Oceans North Greenlandip videoliaa KNR-ip innuttaasunut paasissutissiisarfianit peerneqassasoq Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup pilerisaarisarneq pillugu nalunaarummi § 17, imm. 2 tunngavigalugu aalajangersinnaanngilaa. Ombudsmandi oqaaseqaammi nutaami inernililluni taamatut eqikkaavoq.

Naalakkersuisoqarfik aalajangiivoq videoliaq tv-kkut aallakaatinneqarpat tamanna inatsimmik unioqqutsinerussasoq, tassami video politikkikkut isummannik saqqummiussinernik pilerisaarisarneq pillugu nalunaarummi § 17, imm. 2-mi inerteqqutigineqartunik imaqarmat.

Aalajangiineq eqqartuussissuserisup Jonas Christoffersenip Oceans North Greenland sinnerlugu Ombudsmandimut naammagittaalliuutigaa, ilaatigullu oqaatigalugu pilerisaarisarneq pillugu nalunaarummi § 17, imm. 2 radio tv-lu pillugit inatsimmik tunngaveqanngitsoq.

Naammagittaalliortoq Ombudsmandip ilalerpaa, oqaatigalugulu radio tv-lu pillugit inatsit Naalakkersuisut politikkikkut isummanik saqqummiussinissamut inerteqqummik pilerisaarisarneq pillugu nalunaarummi § 17, imm. 2-mi aalajangersaanissaannut periarfissiinngitsoq.

Ombudsmandip oqaaseqaataa uani atuarsinnaavat.

Paasissutissat amerlanerusut oqarasuaatip normuanut 32 78 10-mut sianerluni pissarsiarineqarsinnaapput.

Nalunaarut qanoq iliorluni aalajangersarneqartarpa?

Nalunaarutit amerlanersaat inatsimmik tunngaveqarluni aalajangersarneqartarput, inatsisimmi amerlanersaat inatsisinik atuutsitsisunut (Naalakkersuisunut) piginnaatitsissutitut aalajangersakkanik, inatsisiliortunit (Inatsisartunit) aalajangersarneqartunik imaqartarmata, piginnaatitsissutitullu aalajangersakkat taakku killissaliussatut aalajangersarneqartut erseqqinnerusut iluanni malittarisassanik inatsisip nammineq oqaasertaanut tapertaliussassanik aalajangersaanissamut periarfissiisarput.

Nalunaarutinik aalajangersaanermi killissarititaasut inatsisiliortunit aalajangersarneqartut aamma inatsiseqartitsinermi sakkortusiartuaartitsilluni tulleriinnilersuinermi tunngaviit ingerlatsiviup ataqqisussaavai.

Nalunaarutip imarisaa pineqartoq piginnaatitsissutitut aalajangersakkanik nalunaarutit pineqartut aalajangersarneqarnerinut tunuliaqutaasunik aammattaaq tunngaveqassaaq. Nalunaarut inatsisip piginnaatitsineranit annertunerusumik atuuffeqartoq inatsisikkut tunngavimmik amigaateqartarpoq.

Piginnaatitsissutip atuuffiata qanoq annertutigineranik paasiniaaneq inatsisikkut tunngavigisap qanoq paasineqarnissaanik nassuiaanermik nalinginnaasumik tunngaveqarpoq. Malittarisassamik pineqartumik piginnaatitsissut aqqutigalugu aalajangersaanissamut piginnaatitsissut inatsisikkut naammattumik tunngaveqarnersoq apeqqummik nassuiaanermi pingaarnertut isuma nalunaarutip akuliunneraniippoq. Innuttaasoq eqqarsaatigalugu akuliunneq annertunerujartortillugu malittarisassap pineqartup nalunaarut aqqutigalugu aalajangersarnissaanut piginnaatitsissut erseqqinneruleriartortussaavoq.