p aappassaanik naammagittaalliuutaa (2015-811-0051-imik j. normoqartoq)
A Aalisarnermut, Piniarnermut Nunalerinermullu Naalakkersuisoqarfimmut e-mailimi 21. juli 2015-imeersumi ilaatigut imatut allappoq:
“Ombudsmandip allagaasigut 15. juli 2015-imeersutigut 2015-811-0048-mik j. normoqartutigut nalunaarfigineqarpunga saarullinniarsinnaanermut akuersissummik qinnuteqaatiga suliareqqinniarlugu APNN [Aalisarnermut, Piniarnermut Nunalerinermullu Naalakkersuisoqarfik, uanga ilanngussara] aalajangertoq. APNN-ip Ombudsmandimut allakkamigut 2015-115025-mik suliatut normoqartutigut, 1970519-imik all. normoqartutigut 26. juni 2015-imeersutigut nalunaarutigaa kingusinnerukkut attaveqarfiginiarlunga.
APNN-imit suli attaveqarfigineqarsimannginnama taanna ilungersorlunga matumuuna qinnuigeqqippara qinnuteqaatiga sapinngisamik pilertornerpaamik suliareqqullugu, tassami qinnuteqaatima nassiunneqarneranit ukiup affaata missaa ingerlareersimalermat.
APNN tamatumunnga atatillugu qinnuiginiarpara Ombudsmandimut naammagittaalliuutigisama tunngavia pillugu oqaaseqaateqaqqullugu. APNN-ip aalajangiinera pillugu naammagittaalliuutinnut tunngaviusoq tassaavoq Tunngaviusumik Inatsimmi § 74, isumaqarpungalu taanna uanga inuussutissarsiorsinnaatitaaninnut tunngaviusumik aalajangiisuusoq, taamaattumillu APNN-p itigartitsinera innuttaasutut pisinnaatitaaffinnut ilungersunartumik toqqaannartumillu akuliunnertut isigaara.
APNN-ip Ombudsmandimut allakkamini naggasiutitut oqaatigaa ingerlatsineq pillugu inatsiseqartitsinermi malittarisassat ingerlatsinermilu ileqqorissaarneq pillugu malittarisassat malinneqassasut sulianik suliarinnittunut erseqqissaqqinneqarsimasoq.
Taamaattumik sukumiisumik pilertortumillu akissutisinissara naatsorsuutigaara.” (Atorfeqarfimmi nutsigaavoq)
A-p Aalisarnermut, Piniarnermut Nunalerinermullu Naalakkersuisoqarfik e-mailimut qulaani taaneqartumut akissuteqaqqullugu e-mailikkut 12. august 2015-imeersukkut nukingisaarpaa.
Aalisarnermut, Piniarnermut Nunalerinermullu Naalakkersuisoqarfiup A 18. august 2015-imi akivaa. E-mailimit tassannga ilaatigut makku erserput:
“Namminersorlutik Oqartussaat nalunaarutaanni nr. 9-mi, 17. juli 2014-imeersumi aalisarsinnaassagaanni piumasaqaatit atortinneqannginnissaannik qinnuteqaatit Aalisarner-mut, Piniarnermut Nunalerinermullu Naalakkersuisoqarfiup tiguaa. Qinnuteqaatinnit erserpoq nalunaarummi § 5, imm. 5-ip umiatsiaararsorluni saarullinniarnissaq siunertaralu-gu atortinneqannginnissaa qinnuteqaatigigit.
Naalakkersuisoqarfiup tamatumunnga atatillugu nalunaarutigissavaa immikkut akuersissuteqartoqarnissaanik qinnuteqaat akuerineqarsinnaanngitsoq.
Tamatumunnga pissutaavoq Namminersorlutik Oqartussat nalunaarutaanni nr. 9-mi, 17. juli 2014-imeersumi § 5, imm. 5-imi nunap ilaani aalajangersimasumi tamanut ataatsimut akuersissuteqarnissamut periarfissap pineqarnera. Taamaattumik aalajangersagaq taanna innersuussutigalugu inummut ataatsimut immikkut akuersissummik tunniussinissamut periarfissaqanngilaq.” (Atorfeqarfimmi nutsigaavoq)
A uannut e-mailikkut 28. august 2015-imeersukkut naammagittaallioqqippoq, mailikkut allaffigeqatigiittarnermi qulaani taaneqartumi mailit naqitanngortinneri ilanngullugit nassiullugit.
Aalisarnermut, Piniarnermut Nunalerinermullu Naalakkersuisoqarfik allakkatigut 20. november 2015-imeersutigut qinnuigaara suliaq pillugu amerlanerusunik oqaaseqaatissaqaruni taakku saqqummiuteqqullugit. Naalakkersuisoqarfiup allakkatigut 21. december 2015-imeersutigut imatut akivaanga:
“Allakkatit 20. november 2015-imeersut innersuussutigalugit Naalakkersuisoqarfiup nalunaarutigisinnaavaa [A-p] umiatsiaararsorluni saarullinniarsinnaanermut akuersissummik qinnuteqaataata suliareqqinneqarnissaa Naalakkersuisoqarfiup toqqaraa. Tamanna illit saaffiginnissutit tunngavigalugu pivoq, Naalakkersuisoqarfiummi paasimmagu suliamik suliarinninnermi kukkussuteqartoqarsimasoq. [A-p] umiatsiaararsorluni saarullinniarsinnaanermut akuersissummik qinnuteqaataanut itigartitsissummi Namminersorlutik Oqartussat nalunaarutaanni nr. 9-mi, 17. juli 2015-imeersumi § 5, imm. 5 kukkunikkut innersuussutigineqarsimavoq.
Naalakkersuisoqarfiup [A] ullumikkut allaffiginiarpaa, ilisimatillugulu qinnuteqaataa suliareqqinneqarniartoq, ullut 14-it qaangiutsinnagit naammassineqartussamik.” (Atorfeqarfimmi nutsigaavoq)
Taamaalilluni Aalisarnermut, Piniarnermut Nunalerinermullu Naalakkersuisoqarfiup A ulloq taanna nalunaarfigaa qinnuteqaataa Naalakkersuisoqarfiup suliareqqileraa. A tamanna tunngavigalugu 22. december 2015-imi nalunaarfigaara suliamik misissuinera unitsikkiga, tassami Aalisarnermut, Piniarnermut Nunalerinermullu Naalakkersuisoqarfiup uangalu suliamik ataatsikkut suliarinninnerput naleqquttutut isiginnginnakku. Naalakkersuisoqarfik ulloq taanna qinnuigaara suliami nutaamik aalajangiinerup assilinera uannut nassiuteqqullugu.
A-p pingajussaanik naammagittaalliuutaa (2016-811-0053-mik normoqartoq)
Aalisarnermut, Piniarnermut Nunalerinermullu Naalakkersuisoqarfik suliami 8. januar 2016-imi nutaamik aalajangiivoq, taassumalu assilinera uannut ulloq taanna nassiullugu. Aalajangiinermit makku ilaatigut erserput:
“[...]
Namminersorlutik Oqartussat nalunaarutaanni nr. 9-mi, 17. juli 2014-imi § 5, imm. 1-ikkut aalajangersarneqarpoq inuit kikkut piffissami aalajangersimasumik sivisussusilimmi aalisarsinnaanermut akuersissummik tunineqarsinnaasut, tassanilu pisassat amerlanerpaaffilerneqarnissaat piumasaqaataanani. Aalajangersakkami tassani piumasaqaataavoq qinnuteqartoq umiatsiaararsorluni aalisarsinnaanermut ukiup siuliani akuersissutaateqarsimassasoq.
8. september 2014-imi qinnuteqaravit ukiumi suliani akuersissutaateqarsimannginnavit § 5, imm. 1 tunngavigalugu akuersissummik tunineqarsinnaanngilatit. Qinnuteqaatinni 8. septemberimeersumi taarsiullugu qinnuteqaatigaat § 5, imm. 5 tunngavigalugu tunineqarnissat, tassuunami aalajangersarneqarmat § 5, imm. 1-ip atuutinnginnissaa ataatsimut immikkut akuersissutigineqarsinnaasoq. Qinnuteqaatit Aalisarnermut, Piniarnermut Nunalerinermullu Naalakkersuisoqarfiup nalunaarummi § 4, imm. 2 tunngavigalugu 2. oktober 2014-imi itigartippaa. Aqaguani, tassa 3. oktober 2014-imi Naalakkersuisoqarfimmut mailimi uppernarsarlugu allapputit § 5, imm. 5 tunngavigalugu qinnuteqartutit. 20. marts 2015-imi § 5, imm. 5 tunngavigalugu immikkut akuerineqarnissat qinnutigeqqippat, tamannalu 30. marts 2015-imi itigartipparput aamma taamatut tunngavilersuuteqarluta.
Qinnuteqaativit 8. september 2014-imeersup aamma aappassaanik qinnuteqaativit 20. marts 2015-imeersup suliarineqarnerini ajoraluartumik kukkussuteqartoqarsimavoq, taamatuttaarlu saaffiginnissutinnut 3. oktoberimeersumut itisilerisumik akissuteqartussaasimagaluarluta. Tamanna Aalisarnermut, Piniarnermut Nunalerinermullu Naalakkersuisoqarfimmi ajuusaarutigaarput. Tamanna tulliuttuni aaqqiissuteqarfiginiarparput.
Namminersorlutik Oqartussat nalunaarutaat nr. 9, 17. juli 2014-imeersumi § 5, imm. 5, § 5, imm. 1-imi akuersissutip qinnuteqartunut ukiup siuliani akuersissutaateqarsimasunut taamaallaat tunniunneqarsinnaanerata atortinneqannginnissaanik ataatsimut immikkut akuersissuteqarnissamut periarfissiivoq. Ataatsimut immikkut akuersissut kikkut tamarmik akuersissutaateqaratik aalisarnissaannut periarfissiisoq pineqarpoq. § 5, imm. 5-ip siunertaa tassaavoq ukiup suliani akuersissutaateqarsimanngitsut aalisarsinnaanerannik ammaassinissaq. Tamanna assersuutigalugu pisinnaavoq pisassiissutit tamakkerlugit pisarineqarsimanngiffiini. 2014-imi aamma 2015-imi § 5, imm. 5 tunngavigalugu qinnuteqarfigisanni ataatsimut immikkut akuersissummik tunniussisoqarsimanngilaq. Taamani tunisinissamut periarfissat killeqarsimanerat tamatumunnga pissutaavoq.
Inatsisartut Ombudsmandiannut naammagittaalliuutinni 10. april 2015-imeersumi malugeqqullugu erseqqissumik oqaatigaat qinnuteqaatinni § 5, imm. 5 pineqartoq qinnuteqaatillu saarullittassiissutit tamakkerlutik pisarineqarsimannginnerat tunngavigalugu immikkut akuersissummik qinnuteqaatitut isigineqassasoq.
Qinnuteqaatit Aalisarnermut, Piniarnermut Nunalerinermullu Naalakkersuisoqarfiup suliareqqippaa 18. august 2015-imilu itigartillugu, tassanilu § 5, imm. 5 tunngavigalugu immikkut akuersissummik qinnuteqaativit sooq akuerineqarsinnaannginnera nassuiarparput.
Inatsisartut Ombudsmandiannut 28. august 2015-imi naammagittaalliuutinni malugeqqullugu oqaatigeqqippat § 5, imm. 5 tunngavigalugu ataatsimut immikkut akuersissummik qinnuteqartutit. § 5, imm. 5-ip siunertaa itigartitsissummi 18. august 2015-imeersumi taamani nassuiarparput, taamaattumillu ilimagisariaqarlugu qinnuteqaativit siunertaa tassaasoq § 5, imm. 1 tunngavigalugu ataatsimut immikkut akuerineqarnissat.
2016-imi § 5, imm. 5 tunngavigalugu ataatsimut immikkut aamma akuersissuteqartoqarsimanngilaq, taamaattumillu qinnuteqaatit itigartittariaqarlugu.
Naggataatigut malugeqqullugu oqaatigisinnaavarput sunngiffimmi aalisartartut 1000 tonsit tikillugit pisaqarnissaannut periarfissiisoqarsimasoq. Taamatut aalisarnissamut piumasaqaatit januar/februarip ingerlanerani nalunaarutigineqassapput.
Suliaq pillugu nutaanik paasissutissaateqaruit imaluunniit suliaq eqqunngitsumik tunngaveqarluni aalajangiisoqarsimasoq isumaqaruit Aalisarnermut, Piniarnermut Nunalerinermullu Naalakkersuisoqarfimmut ullut 14-it iluanni naammagittaalliorsinnaavutit.” (Atorfeqarfimmi nutsigaavoq)
A-p pingajussaanik naammagittaalliuutaa 12. januar 2016-imi tiguara.
Aalisarnermut, Piniarnermut Nunalerinermullu Naalakkersuisoqarfik allakkani 22. januar 2016-imeersuni qinnuigaara suliami allagaatit uannut nassiuteqqullugit suliarlu pillugu oqaaseqaateqaqqullugu. Ilaatigut imatut allappunga:
“[...]
Naalakkersuisoqarfik qinnuigaara oqaaseqaammini pingaartumik manna pillugu nassuiaateqaqqullugu, tassalu [A-mut] itigartitsissutaaqqaartut 2. oktober 2014-imeersup aamma 30. marts 2015-imeersup Inatsisartut aalisarneq pillugu inatsisaata allannguutaa pillugu Inatsisartut inatsisaata nr. 18-ip, 3. juni 2015-imeersup atortuulersinneqarnera sioqqullugu nalunaarutigineqarnerat Naalakkersuisoqarfiup paasinninnera malillugu qanoq sunniuteqarnersoq.
[...]”
Suliami allagaatit kiisalu suliaq pillugu oqaaseqaat Aalisarnermut, Piniarnermut Nunalerinermullu Naalakkersuisoqarfiup allakkatigut 8. februar 2016-imeersutigut nassiuppai, allakkanillu taakkunannga ilaatigut makku erserput:
“[...]
[A] Namminersorlutik Oqartussat nalunaarutaanni nr. 9-mi, 17. juli 2014-imeersumi § 5, imm. 5 naapertorlugu immikkut akuersissummik tunineqarnissamut 8. september 2014-imi aamma 20. marts 2015-imi qinnuteqarsimavoq.
ltigartitsisoqarnerata nalaani nalunaarummi § 5, imm. 5-imut inatsisitigut tunngavigine-qarpoq Inatsisartut inatsisaanni nr. 5-imi, 21. maj 2002-meersumi § 10 a, imm. 2, tassani Naalakkersuisut periarfissinneqarput aalisarnerup ingerlanneqarnissaanut atugassarititani piffissanut killilikkamik allanngortitanik nalunaaruteqarnissamut.
Inatsisartut inatsisaanni nr. 18-imi, 3. juni 2015-imeersumi § 10 a, imm. 2-mut oqaaseqaammik allannguisoqarsimanngilaq, aalajangersakkamilli § 10 b, imm. 2-mut ilanngussisoqarpoq, taamaattumik Aalisarnermut, Piniarnermut Nunalerinermullu Naalakkersuisoqarfik isumaqarpoq Namminersorlutik Oqartussat nalunaarutaanni nr. 9-mi, 17. juli 2014-imeersumi § 5 imm. 5 naapertorlugu [A-p] immikkut akuersissummik tunineqarnissamik qinnuteqaataa 8. september 2014-imi aamma 20. marts 2015-imi itigartitsinernut attuumassuteqanngitsut.”
Tamatuma kingornatigut imaattunik oqaaseqaateqarpunga:
“1. Misissuinerma killissalerneqarnera
Suliami matumani Aalisarnermut, Piniarnermut Nunalerinermullu Naalakkersuisoqarfik [A-p] aalisarsinnaanermut akuersissummik qinnuteqaatai aalisarsinnaanermut akuersissutit pillugit nalunaarummi 2014-imeersumi § 4, imm. 2 tunngavigalugu qinnuteqaataanik ukiup siuliani aalisarsinnaanermut akuersissutaateqarsimannginnera kisiat innersuussutigalugu itigartitsinissaminut inatsisikkut pisarisaqarneratut tunngavissaqarsimanersoq aallunniarlugu aalajangerpunga. Inatsisikkut tunngavissaqarnissamik piumasaqaat pillugu ataatsimut isumaliutersuutikka immikkoortumi 2.1-imi allaaseraakka, inatsisikkullu tunngavissaqarnissamik piumasaqaatip sunik sunniuteqarnera immikkoortumi 2.2-mi sukumiinerusumik allaaseralugu.
[A-p] qinnuteqaatai Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutit pillugit nalunaarummi 2014-imeersumi aalajangersakkat assigiinngitsut tunngavigalugit suliap ingerlanerani suliarisarsimavai.
[A] aalisarsinnaanermut akuersissutinik qinnuteqaamminut Naalakkersuisoqarfiup aalajangiinerini 2. oktober 2014-imeersumi aamma 30. marts 2015-imeersumi itigartinneqarpoq, nalunaarummi § 4, imm. 2-mi piumasaqaatinik eqqortitsisimannginnera innersuussutigalugu, Naalakkersuisoqarfiullu [A] 18. august 2015-imi aamma 8. januar 2016-imi nalunaarfigalugu qinnuteqaatai nalunaarummi § 5, imm. 5 innersuussutigalugu akuerineqarsinnaanngitsut.
Tamanna [A] Aalisarnermut, Piniarnermut Nunalerinermullu Naalakkersuisoqarfimmut aalisarsinnaanermut akuersissummik imaluunniit aalisarsinnaanermut akuersissummik peqarnissamik piumasaqaatip ataatsimut atortinneqannginnissaanik immikkut akuersissummi pineqartunut ilaatinneqarnissamik (taakkuluunniit marluutillugit) qinnuteqarnersoq apeqqutitut paasivara. Taamaalilluni nalunaarummi § 4, imm. 2-kkut aalajangersarneqarpoq piumasaqaataasoq inuit ukiup siuliani aalisarnissamut akuersissutaateqarsimasut kisimik piffissami aalajangersimasumik sivisussusilimmi pisassat amerlanerpaaffissalernagit aalisarsinnaanermut akuersissummik tunineqarsinnaasut, nalunaarummili § 5, imm. 5-ikkut aalajangersarneqarluni tunisinermi killilersuisoqanngippat saarullinniarsinnaanermut ataatsimut immikkut akuersissuteqartoqarsinnaasoq. Tamanna immikkoortumi 3-mi sukumiinerusumik allaaseraara, matumani [A-p] aalajangersagaq aalajangersimasoq/-immikkut ittoq tunngavigalugu qinnuteqarluni Naalakkersuisoqarfimmut ilisimatitsissutaata qanoq sunniuteqarnera ilanngullugu eqqarsaatigalugu.
Misissuininnut atatillugu Kalaallit Nunaanni inatsisit inatsisikkullu aalajangersagaanngitsumik ileqqut/periaatsit qanoq paasineqarnissaannik nassuiaanermi itisiliissutitut atugassatut Danmarkimi atuakkiat/allaaserisat innersuussutigisarpakka. Kalaallit Nunaanni inatsiseqartitsinikkut tunngaviup Danmarkimilu inatsiseqartitsinikkut tunngaviup pingaarnerusutigut assigiinnerat tamatumunnga pissutaavoq, tamannalu innersuussutini taaneqartuni takuneqarsinnaavoq.
2.1 Inatsisikkut tunngavissaqarnissamik ataatsimut piumasaqaat
Aalisarsinnaanermut akuersissutit pillugit nalunaarummi 2014-imeersumi § 4, imm. 2-mi aalajangersagaq Aalisarnermut, Piniarnermut Nunalerinermullu Naalakkersuisoqarfik sulianik taaneqartunik aalajangiiviginninnermi nalaani inatsisikkut naammattumik tunngavissaqarsimanersoq tulliuttuni misissorpara.
Misissuininni qitiusoq tassaavoq Aalisarnermut, Piniarnermut Nunalerinermullu Naalakkersuisoqarfiup pisortat inatsimmut naapertuuttumik tunngaveqartussaanerat aalajangersakkamik taassuminnga ilusilersuinermini eqqortissimaneraa.
Suliami nammineerluni misissuiffiginninnermut tunngasumi (oqaaseqaatip immikkoortuani 1-imi, 2013-imi ukiumoortumik nalunaarummi immikkoortumi 5.6.1-imi) aamma oqaatigisattut pisortat inatsimmut naapertuuttumik tunngaveqartussaanerat marlunnut avissimasutut nalinginnaasumik isigineqartarpoq.
Taamaalilluni tunngavimmi tassani pisortat inatsimmik tunngaveqartussaanerat pineqartunut ilaatinneqarpoq, tassanilu pineqarluni inatsiseqartitsinikkut aalajangersaaneq inatsimmut inatsiseqartitsinikkut aalajangersaanermi tunngavigineqartumut/qulangiisimasumut assortuuttuussanngitsoq. Taamaattumik nalunaarut inatsimmut nalunaarummik aalajangersaanermi tunngavigineqartumut assortuuttuussanngilaq.
Pisortat inatsimmut naapertuuttumik tunngaveqartussaaneranni inatsisikkut tunngavissaqarnissamut piumasaqaat tamatuma saniatigut ilaavoq. Tassa imaappoq ingerlatsivik pisariaqarneratut piginnaatinneqanngikkuni iliuuseqarsinnaanngitsoq. Taamaalilluni malittarisassanik, matumani nalunaarummik aalajangersaaneq ilanngullugu eqqarsaatigalugu, innuttaasut iliuuseqarnissamut periarfissaannik killiliisunik aalajangersaasoqassappat inatsimmik tunngavissaqarnissaq nalinginnaasumik piumasaqaataavoq.
Ingerlatsineq pillugu inatsiseqartitsineq pillugu atuakkiani allaaserisanilu oqaatigineqarajuttarpoq ingerlatsiviup innuttaasup soqutigisaqarfianut akuliunnera annertusiartortillugu inatsisikkut tunngavigisaq qularnaanneruleriartussasoq, tak. Jens Gardep allallu atuakkiaanni “ Forvaltningsret – Almindelige emner”-mi, 2009-mi tallimassaanik naqitertinneqartumi qupperneq 180 aamma Hans Gammeltoft-Hansenip allallu atuakkiaanni “Forvaltningsret”-imi, 2002-mi aappassaanik naqitertinneqartumi quppernermi 302-mi Jon Andersenip allaaserisaa.
Akuliunnerup suussusia apeqqutaatillugu innuttaasup inuussutissarsiornissamut periarfissaanut akuliunnermi periarfissaanilluunniit killilersuinermi inatsisikkut erseqqissumik tunngavissaqarnissaq piumasaqaataassaaq, tak. Jens Gardep allallu atuakkiaanni siusinnerusukkut taaneqartumi quppernermi 201-imi Jens Gardep allaaserisaa.
2.2 Suliami pineqartumi inatsisikkut tunngavissaqarnissamik piumasaqaat
Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutit pillugit nalunaarummi 2014-imeersumi § 4, imm. 2-mik ilusilersuinermini pisortat inatsimmut naapertuuttumik tunngaveqartussaanerat eqqortissimaneraa tulliuttuni misissorpara.
Aalisarsinnaanermut akuersissutit pillugit nalunaarummi 2014-imeersumi aalisarsinnaanermut akuersissutinik tunniussisarneq § 4, imm. 2-kkut aalajangersaavigineqarpoq. Aalajangersakkamit tassannga erserpoq:
“Aalisarsinnaanermut akuersissut taamaallaat angallatinut suliffeqarfinnulluunniit ukiup siuliani taassuma assinganik aalisarsinnaanermut akuersissuteqarfigineqarsimasunut qin-nuteqartoqarneratigut tunniunneqartarpoq.”
Suliami pineqartumi Aalisarnermut, Piniarnermut Nunalerinermullu Naalakkersuisoqarfiup aalisarsinnaanermut akuersissutit pillugit nalunaarummik 2014-imeersumik ilusilersuisimanerata tasssumalu qanoq paasineqarnissaanik nassuiaanerata manna nassataraa, tassalu [A-p] inuussutissarsiutigalugu aalisarnerup ilaani aalajangersimasuni ingerlatsisinnaajunnaarnera. Tassa taamaalilluni pineqartoq tassaavoq innuttaasup inuussutissarsiornissamut periarfissaanut annertukuluttorsuarmik akuliunneq, taamaattumillu inatsisikkut tunngavissaqarnissamik piumasaqaat sakkortusisaq tamatuma kingunerisaanik atuutissalluni.
Inatsisikkut tunngavissaqarnissamik piumasaqaatip taassuma ilumut eqqortinneqarsimaneranik misissuisoqassappat inatsisiliornerup tunuliaqutaasup sukumiinerusumik misissorneqarnissaa piumasaqaataavoq.
Aalisarsinnaanermut akuersissutip nassuiarneqarnera aalisarneq pillugu inatsimmi § 4, imm. 6-imiippoq:
“Inatsimmi matumani “akuersissut” aalisagaqatigiinnik aalajangersimasunik Naalakkersuisut aalisariutaatileqatigiinnut nalunaarutigisimasaannik aalisarsinnaatitaanertut paasi-neqassaaq.”
Kalaallit Nunaanni aalisarneq eqqarsaatigalugu akuersissutit assigiinngitsut sisamat tunniunneqarsinnaapput, tak. aalisarneq pillugu inatsimmi § 14, imm. 1.
Aalisarneq pillugu inatsimmi § 13, imm. 2-kkut aalajangersarneqarpoq Naalakkersuisut (matumani Aalisarnermut, Piniarnermut Nunalerinermullu Naalakkersuisoqarfik) aalisagaqatigiinnik ataatsinik arlalinnilluunniit Kalaallit Nunaanni aalisarnermut akuersissuteqarfigineqarsimanissaq, tassungalu ilanngullugu akuersissuteqarfigineqarnissamik piumasaqaatit angallatit angissusiinut erseqqissumik taaneqarsimasunut atuunnissaat pillugit malittarisassanik aalajangersaasinnaasut.
Taamaalilluni aalajangersagaq taanna tassaavoq aalisarsinnaanermut akuersissutit pillugit nalunaarummi 2014-imeersumi § 4, imm. 1-imi inuussutissarsiutigalugu aalisarnermi aalisarnermik ingerlatsinerni aalajangersimasuni piffissaq killilerlugu pisassat annertunerpaaffilernagit aalisarsinnaanermut akuersissuteqarnissamik piumasaqaateqartoqartoq.
Oqaatigineqareersutut aalisarsinnaanermut akuersissutit pillugit nalunaarummi 2014-imeersuni § 4, imm. 2-mit erserpoq aalisarsinnaanermut akuersissutit inunnut suliffeqarfinnulluunniit ukiup siuliani assinganik akuersissutaateqarsimasunut taamaallaat tunniunneqarsinnaasut.
Aalisarnermut, Piniarnermut Nunalerinermullu Naalakkersuisoqarfiup allagaani 26. juni 2015-imeersuni oqaatigineqartut imatut paasivakka tassunga inatsisikkut tunngavigisaq aalisarneq pillugu inatsimmi § 10-miittoq, Naalakkersuisoqarfimmi oqarmat aalajangersagaq taanna inuussutissarsiummik ingerlataqartut assigiinngitsut inuussutissarsiutigalugu aalisarnermik ingerlatsisinnaanerat pillugu malittarisassanik aalajangersaanissamut periarfissiisoq. Naalakkersuisoqarfik aammattaaq imatut paasivara aalisartut inuussu-tissarsiutiminnik illersorneqarsinnaasumik ingerlatsisinnaanerat aalajangersakkap pingaarnertut siunertarigaa.
Aalisarneq pillugu Inatsisartut inatsisaanni nr. 18-imi, 31. oktober 1996-imeersumi aalisarneq pillugu Inatsisartut inatsisaata allannguutaa pillugu Inatsisartut inatsisaatigut nr. 5-ikkut, 21. maj 2002-meersukkut allanngortinneqartumi § 10, imm. 1-ikkut makku aalajangersarneqarput:
“Naalakkersuisut pisuussutinik iluaquteqarniarnerup aqunneqarnissaa siunertaralugu § 6 aamma § 8 naapertorlugit Kalaallit Nunaanni aalisarneq pillugu malittarisassiorsinnaapput. Taamatut malittarisassiornermi pisarineqarsinnaasut, pisaqarsinnaassuseq pigineqartoq, assigiimmik inuussutissarsiutillit aalisarnermillu inuussutissarsiuteqarnerup pissusissamisoortumik nunap immikkoortuini assigiinngitsuni ineriartortinneqarnissaa isiginiarneqarsinnaapput, tassungalu atatillugu makku pillugit malittarisassiortoqarluni:
1) Pisassiissutigineqarsimasut piffissanut, sumiiffinnut, assigiimmik inuussutissarsiutilinnut aalisariutillu ilaannut immikkoortunut agguataarneri.
2) Pisassiissutigineqarsimasut assigiimmik inuussutissarsiutillit, aalisariutit ilaasa immikkoortut aalisarnermilu atortut pisassaannik, kiisalu angallatit ataasiakkaat pisassiissutinit pigisaannik ukiumulluunniit pisassaannik sukumiinerusumik aalajangersaalluni agguataarneri.
3) Piffissaq aalisarfiusinnaasoq sivisunerpaaq, tulaassinerit amerlassusii tulaassinermilu ataatsimi tulaassat annertussusigisinnaasaat akuerisat.
4) l)-3) malillugit malittarisassat naapertorlugit pisanik nalunaaruteqartussaatitaaneq.
5) Aalisarnermut aalajangersimasumut pisaqarsinnaassutsip atorneqarsinnaasup annerpaap qummut killinganik aalajangersaaneq.
6) Aalisariutit ilaannut immikkoortunut assigiimmillu inuussutissarsiutilinnut agguataarineq.”
Allakkani siusinnerusukkut taaneqartuni Aalisarnermut, Piniarnermut Nunalerinermullu Naalakkersuisoqarfiup aalisarneq pillugu Inatsisartut inatsisaata nr. 18-ip, 31. oktober 1996-imeersup akuerineqarneranut atatillugu aalajangersakkat ataasiakkaat pillugit oqaaseqaatini § 10 pillugu oqaaseqaatini immikkoortut uku Naalakkersuisoqarfiup paasinninneranut ikorfartuutaasut
aammattaaq innersuussutigai:
“Siunertarineqarpoq aalisarnermik iluarsaassineq ingerlanneqarsinnaasoq inuussutissarsiortut mianeralugit, tassalu Naalakkersuisut inuussutissarsiortunut aalajangersimasunut inuussutissarsiutigalugu aalisarsinnaanerat nangaassuteqarfigineqarsinnaammat.
Tamanna Avannaani qaleralinniarluni aalisarnermi maannakkut pisinnaavoq, tassanimi pisariaqalersinnaammat sulinermik inuussutissarsiutilinnik ilaatitsinngitsoorsinnaaneq, taakkununnga ilanngullugit kilisaatini aalisariutinilu inuttat – tamakku aningaasarsisinneqartartut inuussutissarsiutigalugu qaleralinniarluni aalisarnermi peqataasinnaanermit isumaqatigiissutini sulisunullu isumaqatigiissutini sinaakkutissatut aalajangersarneqarsimasut tunngavigalugit. Taamatuttaaq siunertaavoq Naalakkersuisut aalisartunik ilaatitsinngitsoorsinnaasut aalisakkanut aalajangersimasunut aalisarsinnaanermut akuersissuteqareersunik.”
Isumaqarpunga Naalakkersuisut inuussutissarsiutigalugu aalisarnermik inuussutissarsiortunut aalajangersimasunuinnaq atuutsitsinnaanerata aalisarneq pillugu inatsimmi § 10 pillugu oqaaseqaatini oqaatigineqarnerata manna nassatarisinnaangikkaa, tassalu inuit inuussutissarsiutigalugu aalisarsinnaanermut akuersissummik qinnuteqartut ukiup siuliani akuersissummik taamaattumik peqarsimanissaannik piumasaqaateqarnissaq pillugu malittarisassanik aalajangersagaq taanna tunngavigalugu aalajangersaasoqarsinnaasoq. Taamaalillutik inuussutissarsiortukkuutaat inuussutissarsiutigalugu aalisarnermut mattunneqarsinnaasutut aalajangersakkat ataasiakkaat pillugit oqaaseqaatini taaneqartut tassapput immikkoortukkuutaat, aalisarnermut allatigut attuumassuteqartut, tamannalu suliami matumani atuutinngilaq.
Taamaalilluni aalisarsinnaanermut akuersissutit pillugit nalunaarummi 2014-imeersuni § 4, imm. 2-mi aalajangersakkap ilusilerneqarnera aalisarneq pillugu inatsimmi § 10-mi aamma taanna pillugu oqaaseqaatini inatsikkut tunngavigisatut oqaatigineqartuni oqaasertalersuinikkut ikorfartuineq erseqqissoq amigaataavoq.
Aalisarsinnaanermut akuersissutit pillugit nalunaarummi 2014-imeersumi § 4, imm. 2 tassaavoq malittarisassaq annertungaatsiartumik akuliuttuusoq, taamaattumillu isumaqarpunga inatsisikkut erseqqissumik tunngavissaqarnissaa piumasaqaataasariaqartoq.
Inatsisikkut tunngavissaq taanna aalisarneq pillugu inatsisip Inatsisartut inatsisaatigut nr. 18-ikkut, 3. juni 2015-imeersukkut aatsaat pissarsiarineqarpoq, tassa § 10 a-p nutaap aalisarneq pillugu inatsimmi ullup tulliani atuutilertussatut ikkunneqarneratigut. § 10 a-p manna ajornarunnaarsippaa, tassalu Naalakkersuisut sinerissamut qanittumi aalisarneq pillugu malittarisassanik aalajangersaanerminni akuersissuteqartoqassappat qinnuteqartup ukiup siuliani assinganik akuersissutaateqarsimanissaanik qinnuteqartullu akuersissummik taassuminnga ukiup siuliani atuisimanissaanik piumasaqaateqarsinnaalernerat.
Uanga paasinninnera unaavoq inatsisip allanngortinneqarnera taanna sioqqullugu malittarisassamik aalisarsinnaanermut akuersissutit pillugit nalunaarummi 2014-imeersuni § 4, imm. 2-tut ittumik aalajangersaasinnaanermut inatsisikkut tunngavissaqarsimanngitsoq, taamaalillunilu [A-p] qinnuteqaatai piffissami inatsisikkut tunngavigissap atulersinneqarnera sioqqullugu taanna innersuussutigalugu Aalisarnermut, Piniarnermut Nunalerinermullu Naalakkersuisoqarfiup itigartissinnaasimanngikkai.
3. Qinnuteqaatit siunertaat
A suliami kingullermi aalisarsinnaanermut akuersissutit pillugit nalunaarummi 2014-imeersumi § 5, imm. 5 innersuussutigalugu Aalisarnermut, Piniarnermut Nunalerinermullu Naalakkersuisoqarfimmit itigartinneqarpoq, Naalakkersuisoqarfillu [A-p] qinnuteqaataanik aalajangersagaq eqqortoq tunngavigalugu naliliiviginnissimanersoq tulliuttuni sukumiinerusumik naliliiffigaara.
Taamaalilluni Aalisarnermut, Piniarnermut Nunalerinermullu Naalakkersuisoqarfik itigartitsissummi 8. januar 2016-imeersumi allappoq taassuma qinnuteqaammini 8. september 2014-imeersumi, Naalakkersuisoqarfimmut mailimini 3. oktober 2015-imeersumi aamma qinnuteqaammini 20. marts 2015-imeersumi oqaatigisimagaa aalisarsinnaanermut akuersissutit pillugit nalunaarummi 2014-imeersumi § 5, imm. 5 tunngavigalugu immikkut akuerineqarnissani qinnutigigini. Naalakkersuisoqarfik aammattaaq allappoq tamanna [A-p] Inatsisartut Ombudsmandiannut naammagittaalliuutaanit 10. april 2015-imeersumit aamma 28. august 2015-imeersumut ersertoq.
Aalisarnermut, Piniarnermut Nunalerinermullu Naalakkersuisoqarfik itigartitsissummi 8. januar 2016-imeersumi aammattaaq nassuiaalluni allappoq aalisarsinnaanermut akuersissutit pillugit nalunaarummi § 5, imm. 5-imi pineqartoq tassaasoq § 5, imm. 1-ip atuutsinneqannginnissaanik ataatsimut immikkut akuersissuteqarnissamut periarfissaq, § 5, imm. 1-imilu aalajangersarneqarluni aalisarsinnaanermut akuersissut inunnut ukiup siuliani akuersissummik taamaattumik peqarsimasunut taamaallaat tunniunneqartassasoq. § 5, imm. 5 tunngavigalugu taamatut ataatsimut immikkut akuersissuteqartoqarsimanngimmat A itigartinneqarpoq.
Aalisarsinaanermut akuersissutit pillugit nalunaarummi § 5, imm. 1 imaattunik oqaasertaqarpoq:
“Piffissaq killilerlugu pisassat annertunerpaaffilernagit aalisarsinnaanermut akuersissut qinnuteqartunut 6 meter tikillugu tamakkiisumik takissusilinnik mikinerusunilluunniit a-ngallatilinnut tunniunneqartarpoq. Aalisarsinnaanermut akuersissut inunnut ukiup siuliani umiatsiaararsorluni aalisarsinnaanermut akuersissutaateqarsimasunut qinnuteqartoqarneratigut tunniunneqartarpoqq.”
Nalunaarummi tassani § 5, imm. 5-imi makku aammattaaq erserput:
“Saarullinniarnermi tunisinikkut killilersuisoqartinnagu imm. 1-miit tamanut atuuttumik immikkut akuersisoqarsinnaavoq.”
Aalisarsinnaanermut akuersissutit pillugit nalunaarummi 2014-imeersumi § 5, imm. 5-ip ataatsimut immikkut akuersissuteqartoqarnissaanut tunngavissaliineranik ataatsimullu immikkut akuersissuteqartoqarsimannginnera pissutigalugu [A-p] immikkut akuersissuteqarfigineqarsinnaannginneranik Aalisarnermut, Piniarnermut Nunalerinermullu Naalakkersuisoqarfiup paasinninnerata isornartorsiornissaanut tunngavissaqarnanga isumaqarpunga.
Sulialli tamarmiusup ataqatigiinneqarnera aallaavigalugu [A-p] Aalisarnermut, Piniarnermut Nunalerinermullu Naalakkersuisoqarfimmut saaffiginnissutai imatut paasivakka ataatsimut immikkut akuersissummi pineqartunut ilaatinneqarnissani kisiat qinnutiginngikkaa, aammali inuussutissarsiutigalugu aalisarsinnaanermut akuersissut qinnutigigaa. [A-p] qinnuteqaammut tassunga inatsiseqartitsinikkut sinaakkutaasumik paasinninnerata, matumani [A-p] aalajangersagaq immikkut ittoq tunngavigalugu immikkut akuersissummik qinnuteqarluni Naalakkersuisoqarfimmut ilisimatitsissuteqarsimanera ilanngullugu eqqarsaatigalugu, suliamik pingaarnertigut taamatut paasinninninnik allanngortitsinissannut pissutissaqalersinngilaanga.
Taamaalillunga isumaqarpunga Aalisarnermut, Piniarnermut Nunalerinermullu Naalakkersuisoqarfiup [A] ataatsimut immikkut akuersissuteqarsimanera apeqqutaatinnagu aalisarsinnaanermut akuersissummik tunineqarnissamut piumasaqaatinik eqqortitsinersoq isummerfiginagu [A] ataatsimut immikkut akuersissummi pineqartunut ilaatinneqassaguni piumasaqaatinik naammassinninnersoq kisiat aalajangiinermi 8. januar 2016-imeersumi pisimasutut isummerfigisinnaanngikkaa.
4. Eqikkaaneq
Suliamik suliarinninnera tunngavigalugu isumaqarpunga Aalisarnermut, Piniarnermut Nunalerinermullu Naalakkersuisoqarfik [A-p] aalisarsinnaanermut akuersissummik qinnuteqataasa [A-p] ukiup siuliani assinganik akuersissutaateqarsimannginnera innersuussutigalugu itigartinnissaanut inatsisikkut naammattumik tunngavissaqarsimanngitsoq.
Aammattaaq isumaqarpunga Aalisarnermut, Piniarnermut Nunalerinermullu Naalakkersuisoqarfiup aalajangiinermini 8. januar 2016-imeersumi manna isummerfigisimasariaqaraluaraa, tassalu [A] aalisarsinnaanermut akuersissuteqaateqarnissap atuutinnginnissaanik ataatsimut immikkut akuersissummi pineqartunut ilaatinneqarsinnaanersoq kisiat isummerfiginagu [A-p] qinnuteqaatini tunngavigalugit inuussutissarsiutigalugu saarullinniarsinnaanermut akuersissummik tunineqarnissamut piumasaqaatinik eqqortitsinersoq.
Tamanna qulaani taaneqartunut makkununnga ataneqartillugu tamatuma saniatigut aamma isigineqassaaq, tassalu aalisarneq pillugu inatsisip 4. juni 2015-imi allanngortinneqarnera sioqqulllugu inuussutissarsiutigalugu aalisarsinnaanermut akuersissutinik qinnuteqartut ukiup siuliani assinganik akuersissutaateqarsimanissaannik Aalisarnermut, Piniarnermut Nunalerinermullu Naalakkersuisoqarfiup piumasaqaateqarsinnaaneranut inatsisikkut tunngavissaqarsimanngitsoq, kiisalu Naalakkersuisoqarfiup aalajangiinera 8. januar 2016-imeersoq tassaasoq Naalakkersuisoqarfiup inatsimmik allanngortitsineq sioqqullugu aalajangiinerisa suliareqqinneqarnerisa inernilerneqarnerat.
Tamakku tunngavigalugit inassuteqaatigaara [A-p] aalisarsinnaanermut akuersissummik qinnuteqaatai Aalisarnermut, Piniarnermut Nunalerinermullu Naalakkersuisoqarfiup suliareqqissagai, oqaatigisimasakkalu tunngavigalugit nutaamik aalajangiissasoq.
Aalisarnermut, Piniarnermut Nunalerinermullu Naalakkersuisoqarfik tamatumunnga uiggiullugu qinnuigaara Naalakkersuisoqarfik oqaaseqaatikka tunngavigalugit qanoq iliuuseqarniarnersoq uannut nalunaarutigeqqullugu.”