Atuagagdliutini 25. juni 2014-imi allaaserisaq atuarlugu suliaq Kommuni Kujalliup ilinniarfinni assigiinngitsuni ilinniartussatut tiguneqarnissamik qinnuteqaatinik suliarinninneranut tunngasoq malugaara.

Suliami pineqartorpiaq tassaavoq Narsami Piareersarfik, paasissutissiissutigineqartut malillugit qinnuteqaatinik 24-nik kukkusumik suliarinnissimasoq. Qinnuteqartorpassuit ilinniarfinni qinnuteqarfigisaminni ilinniartussatut massakkut tiguneqarsinnaannginnerat kukkusumik suliarinninnerup nassataraa. 

Sulisuma ilaat kommunimi sulisut ilaannik oqarasuaatikkut 30. juni 2014-imi oqaloqateqarnermini paasitinneqarpoq kommunip suliamik ilumini misissuineq aallartissimagaa.

Ombudsmandip misissuineranik aallartitsissanerlunga isumaliutersuuteqarninnut atatillugu Kommuni Kujalleq qinnuigaara suliamik ilumini misissuinermi inerneranik ilisimateqqullunga. Tamanna tusagassiuutitigut nalunaarutikkut 2. juni 2014-imeersukkut tamanut nalunaarutigaara. Kommuni Kujalliup akissutaa massakkut tiguara.

Ilinniartussatut tiguneqarnissamik qinnuteqaatit kukkusumik suliarineqarsimanerannut pissutaasoq kommunip akissummini nassuiarpaa. Ajonartorsiut malugineqarmat kommunip qanoq iliuuseqarsimanini aammattaaq nassuiarpaa, kommunillu tamatumunnga atatillugu oqaatigaa suliaq atorfinitsitsisarneq pillugu inatsiseqartitsineq tunngavigalugu aamma suliarineqarsimasoq. Kiisalu kommunip oqaatigaa taamatut pisoqaqqinissaa pinaveersimatinniarlugu suliniutit assigiinngitsut aallartinneqarsimasut. Kommunip suliaq ataatsimut isigalugu ajuusaarutigaa.

Kommuni Kujalleq ullumikkut allakkatigut nalunaarfigaara suliami kommunip akissutaa tunngavigalugu annertunerusumik iliuuseqaqqinnianngitsunga. Manna pingaartumik pingaartillugu isiginiarpara, tassalu uanga paasinninnera unaasoq kommuni qinnuteqaatit kukkusumik suliarineqarnerisigut ajoqusiinerit annikinnerpaanngortinniarlugit naammaginartumik iliuuseqarniarsarisimasoq kiisalu kommuni tamatuma assinganik siunissami pisoqarnissaa pinaveersimatinniarlugu suliniutinik naleqquttunik aallartitsisimasoq.

Oqaatigaara inunnit ataasiakkaanit kommunip ilinniartussatut tiguneqarnissamik qinnuteqaatinik kukkusumik suliarinninneratigut qinnuteqaatiminnik itigartinneqarsimasunit naammagittaalliuutinik tigusaqarsimanngitsunga. Naammagittaalliuutinik taamaattunik tigusaqaruma taakku soorunalimi isummerfigiumaarpakka.

Vera Leth