“Akuerineqarsinnaanngilaq”, Ombudsmand Vera Leth Piniarnermut Aalisarnermullu Naalakkersuisoqarfiup ataatsimoorluni piniagassatut tikaagullittassinneqarnissamik qinnuteqaateqartunut 2022-mi novemberimi itigartitsinera pillugu eqikkaalluni taamatut oqaaseqaateqarpoq.

Ataatsimoorluni piniagassanik tikaagullinniarnermik piffissaq eqqarsaatigalugu killilersuisoqarnissaanik Naalakkersuisut 2021-mi decemberimi aalajangernerat Naalakkersuisoqarfiup itigartitsinermut tunngavigisamisut innersuussutigaa. Ombudsmandip misissuineranut atatillugu Naalakkersuisoqarfiup oqaatigaa Naalakkersuisut aalajangernerat itigartitsinermut inatsisikkut tunngavissatut atuussinnaassuseqartutut isigigini.

Ombudsmandip Naalakkersuisoqarfik tamatumani isumaqatiginngilaa.

“Naalakkersuisut aalajangernerat tikaagullittassinneqarnissamik qinnuteqartumut itigartitsinermi inatsisikkut tunngavittut atuussinnaassuseqarsinnaanngilaq. Aalajangernerup taamaattup inatsiseqartitsineq atuuttoq tapertalersinnaanngilaa taarsersinnaanaguluunniit. Tamanna Naalakkersuisoqarfimmut taamani 2021-mi aamma oqaatigaara. Taamani Naalakkersuisoqarfik isumaqatigalunga oqarpoq, suliallu tassunga attuumassuteqartut tamaasa suliareqqillugit”, Vera Lethip oqaatigaa.

Naalakkersuisoqarfiup kukkussutigereersimasaminik kukkussuteqaqqinera Ombudsmandip akuerineqarsinnaanngitsutut isigaa.

“Naalakkersuisoqarfiup kukkunermik siusinnerusukkut nassueritigisimasaminik kukkussuteqaqqinnera ernumanartuuvoq ajornartorsiuterujussuullunilu. Uanga paasinninnera unaavoq Naalakkersuisoqarfiup aqutsinini inatsiseqartitsineq atuuttoq Inatsisartunit akuerineqarsimasoq tunngavigalugu tamatigut piareer-sartartussagaa, tamannali suliami matumani pisimanngilaq” Vera Leth oqarpoq nangillunilu:

“Naalakkersuisoqarfik ataatsimoorluni tikaagullinniarnerup piffissaq eqqarsaatigalugu killilerneqarnissaanik kissaateqaruni nalunaarut nutaarluinnaq aalajangersarsimasariaqaraluarpaa, tamannalu pillugu malittarisassat atuuttut tunngavigalugit tamanut saqqummiussimasariaqaraluarlugu. Naalakkersuisoqarfik taamaaliornissaminut periarfissaqarsimavoq, piginnaatitsissutitut aalajangersakkamik taaneqartoq suliassaqarfimmi tassani inatsimmi atuuttumi pioreersoq tunngavigalugu,” Ombudsmand Vera Leth naggasiilluni oqarpoq.

Ombudsmandi naliliivoq suliami annertunerusutigut kukkussuteqartoqarsimasoq sumiginnaasoqarsimasorlu, taamaattumillu Inatsisartut Inatsisinut Ataatsimiititaliaat aamma Naalakkersuisut suliamik Ombudsmandi pillugu inatsimmi § 23 tunngavigalugu nalunaarfigalugit.

Oqaaseqaat uani sukumiinerusumik atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Inatsimmik naapertuuttumik tunngaveqartussaanermik aaallaavik sunaana?

Inatsimmik naapertuuttumik tunngaveqartussaanermik aallaavik innuttaasut inatsiseqartitsinikkut innarlitsaalineqarneranni pingaaruteqartutut ilaasoq marlunnut avinneqartarpoq.

Siullertut pineqartoq tassaavoq inatsiseqartitsinermi kimittussutsikkut tulleriinnilersuineq. Taassuma malitsigisaa tassaavoq inatsiseqartitsinikkut tulleriinnilersuineq – tassa imaappoq inatsisikkut aalajangiineq inatsisikkut aalajangiinermut qulliunerusutut inissisimasumut assortuuttuussanngitsoq. Soorlu nalunaarut inatsimmut nalunaarutip aalajangersarneqarnerani tunngaviusumut assortuuttuussanngilaq.

Aappaattut inatsimmik naapertuuttumik tunngaveqartussaanermik aallaaveqarneq inatsisikkut tunngavissaqartussaanermik piumasaqaateqarfiuvoq. Ingerlatsiviup taamaaliornissamut inatsisikkut tunngavissaqarani iliuuseqarsinnaannginnera tamatuma nassataraa. Allatut oqaatigalugu oqartussaasoq innuttaasumut taamaallaat aalajangiisinnaasoq inatsisiliornermi pissaanermik tigummiaqartumit taamaaliornissaminut piginnaatinneqarsimaguni. Inatsisikkut tunngavissaqartussaanermik piumasaqaatip taamatuttaaq nassataraa nalunaarutip ingerlatsivimmit aalajangersarneqartup inatsimmik nalunaarutip aalajangersarneqarnerani tunngaviusimasumik inatsisikkut tunngavissaqassasoq.